city axpris 2

सदावहार गायक योगेश वैद्यया म्हसिका

नेवा: अनलाइन न्युज – निश्चल | २०८० माघ २०, शनिबार १३:२८:४३

वरिष्ठ गायक लिसें संगीतकार योगेश वैद्ययात नेपालभाषा व खस नेपाली भाय्या छम्ह सदावहार गायकया रूपय् कायेगु याः । वय्कलं नेपाःया संगीत ख्यलय् लगातार खुगू दशक म्ये हालेगु व संगीत तयेगु ज्या यानाः थ्व ख्यःयात ज्वःमदुगु योगदान बियादीगु दु । 

योगेश वैद्य वि।सं। २००३ सालया नागपञ्चमी कुन्हु येँया ङत त्वालय् जन्म जुयादीम्ह खः । वय्कः ताःई तक थ्वहे त्वालय् च्वनाः ब्वलनादिल । वय्कःया अबु इन्दिरानन्द वैद्य खःसा मां रुकमिणी वैद्य खः ।   

वय्कलं न्हापांखुसी म्ये हालादीगु वि।सं। २०१४ सालय् खः । स्कुलपाखें याःगु औपचारिक सांस्कृतिक ज्याझ्वलय् वय्कलं “पुरुष नारी दिवस रजनी साथ नै यूग  भर्दछन्” धाःगु म्ये हालाः संगीत ख्यलय् पलाः तयादीगु खः । उगु म्येया रचनाकार युगकवि सिद्धिचरण श्रेष्ठ खःसा संगीतकार दर्शनदास श्रेष्ठ खः । थ्व म्येयात लिपा संगीतप्रवीण नरराज ढकालं हानं संगीतवद्ध यानादिल । गुगु लिपा वनाः स्कूलया प्रार्थना म्ये जू वन । थ्वहे मौकाय् वय्कलं करिब दछि तक नरराज ढकाल नाप च्वनाः संगीतया प्रशिक्षण नं काये खन । संगीतया ज्ञान दयेधुंकाः वय्कलं थःगु रचनाय् थम्हं हे लय तयाः हालादीगु न्हापांगु म्ये धाःसा नेपालभाषाया ‘व वै तिनि, अनुरागया स्वां ह्वै तिनि’ खः । 

वय्कःया रेकर्ड जूगु न्हापांगु म्ये चाहिँ किरण खरेलया खँग्वः व नातिकाजीं संगीत तयादीगु म्ये ‘कति प्यासी छ जिन्दगी’ खः । थ्व वि।सं। २०२५ सालय् रेकर्ड जूगु खः । वय्कःया रेकर्ड जूगु नेपालभाषाया न्हापांगु म्ये दुर्गालाल श्रेष्ठं च्वयादीगु ‘छ न्हूगु छेँय् छन्हु वनी तिनि’ खः । थुकी संगीत वय्कः थम्हं हे तयादीगु खः । 

वि।सं। २०२८ सालया अखिल नेपाल राष्ट्रिय गीत प्रतियोगिताय् नातिकाजीं संगीत तयाः मबीबि शाहं च्वयाः वय्कलं हालादीगु म्ये “नेपाल मेरो तिमीलाई” गीत गायनय् न्हाप लाःगु खः । वयां लिपा रेडियो नेपाल व रत्न रेकर्डिङ्ग संस्थानपाखें म्ये रेकर्ड यानाः प्रसारण जुइवं वय्कःया यक्वं म्ये लोकंह्वात । थ्वहे झ्वलय् २०४४ सालय् रेकर्ड जुयाः रेडियो नेपालं प्रसारण याःगु शिव अधिकारीया खँग्वः व नातिकाजीया संगीत दुगु म्ये “सपना भुलाई सारा” चर्चाया च्वकाय् हे थ्यन । खस नेपाली भाषाय् वय्कलं हालादीगु ‘माटो भन्नु मुटु रैछ’, ‘चोट दिलमै रात दिन’, ‘आँखैमा रात गली’, ‘अलिकति तिमी अभिमान छोड’, ‘मेरो आँशुमा नहाँसे’, ‘यो लामो जीवनमा’ विशेष कथं लोकंह्वाः । 

अथे हे नेपालभाषाय् ‘जय नमःश्री बुद्ध भगवान।।’ वय्कःया अतिकं चर्चित म्ये खः । थ्व बाहेक वय्कःया ‘वा माया वा वा’, ‘असारया सिन्हाज्या’, ‘छं मिखा पर्लक्क चायेकाः’, ‘क्यब दु स्वां दु’, ‘जिमि यःम्ह थौं जिथाय् वै’, ‘सःति रे छं जितः’, ‘राग मि नुगलय्’, ‘सितला माजु’ विशेष कथं लोकंह्वाः । वय्कलं थःगु जीवनय् थम्हं हे लय तयाः हालादीगु अन्तिम म्ये कवि पूर्ण वैद्यया ‘जि बाः वैगु खुसि खः’ खः । थ्वहे नामं म्येचाः नं पिहां वःगु दु । 

वय्कःया ‘समय प्रवाहमा छुटेका पलहरु’ कविता संग्रह व उकिया हे वाचन सिडी पिहां वःगु दुसा म्येयागु एल्बम ‘मर्म’, ‘उनलाई सम्झिँदा’, ‘एक्लो मन एक्लो लगन’, ‘यो लामो जीवनमा’, ‘को आफ्नो को पराया’ व रीता महर्जनया सलय् वय्कःया संगीत दुगु ‘यो साँझको मधुरिम छटामा’ पिहां वःगु दु । अथे हे नेपालभाषां ‘देछा’ व ‘फरगटन मेलोडिज’ म्येचाः पिहां वःगु दु । वय्कःया एकल संगीतय् ‘रिताआय्ट हर वेष्ट’ म्येचाः पिहां वःगु दु । थ्व बाहेक मेमेगु नं आपालं सिडी एल्बमय् वय्कःया म्ये दुथ्यानाच्वंगु दु । 

वय्कःया नेपाली भाषाया बाखं मुना ‘चियाको चुस्कि’, कविता मुना ‘उच्छवास’ पिथनेगु तयारी जुयाच्वंगु दु । किपूया शुकराम महर्जनं च्वयादीगु थीथी म्येयात वय्कलं लय तयाः छगू एल्बम हे तयार यानादीगु दु । व नं याकनं पिदनीगु तयारी दु । वय्कःया नेपालभाषा व नेपाली भाषाय् यानाः करिब ५५० पु म्ये रेकर्ड जुयाच्वंगु दु । उकी नेपालभाषाया म्ये सछिपु स्वयां अप्वः दुथ्याः । जनकवि दुर्गालाल श्रेष्ठया कविता मुना ‘गिजिमिजि ध्वः’ यात वय्कलं अंग्रेजीं अनुवाद यानादीगु खःसा मेगु छगू सफू नं अनुवाद यानादीगु दु । वय्कलं नेपालभाषाय् अप्वः यानाः दुर्गालाल श्रेष्ठ, भूषणप्रसाद श्रेष्ठ आदिपिनि म्ये हालादीगु दु ।  

वय्कः सुप्रवल गोर्खा दक्षिण बाहु ९तेस्रो०, त्रिशक्ति पट्ट ९तृतीय०, छिन्नलता गीति पुरस्कार, रियाज संगीत सम्मान, ईमेज लाईफ टाईम सम्मान, नातिकाजी संगीत सम्मान, नारायण गोपाल संगीत सम्मान, धुस्वां साय्मि सिर्जना पुरस्कार आदि लगायत आपालं सिरपाः व सम्मानपाखें सम्मानित जुयादीधुंकूगु दु । अथे हे नेपाल स्वर संगठन, नेपाल सांगीतिक संघ, नातिकाजी संगीत समाज आदि संगीत सम्बन्धी थीथी संस्थाय् नं वय्कः संलग्न जुयादी । 

वय्कः वनस्पति शास्त्रया विज्ञ नं जुयादी । वय्कलं त्रिविविपाखें वनस्पति शास्त्रय् एमएससी यानादीगु दुसा बेल्जियमया गेन्ट राज्य विश्वविद्यालयपाखें खाद्य विज्ञान तथा पोषण विषयय् स्नातकोत्तर यानादीगु दु । वय्कः सरकारी सेवाय् सहसचिव तक जुयाः सेवानिवृत्त जुयादीगु खः ।

वंगु ने.सं. ११४४ पोहेलागा अष्टमि ९वि।सं। २०८० माघ ४ गते कुन्हु चान्हय् वय्कः आकाझाकां मंत ।

(ने.सं. ११४४ पोहेलागा ८ (२०८० माघ २० गते ) शनिवाः नेवाः देय् दबू, नेपालभाषा मंकाः खलः, नेपालभाषा एकेडेमि व नेपाल संवत् राष्ट्रिय न्हूदँ समारोह समितिया ग्वसालय् जुगु झी जनगायक भृगुराम श्रेष्ठ व सदावहार गायक योगेश वैद्यया लुमंतिइ जुगु बिचाः मुज्याय् इना ब्यूगु म्हसिका पौं  पाखें)

 

 

 

 

Categorized in कला