swastha 3

संसार्स अनलाईन सिङगिङ्ग स्टार अवार्डया ग्राण्ड फिनाले कवचाल

नेवा: अनलाइन न्युज – ललेन्द्र शाक्य | २०७८ भाद्र २७, आइतबार १३:४७:०७

झिला न्ह्यःनिसें संसार्स अनलाईन टिभीया ग्वसालय् न्ह्यानाः वयाच्वंगु संसार अनलाईन सिङगिङ्ग अवार्डया ग्राण्ड फिनाले शनिवाः येँया राष्ट्रिय सभागृहया हलय् तःजिक क्वचाःगु दु ।

उगु ग्राण्ड फिनाले ज्याझ्वलय् झिंखुदँ उमेर क्वय् क्याटागोरीइ च्यादँ दुम्ह मिसामचा प्राप्ति तामाङं संसार अनलाईन सिङगिङ्ग अवार्ड त्याकेत ताःलाःगु दुसा मू अवार्ड खुल्ला क्याटागोरीया संसार अनलाईन सिङगिङ्ग अवार्ड २०२०/२१ अश्विन प्रधानं त्याकेत ताःलाःगु दु ।

झिंखुदँ क्वय् उमेर क्याटागोरीइ च्यादँ दुम्ह मिचामचा प्राप्ति तामाङ न्हाप, किपूया रितु श्रेष्ठ ल्यू व ख्वपया झरना खनाल लियांल्यू लाःगु खः । थुगु क्याटागोरीइ न्हाप लाःम्ह प्राप्ति तामाङं झिद्वः, ल्यू लाम्ह रितु श्रेष्ठ न्हयद्वः व लियांल्यू लाःम्ह झरना खनाल न्याद्वः तका दांलिसें अवार्ड त्याकूगु खः ।

खुल्ला क्याटागोरीइ इलामया अश्विन प्रधान न्हाप, यलया अमोघवीर बज्राचार्य ल्यू व ख्वप थिमिया आश्रय रंजित लियांल्यू लाःगु खः । थुगु क्याटागोरीइ अश्विन प्रधानं स्वीद्वः, अमोघवीर बज्राचार्य झिंन्याद्वः व आश्रय रंजितं झिद्वः तका दां सिरपाःलिसें अवार्ड त्याकेत ताःलाःगु खः ।

अथेहे, ग्राण्ड फिनाले ज्याझ्वलय् मल्टिमिडियापाखे राजेश महर्जन नेवाः लियांल्यू, थिमिया कल्पना श्रेष्ठ ल्यू व ठमेल येँया सविना मानन्धर न्हाप लाःगु खः ।

वंगु दँ झिला न्ह्यःनिसें अनलाईन प्रविधिपाखें ७४० म्ह प्रतिस्पर्धीपिन्सं ब्वति काःगु खः । ग्राण्ड फिनाले ज्याझ्वलय् बरिष्ठ संगीतकःमि अमरराज शर्मा, संगीतकार राजु सिंह, लोकंह्वाःपिं म्येहालामिपिं लोचन भट्टराई, जुजुकाजी रंजित व प्रवेशमान शाक्यपिं निर्णायक मण्डलय् च्वनादीगु खः ।

ज्याझ्वलय् मूपाहाँ कथं ऊर्जामन्त्री पम्फा भुसाल उपस्थित जुयादीगु खःसा पाहाँ कथं ख्यालिजुजु मदनकृष्ण श्रेष्ठ, प्रदेश सांसद राजकाजी महर्जन, यल २१ वडाया वडाध्यक्ष रविन्द्र महर्जन, बरिष्ठ सिनेपत्रकार विजयरत्न असंबरेलिसें थीथी व्यक्तित्वपिनिगु उपस्थिति दूगु खः ।

Categorized in कला