kmc bidya

सफु च्वयेगु तयारी याना च्वनाः पत्रकार बिजयरत्न असंवरे

नेवा: अनलाइन न्युज – निश्चल | २०७६ चैत्र २०, बिहिबार ११:४८:३५

 “  विशेष याना जिगु ज्या छक्वः संकिपा स्वयेगु , छक्वः फिल्म स्वयेगु छक्वः मूभि स्वयेगु जुया च्वन यानि की जि सिनेमाया संसारं पिहाँ मवया  ”

 संसारय् न्यंकभनं कोरोना भाइरसया संक्रमण फैले जुया च्वंगु थ्व ई धइगु झीसँ सुरक्षित जुया च्वनेगु कुतःला यायेमागुला जुहे जुल । सरकारं नं कोरोना संक्रमणपाखें जनतायात सुरक्षित यायेत देय्न्यंक लकडाउन याना तःगु दु । सुयातं छेँय् माःसांम्वाःसां पिहाँ मवयेगु उजं जारी याना तःगु दु । थः सुरक्षित जुइत , थःगु परिवार सुरक्षित याना तयेत अले सकल नेपाःमियात सुरक्षित यानातयेत सकसिनं लकडाउन पालना याना च्वंगु दु । जिं नं याना च्वनागु दु । जिगु छेँय् जःपिन्सं नं लकडाउनयात पालना याना वया च्वंगु दु । 

लकडाउनया थ्व ईलय् सुरक्षित जुया च्वनेगु निंतिं मा प से अर्थात मास्क छ्यला , पञ्जा न्ह्याना अले सेनिटाइजर छ्यला च्वना अले बारम्बार साबुं लखँ ल्हासिलेगु लगायतया सुरक्षाया उपाय नाला वया च्वनागु दु । सुथय् छधु छेँयात माःमाःगु किराना सामान , तर्कारी न्यावना अले गुबले गुबलें थःयात माःगु वासः नं न्याना हयेगु याना । पसः वनेगु बाहेक छेँय्नं पिहाँ मवना । जिमि छेँय्जःपिं नं पिहाँ मवं ।

जिम्ह जहान मीना बज्राचार्य नेपालमण्डल टेलिभिजनया समाचार वाचक खः धाःसा इमिथाय् कोरोना पाखें सुरक्षाया निंतिं समाचार छुं ईया निंतिं दिकुगुलिं छेँय् हे च्वना च्वंगु दु । उकिं निम्हं जाना छेँय् ज्या याना । जि छेँय् ज्या याये उलि मसः तर थ्व लकडाउनय् वयात ग्वाहालि यानाबले छेँय् ज्याया अर्थ थुइके खन ।

पत्रपत्रिका मस्वसे च्या त्वनेगु बानी मदुम्ह जित आः धाःसा बानी हिलेमाला च्वंगु दु , छाय्धाःसां पत्रपत्रिका न्यायेमदु । थ्व बाहेक टिभीइ नेवाः , हिन्दि व खस नेपाली फिल्म स्वया दिन बिते याना । नेपालमण्डल टेलिभिजनं न्हिंन्हि नेवाः फिल्म बिया वया च्वंगुलिं याना न्हापा स्वये धुनागु नेवाः संकिपा हाकनं स्वया पुनर्मूल्यांकन याये खना च्वंगु दु । विशेष याना जिगु ज्या छक्वः संकिपा स्वयेगु , छक्वः फिल्म स्वयेगु छक्वः मूभि स्वयेगु जुया च्वन यानि की जि सिनेमाया संसारं पिहाँ मवया । फिल्मला न्हिं निगु स्वंगु नं स्वया , मेबलें नं स्वया । विशेष याना छुं अवार्डया जुरी च्वनेबले न्हिं स्वंगुतक फिल्म स्वयेगु धइगु सामान्य खँसा नं जिगु मू ज्या फिल्म स्वयेगु हे खः । थ्व लकडाउनं भचा अप्वः हे थुखेपाखे नुगः क्वसायेके माला च्वंगु दुु । 

नेवाः अनलाईनन्युजया निंतिं छगुबागु न्यूज छेँय्नं पोस्ट याना याना च्वनागु धाःसा उखुनु छगु प्रोजेक्टया निंतिं छगु सतक नाटकयात नेवाः भाषं भाय् हिलेगु ज्या नं वल । व ज्या नं थ्व लकडाउनया ईलय् क्वचायेका बिया । म्हिगः मंगलबार तिनि क्वचायेका ईमेल याना छ्वया । आः धाःसा छगु सफु च्वयेगु तयारी याना च्वनागु दु । थ्व लकडाउनया ईलय् थःयात थुकथं सकृय यायेगु कुतः याना च्वनागु दु । अय्सां मन उलि चं चं मधा । छाय्धाःसा न्हापा गुबले अथें ईलँ चिका च्वने मनं । गुबलें गन गुबलें वना हे च्वनेगु बानी । आः छेँय्या अंगः दुने तुं च्वनेमाबले भतिचाला थाकुया च्वंगु दु तर थः , थःगु परिवार व सकलसित सुरक्षित याना तयेगु निंतिं लकडाउनला पालना यायेमाःगु हे जुल । याना च्वनागु दु ।

(बरिष्ठ पत्रकार लिसें संकिपा निर्देशक लिसें साहित्यकार बिजयरत्न असंवरे लिसें जुगु खँल्हाबल्हाया लिधंसाय् –स.)

Categorized in बिचा: