zero media family planning adv

सडक ! सडक ! सडक ! थौंतक नं सडक ः पद्मरत्न

नेपाःया राजनीतिक ख्यलय् छम्ह हनेबहःम्ह व्यक्तित्वकथं धस्वानाच्वनादीम्ह आदिवासी जनजाति राष्ट्रिय आन्दोलन नेपालया नायःलिसें नेवाः न्ह्यलुवा पद्मरत्न तुलाधरं छुं ई न्ह्यः एकीकृत माओवादी पार्टी त्याग यानाः न्हू शक्ति दयेकेगु अभियानय् न्ह्यानाच्वंम्ह डा. बाबुराम भट्टराईयात जनताया आशा पूवंकेत इनाप यानादीगु दु ।
वय्कलं डा. भट्टराईपाखें न्ह्याकेत्यंगु अभियानया प्रशिक्षण बीगु तातुनाः आइतवाः ग्वसाःग्वःगु ज्याझ्वलय् थः २००७ सालनिसें निरन्तर संघर्षय् दुगु खँ न्ह्यथनादिसें नेपाःमि जनताया मुक्ति हे थःगु मू तातुना जूगु खँ धयादीगु दु ।
 वीर वीपी, वीर गणेशमान, कांग्रेस, कम्युनिष्ट वा माओवादी सुनां नं जनताया ईच्छा आकांक्षात पूवंके मफुगु धासें वय्कलं आः देसय् न्हूगु शक्ति माःगु धयादिल । वय्कलं बियादीगु न्वचु थन न्ह्यब्वयाच्वना ः

 जि २००७ सालय् १० दँ दुम्ह मचा खः । सडकय् चारतारे झण्डा जिन्दावाद, वीर गणेशमान जिन्दावाद, वीर वीपी जिन्दावाद धकाः सडकय् ब्वाँय् वनागु आःतक लुमंनि । उकथं हे त्रिभुवन जुजु भारतय् निर्वासित जुयादीगु खः । वय्कः लिहाँ झाःगु इलय् व गौचरन एयरपोर्टय् द्वलंद्वः येँयापिं थ्यंगु खः । आः नं व धुलं गःगु सडकया लुमन्ति वः नि ।

 
व इलय्निसेंया म्हगस, नेपालय् प्रजातन्त्र वइ, परिर्वतन वइ धइगु म्हगस यक्व यक्व जनतां म्हंकूगु खः । आः न्हूगु दइगु जुल, देशय् विकास जुइगु जुल धइगु तायेका । तर, व क्रान्ति सम्झौताय् क्वचाल, मोहनसमसेर प्रधानमन्त्री जुल । अले, वीर धाःपिं वीपी, गणेशमान गन–गन थ्यन ।

विसं.२०१५ सालय् चुनाव जुइ, हाकनं छगू आशा । सर्वप्रथम निर्वाचित सरकार धकाः वइ, छु छु न जुइ थें । छुं जुइमखु अले हाकनं नं जनता निराश–निराश जुइ । ०४६ सालतक थ्यंबलय् नं थन उपस्थित यक्व नागरिक समाज दी, झी सकलें–सकलें सतकय् दुगु खः । तःधंगु ऐतिहासिक घटना खः । धात्थेंया अर्थय् जनता आन्दोलनय्, लाखौंलाख जनता सडकय् कुहाँवःगु, यक्व यक्वसिनं बलिदान याःगु खः ।

उबलय् झीगु आशा दुगु खः, आः धात्थेंया मानेय् झीगु देसय् परिवर्तन वइ । तर, व नं सम्झौताय् क्वचाल । राष्ट्रिय पञ्चायत भङ्ग मजूनिबलय् बहुदलीय व्यवस्थाया घोषणा जुइ, सम्झौता जुइ अले टुँडिखेलय् आमसभा जुइ । अले, जि नं वक्ता जुइ । अनं जिं राष्ट्रिय पञ्चायतया सदस्यतापाखें राजीनामा बियागु खः । तर, व धुंकाः नं गथे खः अथे हे जुइ । आदिवासी जनजाति, मधेसी, महिला, मजदुर फुक्क उत्पीडन, शोषणय् दइ ।
 
राजनीतिक परिर्वतन वइ, सत्ता परिर्वतन जुइ । तर, प्रशासन संयन्त्र गथे खः अथेहे । सेना गथे खः अथेहे, प्रहरीतन्त्र गथे खः अथेहे । गनं छुं परिर्वतन मवइगु । समाज गथे खः अथेहे, धर्मया अन्धविश्वासपाखें प्रभावित जनता गथे खः अथेहे ।
विसं. ०६२÷६३ वइ, हाकनं नं लाखौं लाख जनता सडकय् कुहाँ वइ, वलिदानी बी अले तःधंगु परिर्वतन वइ । जनयुद्ध क्वचाःगु घोषणा जुइ,  हाकनं नं आशा, विश्वास सपना दुगु खः । आः छगू धात्थेंया मानेय् क्रान्ति जुइ धइगु तःधंगु आशा विश्वास दुगु खः । जि नं उपिं मध्ये छम्ह खः ।

जि गुबलें गुगुं पार्टीया दुजः मजुया । तर, नेपालय् परिर्वतन हइ धकाः गुबलें मालेयात, गुबलें एमालेयात, गुबलें एमाओवादीयात गुबलें सुयात ग्वाहालि व  समर्थन यासें आन्दोलनय् न्ह्यज्याना । सडक ! सडक ! सडक ! थौंतक नं आदिवासी जनजाति आन्दोलन, मधेस आन्दोलनया सिलसिलाय् जि सडकय् हे दु ।
छुं दँ न्ह्यः नेपालय् कांग्रेसं नं मफुत अले कम्युनिष्टं नं मफुत । खास यानाः ०६२÷०६३ या आन्दोलन पश्चात वा जनयुद्ध सम्झौताय् क्वचाये धुंकाः जनतां हे संविधान च्वइगु विश्वासया लिसें आः परिर्वतन वइ धाधां हे व परिर्वतन वये धुंकाः नं जिगु विचारय् छुं दँनिसें जनता छलफलय् दु ।
नेपालय् आः न्हू शक्ति माः, स्वंगूगु शक्ति माः अले न्हूगु राजनीतिक पार्टी माः । उकिं जिगु बिचारय् थ्व न्हूगु शक्ति धइगु अभियान बाबुराम डाक्टर सा’बं न्ह्याकादीगु दु, अथवा छि जिं न्ह्याकागु दु, थ्व तसकं हे गम्भीरतां न्ह्याकेमाः ।
 
गथे थौं हे सभा सञ्चालन न्हूगु तरिकां जूगु दु । तर, माफ याना दिसँ जि तसकं हे उत्साहित जुइ । तर, मेगु   घटना जुइ, उत्साह घटे जुइ । गनं गुबलें नं १ बजे मिटिङ धकाः सःते,  २ बजे थ्यंकः वये । छलफल याये अले निर्णय ५ मिनेटय् जुइ । थ्व गुबले त्वाःथलेगु ? उकिं न्हूगु शक्ति छुकिया निंतिं ? न्हूगु नेपाः निर्माणया लागि ।
न्हूगु शक्ति छुकिया निंतिं ? मधेसी जनताया मुक्तिया निंतिं, जनजातितय्गु मुक्तिया लागि, किसान मजदुरतय्गु मुक्तिया लागि । मुक्तिया लागि धकाः तःधंगु जोस, जाँगरया लिसें व प्रतिवद्ध जुयाः थ्व न्हूगु शक्ति निर्माण जुल धाःसा जिगु विचारय् व न्हूगु शक्तिं जक न्हूगु, स्वाधीन स्वतन्त्र राष्ट्रया रुपय् दनेफइगु स्थिति ब्वलनी ।

सकल नेपाली जनता, जाति–जातितय्गु देय् खः । १२५ जातितय्गु देय् खः । २३ गू भाषाभाषीपिनगिु देय्यात छगू स्वांक्यब (फूलबारी)या रुपय् निर्माण यायेत माःगु धइगु न्हूगु शक्ति खः । व न्हूगु शक्ति, व न्हूगु पार्टी जुइ ला । तर, जिगु विचारय् समाजिक शक्ति जुइमाः, सांस्कृतिक शक्ति जुइमाः व म्हिगःया फुक्क विकृति विसंगतितय्त ध्वस्त याइगु शक्तिया निर्माण यायेमाः । जिं डाक्टरसा’ब लगायत सकसितं भिंतुना देछाये ।