city axpris 2

सजिलमान शाक्ययात न्याय बिइत येँया नेवाःत यलध्वाखाय् मुनीगु

नेवा: अनलाइन न्युज – ललेन्द्र शाक्य | २०८० माघ २२, सोमबार १२:४७:१८

यलया पूच्वय् च्वंगु स्क्वायर होटलय् वंगु भाद्र १५ गते स्वीमिङ पुलय् करन्टं ज्वनाः घाःपाः जूम्ह सजिलमान शाक्ययात न्याय बिइत व दोषीयात कारवाही यायेगु माग यासें जुइगु ज्याझ्वलय् येँया नेवाः अभियन्तापिन्सं ब्वति काइगु जूगु दु ।

कन्हय् माघ २३ गते मंगलवाः सुथय् ११ ता इलय् जुइगु शान्ति पूर्ण जुलुसय् ब्वति कायेत येँया नेवाःत यलया यलध्वाखाय् सुथसिया १०ः३० ता इलय् मुनाः मंगलबजारय् वनीगु जूगु दु ।

थौं सोमवाः सुथय् येँया नेपाः ब्यांक्वेटय् जूगु नेवाः अभियन्तापिनिगु मुँज्यां थथे ज्याझ्वलय् ब्वति कायेगु निर्णय याःगु खः ।

थौं जूगु उगु मुँज्याय्बागमती प्रदेश सांसद शैलेन्द्रमान बज्राचार्य,  नेवाः देय् दबूया नायः पवित्र बज्राचार्य व दबूया न्वकू उमेश स्थापित, ज्यापु महागुथिया नायः सत्यनारायण डंगोल, शाक्य फाउण्डेशनया नायः राजकाजी शाक्य, नेवाः अभियन्तापिं सुजीव बज्राचार्य, ज्योति शाक्य, गणपतिलाल श्रेष्ठ, सुमन सायमि, मचाराजा महर्जनलिसें थीथी अभियन्तापिं उपस्थित जूगु खः ।

मुँज्याय् घाःपाः जुयाः कोमा लानाच्वंम्ह सजिलमान शाक्यया अबु पुष्करमान शाक्य व सजिलमान शाक्यया किजां कन्हय् मंगलवाः जुइगु शान्ति पूर्ण प्रदर्शनय् ब्वति कायेत येँया सकल नेवाःपिन्त इनाप यासें उगु घटनायात कयाः जानकारी बियादीगु खः ।

Categorized in नेवाः