kmc bidya

संसारय् ‘मानसिक ल्वय्’या सुनामी वइगु

नेवा: अनलाइन न्युज – ललेन्द्र शाक्य | २०७७ जेठ ४, आइतबार १५:०८:२९

कोरोना भाइरसया ग्याःचिकुं संसार हे लकडाउनया अवस्थायु लाःबलय् मनूतय्के मानसिक ल्वय्या ग्याःचिकु अप्वःगु दु । मनूतय्के तनावया हुनिं डिप्रेशनया ल्वय् अप्वयाः वःगु दु । गुलिखे देसय् आत्महत्याया घटना धमाधम अप्वयाः वयाच्वंगु दु ।

लकडाउनया हुनिं संसारया सकल नागरिक थःगु न्हिथंया ज्या त्वःताः छेँय् हे च्वनेत बाध्य जुयाच्वंगु दु । ताःईतक छेँय् हे च्वनेमाःबलय् मानसिक ल्वगिपिनिगु मात्रा अतिकं अप्वयेफूगु मनोचिकित्सकपिन्सं आकंलन याःगु दु । 

मानसिक ल्वय् थुलि भयावह जुइफु कि थुकिं ल्वय्या सुनामी हे हयेफइगु खतरा मनोचिकित्सकपिन्सं आकंलन याःगु दु । गुगु कोरोना भाइरसया संक्रमणसिबें नं भयावह जुइफु ।

मानसिक ल्वय्या सुनामी वयेफूगु खतराया कारण दुने स्कूल व ज्याकुथित बन्द जूगु, सेल्फ आइशोलेशनय् च्वनेमाःगु, ग्याःचिकु नं छगू कारण खः । ल्वयुया लिच्वः विशेषयानाः कम उमेरया मचात व उमेर वनेधुंकूपिं ज्येष्ठ नागरिकपिंके खनेदइगु चिकित्सकपिनिगु धापू दु ।

बुलुहुा मानसिक ल्वय्या चाप अस्पतालय् खनेदूगु दु । तर, लकडाउनया हुनिं मनोचिकित्सकपिन्सं उगु ल्वय्या वासः यायेमफूगुलिं चिकित्सकपिन्सं दुःख प्वंकूगु दु । वासः मयाःबलय् उपिं ल्वगिपिनिगु ल्याः अप्वयाः वयाच्वंगु दु ।

उज्वःपिं मनूतय्गु वासः मयाःबलय् ल्वचं ग्याःचिकुइ लाःपिं मनूत दथुइ तकं ग्याःचिकु ब्वलंकूगु मनोचिकित्सकपिन्सं जानकारी ब्यूगु दु ।

उगु विषयया पुष्टि स्वयं ल्वगिं याःगु दु । उकिं मानसिक ल्वगिपिनिगु उपचार जुइमाःगु मनोचिकित्सकपिन्सं सरकारलिसे आग्रह याःगु दु ।

एजेन्सी

Categorized in अन्तर्राष्ट्रिय