सक्वया भाषासेवी ई. राजदास श्रेष्ठया अन्तिम संस्कार क्वचाल
नेवा: अनलाइन न्युज – ललेन्द्र शाक्य | ने.सं. ११४४ चिल्लागा तृतीया (२०८० चैत्र १५ गते) बिहिवाः
सक्वया भाषासेवी ई. राजदास श्रेष्ठया अन्तिम संस्कार पशुपति दिपय् क्वचाःगु दु ।
वय्कः थौं बिहिवाः सुथय् वासः यायेगु झ्वलय् सक्वया सुष्मा मेमोरियल अस्पतालय् मदुगु खः ।
मदुम्ह श्रेष्ठया अन्तिम संस्कार वय्कःया तःधिकःम्ह काय् नं याःगु खः ।
दिपय् अन्तिम श्रद्धाञ्जलि देछायेगु नितिं नेपाल मजदुर किसान पार्टीया सांसद प्रेम सुवाल, नेवाः न्ह्यलुवाः मल्ल के सुन्दरलिसें सक्वया भाषिक कार्यकर्तापिं उपस्थित जूगु खः ।
भाजु श्रेष्ठ ७६ दँ दुम्ह खः । पारिवारिक सूत्रं धाःकथं वंगु चैत्र ७ गते सुथय् वय्कलं विष सेवन यानादीगु खः । वयां लिपा अशक्त जूम्ह वयकःयात अस्पताल भर्ना याःगु खः । अस्पताल भर्ना यासांनिसें वयकः अचेत जुयादीगु खःसा बेहासी अवस्थाय् हे वयकः मदुगु खँ धाःगु दु ।
वयकलं विष सेवन याःगुया हुनि धाःसा सी मदुनि । प्रहरीं वयकःया छेँय् छानबिन याःगु व अन वयकःया सुसाइड नोट नं लूगु खँ धाःगु दु । प्रहरीं उकिया विवरण धाःसा बिउगु मदुनि ।
वयकःलिसे सतीपिं भाषिक कार्यकर्तापिन्सं धाःकथं वंगु छुं ई न्ह्यवंनिसें वयकलं थःत आर्थिक समस्या जूगु खँ कनेगु यानादीगु खः । उकिया लागिं वयकलं थःगु जग्गा मीगु नं कुतः यानादीगु खः ।
छुं दँ न्ह्यवंनिसें वयकः सक्वया छेँ त्वःताः चौकी भञ्ज्याङ धाःगु थासय् एकान्त व रमणीय छेँ दनाः च्वनेगु यानादीगु खः । स्वीमिङ पुल तकं दुगु व प्यखेरं कृषि यानातःगु उगु छेँय् वयकलं नेपालभाषाया साहित्यकारपिन्त नं इलय् ब्यलय् ब्वनेगु यानादी । वहे छेँय् वयकलं थुगुसी महाकवि गिरिजाप्रसाद जोशीया बुन्हि हनेगु ग्वसाः तकं यानादीगु खः । वयकः महाकवि जोशीलिसे तसकं सतीम्ह साहित्यह्यःमि खः ।
मदुम्ह श्रेष्ठया सीम्हयात थौं बिहिवाः टिचिङ अस्पतालय् पोष्टमार्टम क्वचायेकाः पशुपति दिपय् अन्तिम संस्कार याःगु खः ।
वयकलं निक्वः इहिपा यानादीगु खःसां वयकःया निम्हं जहानपिं मदयेधुंकल ।
