prabhu baink new

सडक विस्तारया नामय् सोर्हखुट्टे चट्

न्हापाया सोर्हखुट्टे

–रेखा शाक्य

येँया सडक तब्याकेगु नामय् थन गुलिसिया छेँ दुन, अले व मध्ये गुलिसिया छेँबुँ मदयेकाः च्वनेमाल धइगु खँया ल्याःचाः सखे सुनां तःगु नं मदु जुइफु । सडक तब्याः यायेगु नामय् मनूतय्गु छेँ ला दुन दुन । आः येँ दुनेया ऐतिहासिक सम्पदा नं नष्ट जुयावनीगु संकेत खनेदत येँया ऐतिहासिक फल्चा सो¥हखुट्टेपाखें ।
छि थौंकन्हय्या दुने नयाँ बजार, सो¥हखुट्टेपाखे थ्यन कि मथ्यंनि ? मथ्यनीगु खःसा सीकादिसँ आः अनया ऐतिहासिक सो¥हखुट्टे मदयेधुंकल । अनया सो¥हखुट्टे फल्चायात पूवंक हे थुना छ्वयेधुंकल, सडक तब्या यायेगु नामय् ।

न्हापा सोर्हखुट्टे दुगु थाय्
न्हापा न्हापायापिं नेवाःतय्सं तापाक तापाक वनेमाःपिनि लँय् दथुइ झासु लनेमाःसा वा बाय् च्वनेमाःसा थाय्थासय् फल्चा दयेकेगु यानातःगु खः । नापनापं उज्वःगु गुलि फल्चा ला धार्मिक वा सांस्कृतिक ज्याखँ न्ह्याकेगु नितिं नं छ्यलाच्वंगु दइ । गुलिगुलिं फल्चाय् ला थौंया दिनय् नं दाफा भजन जुइगु याः ।
उकथं हे समाजयात थीथी कथं ग्वाहालि जुइमा धइगु ल्याखं हे सो¥हखुट्टे फल्चा नं दयेकातःगु खः । थुगु फल्चा थ्यंमथ्यं २००दँ न्ह्यः कपरदार भोटु पाण्डें दयेकूगु थुगु फल्चा न्हापा न्हापा आपाःसिगु नितिं तापाकं तापाकं येँय् घ्यःचिकं, चि आदि म्यूवइपिनिगु नितिं, ताःहाकःगु यात्राया नितिं पिहांवःपिनिगु नितिं बाय् च्वनेत, झासु लनेत ग्वाहालि जुल खइ । उगु फल्चाय् बाय् च्वना धाइपिं मनूत थौं नं ल्यं दनि ।
केरुङया युद्धय् वंम्ह भोटु पाण्डे उखे हे बेहोस जूबलय् बुयाः येँय् थ्यंकेहल । अले पाण्डेयात व हे सो¥हखुट्टे पाटि दुगु थासय् तयेहःगु अले अन हे वय्कःया होस वःगु जूगुलिं पाण्डें व हे लुमन्तिया चिं कथं अन उगु फल्चा दयेकूगु खः । उलि जक मखु, व फल्चा दयेकेगुलिसें पाण्डें फल्चा जःखः यक्व हे जग्गा दान नं यानाब्यूगु खः । न्हापा मल्लकालीन बास्तुशैलीइ दयेकातःगु फल्चा बि.सं. १८६४इ पुनःनिर्माण जूगु खः ।
आः उगु फल्चा थुनाः मेगु हे थासय् दयेकेगु धाःगु दु । न्हापा फल्चा दुगु हे थाय्या लिक्क बृद्धाश्रम दुगु थाय्पाखे हे सो¥हखुट्टे पाटि दयेकेगु खँ धाःगु दु । आः न्हूगु थासय् २१ लख तकाया लागतय् सो¥हखुट्टे फल्चा दयेकीगु खँ वयाच्वंगु दु ।
तर न्हापा सो¥हखुट्टे फल्चा दुगु थासय् गुगु इतिहास स्वानाच्वंगु दु, न्हूगु थासय् फल्चा तयेयंके धुंकाः उगु इतिहास म्वानाच्वने फइला ? फल्चाया थाय् हिलावंथें इतिहास नं हिलावनी मखु धायेफइला ? उलि जक मखु, विकास निर्माणया ज्या येँय् दुने जक केन्द्रित यानाः आः येँया जनघनत्व जक अप्वयेकेगु ज्या जुयाच्वंगु दु । व ल्याखं आःया तब्यागु सडक नं कन्हय् वनाः मगानावनी । व सडक नं चिब्या थें तायावइ । अले हाकनं सो¥हखुट्टे फल्चा थुनाः मेथाय् तये यंकेगु ला, सडक तब्या यायेगु नामय् ?

सोर्हखुट्टे फल्चा थुनेधुंकाः न्हापा फल्चा दुगु थाय्