Mohanai 2078 KTM

सभामुखं राजीनामा मब्यूतले संसद न्ह्याके बिइमखु : एमाले मू सचेतक विशाल भट्टराई

नेवा: अनलाइन न्युज – ललेन्द्र शाक्य | २०७८ आश्विन २२, शुक्रबार १४:२८:५७

नेकपा एमाले संसदीय दलया मू सचेतक विशाल भट्टराई नं सभामुख अग्नी सापकोटां राजीनामा मब्यूतले संसदया अवरोध जारी जुइगु धाःगु दु । सभामुख सापकोटां राजीनामा एमाले विभाजनया मतियार जूगुलिं वयात पार्टीं स्वीकार मयायेगु वया दाबी दु ।

मू सचेतक भट्टराई नं धाःगु दु, ‘सभामुखं नेपाःया संविधान, राजनीतिक दल सम्बन्धी ऐन २०७३, प्रतिनिधिसभा नियमावलीया पालना मयात । नियमावली कथं पार्टीं सांसदपिन्त कारवाही याःगु सुचं संसद न्ह्याःगु इलय् संसदय् न्यंकेगु, संसद मन्ह्याःगु इलय् टाँस यायेगु खः । सभामुख लिपा लाःसां नं एमालेया १४ म्ह सांसदयात कारवाही याःगु सुचं टाँस यानाः सच्चेजुइत तयार मजूगु खःसा मार्ग प्रशस्त यायेमाल । मेम्ह तटस्थ व्यक्तिं संसद चलेयाइ ।’

वं सभामुखं एमालेयात अन्याय याःगु द्वपं नं ब्यूगु दु । वं धाःगु दु, ‘सभामुखं एमालेयात मेगु पार्टी सरह व्यवहार यायेमफुत । सरीता गिरीया २४ घौ, टोपबहादुर रायमाझी लिसेंया ३० घण्टाय् पालना याइम्ह सभामुखं एमालेया १४ म्ह सांसदपिनिगु कारवाहीया सुचं १३ दिंतक टाँस मयात व एमाले विभाजनया मतियार जुयादिल । सभामुखं राजीनामा मब्यूतले  चालू संसदया अधिवेशनय् पूर्ववत् विरोध यथावत जुयाच्वनी ।’

जनतां माया याःगु पार्टी एमालेयात सर्वोच्च अदालत, निर्वाचन आयोग, सभामुख लिसेंयापिन्सं अन्याय याःगुलिं सः थ्वयेकाः च्वनेगु वया दृढता दु । अध्यादेश हयाः दल तछ्यानाः संसदीय व्यवस्था बदनाम याकेगु ज्याया विरोध मू प्रतिपक्षं याइगु स्वाभाविक जूगु वया दाबी दु । वं धाःगु दु, ‘प्रधानमन्त्रीं सत्तागठबन्धनया बैठकय् एमालेयात छाय् हेपेयायेमाल ? जिपिं सर्वदलीय बैठकय् च्वनेमखु । प्रधानमन्त्रीं जिपिंलिसे तप्यंक संवाद याःसा ज्यू हे ज्यू नि ।’

स्वलातक मन्त्रिपरिषद् विस्तार यायेमफुम्ह सरकारं मेगु ज्या याइ धैगु विश्वास जनतायात मजूगु नं वं धाःगु दु । वं धाःगु दु, ‘जनादेशया अवहेलना जूगुलिं आः वनेमाःगु चुनावय् हे खः । न्यायालय, निर्वाचन आयोग सेटिङय् न्ह्याःगु दु । उकिं न्यायाधीश, वकिलपिन्त पदक ब्यूगु दु । न्यायाधीश हे मन्त्री दयेकेत न्ह्यच्यूगु दु ।

थःपिनिगु पार्टीयात विभानजं प्यंगू न्यागू प्रतिशत जक घाटा जुइगु तर माधव नेपालया पार्टीं छगू वडाय् नं त्याके मफइगु वं दाबी याःगु दु । वं धाःगु दु, ‘माधव नेपालं छुं नं वडाय् थःपिनिगु सामर्थ्यय् त्याकाः क्यंसा । गुक्वःगु महाधिवेशनपाखें बुनाः नायःया बोर्ड टाँस याःगु खः । आः नेपालं उगु पार्टीइ पेरिस डाँडाय् यंकाः ल्वाकछ्याइगु खः । निगूगु पार्टी जुइगु नेपालया हवाई कल्पना खः । कठैबरा माधव नेपाल !’

Categorized in राजनीति