nepal investment baink

सजिलमान शाक्ययात वासः यायेगु नितिं बैंककया डाक्टरपिंनाप सहलह याइगु

नेवा: अनलाइन न्युज – ललेन्द्र शाक्य | ने.सं. ११४४ पोहेलागा द्वादसी

स्क्वायर होटलय् वंगु भाद्र १५ गते स्वीमिङ पुलय् करेन्टं ज्वनाः तच्वकं घाःपाः जूम्ह सजिलमान शाक्ययात थप वासः यायेगु नितिं बैंककय् न्यूरो स्पेशलिष्ट डाक्टरपिं नाप सहलह याइगु जूगु दु ।

सजिलमान शाक्यया अबु पुष्करमान शाक्यं बियादीगु जानकारी कथं वय्कः वइगु आइतवाः बैकक वनीगु जूगु दु ।

पुष्करमान शाक्यं नेपालय् अन्नपूर्ण न्यूरो अस्पतालया नांजाःम्ह डाक्टर बसन्त पन्तं थः काय्या वासः यानाच्वंगु जानकारी बियादिसें थप वासः यायेगु नितिं बैंककय् बांलाःपिं डाक्टर दूगुलिं नेपालय् आःतक यानाच्वनागु वासःया भ्वँ ज्वनाः सहलह यायेगु नितिं थःपिं वनेत्यनागु खँ कनादीगु दु ।

सजिलमान शाक्य भाद्र १५ गते करेन्टं ज्वनाः घाःपाः जुइवं लच्छि यलया मेडिसिटी अस्पतालय् वासः याकूगु खःसा वया लिपा अन्नपूर्ण न्यूरो अस्पतालय् निला वासः यायेत भर्ना जूगु खः । थ्वया लिपा शाक्यया उसाँय् विचाः याः कथं प्रगति मजूगुलिं थौंकन्हय् छेँय् हे तयाः वासः यानाच्वंगु खः ।

चिकित्सकपिन्सं करेन्टं ज्वंगु हुनिं शाक्यया छ्यनय् च्वंगु नसाय् समस्या वःगु खँ धाःगु दु । शाक्यया स्वास्थ्य स्थिति थौंकन्हय् कोमाय् लानाच्वंगु अवस्थाय् दु ।

म्हिगः मंगलवाः सजिलमान शाक्यया न्यायया नितिं नीस्वंगु संघर्ष समितिं मंगलबजारय् बृहत्त शान्ति जुलुस पिकाःगु खः । अथेहे, म्हीग सोमवाः स्क्वायर होटलया व्यवस्थापक रोमी आचार्यं थ्व घटनायात कयाः थःपिं स्वयं यल प्रहरी ज्याकुथिइ वनाः आत्मसमर्पण याःगु खः ।

स्क्वायर होटलय् जूगु लापरवाहीया हुनिं घाःपाः जूम्ह सजिलमान शाक्यपाखें अदालतय् होटलयात विपक्ष दयेकाः ज्यान कायेगु उद्योगया मुद्दा दर्ता यायेधुंकूगु दु ।

Categorized in नेवाः