city axpris 2

सत्यनारायण बहादुर श्रेष्ठ स्मृति मिडिया कप फुटसल सोमबार जुइगु

नेवा: अनलाइन न्युज – विजयरत्न | २०८० पौष ८, आइतबार ११:५२:१६

नेवाः पत्रकार राष्ट्रिय दबूया ग्वसालय् नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया १०८ क्वःगु जन्मजयन्ती हनेगु झ्वलय् थिंलाथ्व चतुर्दशी , पुस ९ गते सोमबार छगू फुटसल कासा जुइगु जूगु दु ।

ग्वसाः खलकं जानकारी बिउकथं उगु कासाय् मुक्कं च्यागु टिमं ब्वति काइगु जूगु दु ।

सत्यनारायण बहादुर श्रेष्ठ स्मृति मिडिया कप फुटसल धकाः नां छुनातःगु थ्व कासा यल मानभवनय् च्वंगु एभीएम स्कूलय्  च्याता इलय् न्ह्याइगु व न्हिन्हसिया झिंनिता ई दुने  क्वचायेकीगु ग्वसाः जुयाच्वंगु दु ।

नेवाः पत्रकार राष्ट्रिय दबूया ग्वसालय् जुइगु कासाय् सुरेन्द्रभक्त श्रेष्ठ कप्तान दूगु नेवाः पत्रकार राष्ट्रिय दबू केन्द्रीय कार्यसमिति टिम, गजुरधन राई कप्तान दूगु नेपाल आदिवासी जनजाति पत्रकार महासंघ, फोनिज, सुरेन्द्र तुलाधर कप्तान दूगु नेवाः कलाकार मिजं टिम, भिन्तुना जोशी कप्तान दूगु नेवाः कलाकार मिसा टिम, सगरमाथा आरोही कल्पना महर्जन कप्तान दूगु मिसा  पत्रकार टिम, बि.के. जल्मी कप्तान दूगु नेवाः पत्रकार राष्ट्रिय दबू यल टिम, अभिनव जोशी कप्तान दूगु नेवाः पत्रकार राष्ट्रिय दबू येँ टिम व अनुज जोशी कप्तान दूगु नेवाः पत्रकार राष्ट्रिय दबू चितवन टिम दुथ्याना च्वंगु खँ फुटसल कासाया संयोजक प्रजित शाक्यं जानकारी बियादीगु दु ।  

अथेहेतुं सत्यनारायण बहादुर श्रेष्ठ १०८ क्वःगु जन्मजयन्ती  ज्याझ्वः संयोजक राजु नापितं जानकारी बियादीकथं नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठको जन्मजयन्ती ज्याझ्वः ११४४ थिंलागा द्वितीया (२०८० पुस १३ गते शुक्रवाः) जुइगु जूगु दु ।

Categorized in कासा