नेवा: अनलाइन न्युज | २०८० भाद्र २९, शुक्रबार ११:४७:१२

जनकपुरधामय् सतक निर्माणया झ्वलय् ठेकेदारं खुल्ला रुपं त्वःतातःगु गालय् कुतुंवनाः छम्ह मचा सीगु दु ।

जनकपुरधाम उपमहानगरपालिका २५ लोहनाया हजाम त्वाःया रंजित मुखियाया निदँ दुम्ह काय् रोहन मुखिया गालय् कुतुंवनाः सीगु खः ।

शुक्रवाः सुथय् ६ः३० ता इलय् दनाः वनाः म्हिताच्वंम्ह रोहन छेँ न्ह्यःनेया सतकय् खुला रुपं त्वःतातःगु चेम्बरय् कुतुंवंगु खः । छेँजःया दुजःपिनसं मालाः स्वःबलय् रोहन गालय् लुयावःगु खः ।

छ्यं क्वय् व तुति च्वय्छकूसा खनेदूगु अवस्थाय् रोहनयात लुइकूगु व गालं लिकाःबलय् रोहन सीधुंकूगु स्थानीय अमृता मण्डलं जानकारी ब्यूगु दु ।

स्थानीय नथुनी मण्डलया कथं मधेश प्रदेश सरकारया बजेटय् निदँ न्ह्यः ढलान जूगु सतकय् धःया नितिं दयेकूगु चेम्बरय् पुसा तयातःगु मदु ।

ठेकेदार व उपमहानगरपालिकायात तःक्वःमछि पुसा तयेत इनाप याःसां नं आःतक मतःगु व उकी कुतुंवनाः मचात सीगुजुयाच्वंगु स्थानीयपिनिगु धापू दु ।

शुक्रवाः सुथय् निदँ दुम्ह मचा रोहनया उगु हे गालय् कुतुंवनाः सीधुंकाः स्थानीयबासीपिं आक्रोशित जुयाच्वंगु दु ।

Categorized in दुर्घटना-अपराध