newayatataad 2

सकिमिला पुन्हि हलिमलि ब्वज्या

नेवा: अनलाइन न्युज | २०७७ मङ्सिर १४, आइतबार १८:५२:४०

दँय् दँस कछलाथ्व पुन्हिया दिं सकिमिला पुन्हिया रुपय् परिचित जुया वयाच्वंगु दुसा थुगु दिं कुन्हु थीथी थाय् व बहाः बहिली हलिमलि ब्वयगु ज्या जुया वयाच्वंगु दु । थुकथं हे असंया तुलााधरपिन्सं अन्नपूर्ण अजिमाया देगःया न्ह्योने दबुलिइ थीथी बुवः, फलफुल, मधिचधि तयाः सकसिगु ग्वहालि कयाः कलश दयका हलिमलि ब्वयगु ज्या यानावयाच्वंगु दु । असंया तुलााधरपिन्सं थुकथं ब्वयगुयात हलमन्दि ब्वयगु कथं नं कयावयाच्वंगु दु ।

 थुगु दिं कुन्हु अजिमा द्यःया न्ह्योने करीव न्ययम्हति च्वना बहनी दाफा थायगु ज्या नं जुयावयाच्वंगु दु । थुकथं हलिमलि ब्वय् धुंकाः अन उपस्थितपिन्त इना विइगु नं याना वयाच्वंगु दु । थुकथं हे हलिमलि ब्वयगु झ्वलय्  जनबहालय् हलिमलि ब्वया पयता पुइगु ज्या तकं जुयावयाच्वंगु दु ।  अथे हे  इतुंबहालय्, यतखा बहालय्, दगू बहाल लगायत आपालं बौद्ध विहारय् वा थासय् थुुगु ज्या बौद्धपिन्सं न्ह्याका वयाच्वंगु दु । थुकिया नाप नापं स्वनिगःया थीथी थासय् नं हलिमली ब्वया थःगु कलाकारिताया प्रदर्शन नं याना वयाच्वंगु दु । 

 हलिमलि ब्वयगु झ्वलय् विशेष याना कलश दयकेगु अप्पो प्रचलन दु । नाप नापं थीथी द्यःया मूर्ति व थीथी सम्पदाया प्रतिरुप नं दयका क्यनेगु याना वयाच्वंगु दु । थुगु ज्या बुवःपाखें कलाकारिता प्रदर्शन याय्गु नं खः । थुकथं हलिमलि ब्वयगु ज्याया नाप नापं ब्वज्या याःगु थासय् हे च्वना नामसंगीति तुतः ब्वनेगु व गनं गनं दाफा थायगु नं यानावयाच्वंगु दु ।

नेवाःतसें थःगु कलायात न्ह्यावलें जीवन्त याना तय्त हे थुकथं थीथी ताःया बुवःपाखें  थीथी सम्पदाया प्रतिरुप दयकेगु याना वयाच्वंगुया लिसें बौद्ध सम्पदाप्रति आस्था प्वंकेगु ज्या नं जुयाच्वंगु दु । 

नेवाः बौद्धतय्गु विशेषता न्ह्योब्वयगु कथं नं थुकथंया ज्या जुया वयाच्वंगुलिं थुगु ज्या विश्वयात हे क्यने लायक नं जुयाच्वंगु दु । थुगु ज्या पाखें नेवाःत शीपया ख्यवय् गुलि तक च्वन्ह्यापिं खः धकाः क्यनेगु ज्या नं जूगु दु । नाप नापं नेवाःतसें थःगु शीपयात जीवन्त याना तयत थीथी कथंया ज्यायात धार्मिक व सांस्कृतिक रुपं हे हनेगु याना वयाच्वंगु धैगु थुगु हलिमलि ब्वयगु ज्यानं क्यनाच्वंगु दु । हलिमलि ब्वज्यायात ज्ञान व शीपया संगम धकाः नं कायगु आधारत दयाच्वंगु दु । उकिं पृथ्वीलय् उत्पति जूगु नसाज्वलं पाखें हे हलिमलि ब्वयगु ज्या जुयाच्वंगुलिं थुुगु ज्या पृथ्वीया उत्ततिया उत्पादन नाप नं स्वाना वयाच्वंगु दु । 

बुखँ ग्वाहालिः सम्यक वाःपौ सुगत रत्न सिन्दुराकार

 

Categorized in स्थानिय-समाज