nepal investment baink

सत्यनारायण बहादुर श्रेष्ठ स्मृति कप फुटसलय् चितवन च्याम्पियन

नेवा: अनलाइन न्युज – विजयरत्न | २०८० पौष १०, मंगलबार ११:३०:२९

नेपाल पत्रकार महासंघया संस्थापक नायः सत्यनारायण बहादुर श्रेष्ठया सच्छि व च्याक्वःगु बुन्हिया लसताय् नेवाः पत्रकार राष्ट्रिय दबूया ग्वसालय् सत्यनारायण बहादुर श्रेष्ठ स्मृति कप फुटसल जूगु दु । नेवाः पत्रकार, आदिवासी जनजाति पत्रकार व नेवाः कलाकारतय् दथुइ जूगु फुटसलय् नेवाः पत्रकार राष्ट्रिय दबू चितवन शाखा च्याम्पियन घोषित जुल । अथेहे, दबूया येँ शाखा ल्यू व नेवाः कलाकार टिम लियांल्यू लाःगु खः ।

थ्वहे झ्वलय् नेवाः मिसा पत्रकार व नेवाः मिसा कलाकार दथुइ जूगु मैत्रीपूर्ण कासाय् पत्रकार टिम त्याःगु दु । धेंधेंबल्लाःया फाइनलय् चितवन शाखां येँ शाखायात ८–४ गोलं बुकूगु खः । थ्वयां न्ह्यः जूगु समूह चरणया कासाय् चितवनं नेपाल आदिवासी पत्रकार महासंघ (फोनिज) व येँ जिल्लायात बुकाः सेमिफाइनलय् वंगु खःसा येँ जिल्लां फोनिजयात बुकाः सेमिफाइनलय् थाय् दयेकूगु खः ।

अथेहे कलाकार टिमं पत्रकार दबू केन्द्र व यल जिल्लायात बुकाः सेमिफाइनलय् थाय् दयेकूगु खःसा पत्रकार दबू केन्द्रं यल जिल्लायात बुकाः सेमिफाइनलय् दुहां वंगु खः ।

कलाकार टिम व येँ जिल्ला दथुइ जूगु न्हापांगु सेमिफाइनल कासाय् येँ जिल्लां ६–२ गोलं त्याकुसें फाइनलय् थाय् दयेकूगु खःसा निगू सेमिफाइनलय् चितवनं केन्द्रयात ५–१ गोलं बुकुसें सेमिफाइनलय् थाय् दयेकूगु खः ।

कासा लिपा जूगु छगू ज्याझ्वःया दथुइ यल महानगरपालिकाया उपमेयर मञ्जली शाक्यं धेंधेंबल्लाखय् सहभागीपिंत दसिपौ लःल्हानादीगु खः । ज्याझ्वःया उलेज्या यल महानगरपालिका ५ वडाया नायः विकासमान श्रेष्ठं यानादीगु खः । धेंधेंबल्लाखय् त्याःपिंत सत्यनारायण बहादुर श्रेष्ठया स्मृति दिवस खुन्हु पुस १३ गते जुइगु ज्याझ्वलय् कप व मेडल लःल्हायेगु ग्वसाः दूगु खँ दबूया केन्द्रिय नायः नृपेन्द्रलाल श्रेष्ठं जानकारी बियादीगु दु ।

Categorized in कासा