Newa Ekata Diwas Gosthi Adv

संसद पुनःस्थापनाविना चुनाव यात धाःसा रक्तपात : सुजाता कोइराला

नेवा: अनलाइन न्युज – ललेन्द्र शाक्य | २०७७ पौष २९, बुधबार १५:२८:३६

नेपाली कांग्रेसया केन्द्रीय दुजः सुजाता कोइरालां संसद पुनःस्थापनाविना चुनाव जूसा रक्तपात जुइगु धाःगु दु । सुजाता कोइरालां देसय् रक्तपात जुइगुपाखें बचेयायेत संसद पुनःस्थापनाया विकल्प मेगु मदुगु धाःगु दु ।

सभापति शेरबहादुर देउवा संविधानया विपक्षय् दनाः तच्वःगु गल्ती यानाच्वंगु कोइरालाया टिप्पणी दु । असंवैधानिक ढंगं संसद विघटन याःगु अवस्थाय् देउवां रक्तपात जुइफूगु चुनावया खँ ल्हाःगुलिं आशंका ब्वलंगु तकं कोइरालां धाःगु दु । वं देउवाया लिपांगु गतिविधियात कयाः केन्द्रीय कमिटी बैठकय् खँ ब्वलनीगु तकं धाःगु दु ।

पूर्व उपप्रधानमन्त्री कोइरालां धाःगु दु, शेरबहादुर देउवा छाय् संविधानया पक्षय् मच्वन ? ओलीया छाय् ल्यूल्यू जुयाच्वंगु दु, अजू चायाच्वंगु दु । रक्तपात जुइफूगु चुनावया खँ ल्हानाच्वंगु दु । तर, थःपिन्सं हे हःगु संविधान व संसदया विपक्षय् छाय् न्वःवानाच्वंगु दु, व गलत खः ।

कोइरालां संसद पुनःस्थापना मयाःसे चुनावय् वनेत्यंसा रक्तपात जुइगु खतरा क्यंगु दु । देसय् मेगु रक्तपात हइगु अवस्था वयाच्वंबलय् देउवां तःक्वःमछि चुनावया खँ ल्हानाच्वंगुलिं आपत्ति प्वंकूगु दु । कोइरालां धाःगु दु, चुनावय् रक्तपात जुइ । देउवां ओलीया पक्षय् दनाः मुलुकयात रक्तपात व अस्थिरताय् यंकेमते ।

संसद विना देस न्ह्यःने वनेत्यंसा मेगु दुर्घटना जुइगु खतरा नं क्यंगु दु कोइरालां । वं धाःगु दु, संसद विना देसयात न्ह्यःने यंकेत्यंसा थुज्वःगु अवस्था वइ कि कल्पना तकं यायेफइ मखु ।

चुनावया विपक्षय थःपिं मदूगु तर उकिया नितिं संविधानयात ट्रयाकय् हये जरुरी जूगु कोइरालां धाःगु दु । संविधान पुनःस्थापना विना चुनाव जुइमफइगु व जूसां नं रक्तपात जुइगु धाःगु दु ।

३० दँनिसें देउवा तःक्वःमछि प्रधानमन्त्री जुयाः वयाच्वंगु लुमंकूसें कोइरालां धाःगु दु, ३० दँनिसें देउवा प्रधानमन्त्री जुयाः वयाच्वंगु दु । हाकनं हाकनं छि हे प्रधानमन्त्री जुयादिसँ तर संसद पुनःस्थापना यानादिसँ ।

संसदया विघटन राजनीतिक निर्णय जूगुलिं सतक आन्दोलनपाखें जूसां नं पुनःस्थापना यायेगु कोइरालां धाःगु दु । वं कांग्रेस संसद पुनःस्थापनाया पक्षय् आन्दोलनय् वनेधुंकूगु धाःगु दु । वं संसद पुनःस्थापना विना कांग्रेस चुनावय् मवनीगु स्पष्ट याःगु दु । वं धाःगु दु, आन्दोलनय् वनाः जूसां नं संसद पुनःस्थापना यायेगु जुइ ।

थःपिन्सं अदालतया फैसला पियाच्वनागु तकं कोइरालां धाःगु दु ।

ओली सरकार काम चलाऊ सरकार जूगुलिं भारतलिसे गम्भीर व संवेदनशील विषयस छुं नं सम्झौता याये मफइगु कोइरालां धाःगु दु । वं सीमाया विषयस ओलीं भारतलिसे खँ ल्हाये मफइगु धाःगु दु । कोइरालां धाःगु दु, काम चलाऊ सरकारं सीमाया विषयस वार्ता याये मिलेमजू । ओलीं यकःतिं भारतलिसे वार्ता याःसा मान्य जुइमखु ।

सहमति, सहकार्य व एकतायात हाकुतिनाः ओली न्ह्यःने वंगु द्वपं नं कोइरालां ब्यूगु दु । ओलीं संविधानयात हे न्हुयाः देसयात दुर्घटनाय् यंकूगु सुजाता कोइरालां द्वपं ब्यूगु दु ।
ओली रंग हिलाच्वनीम्ह व विचाः नं हिलाच्वनीम्ह प्रधानमन्त्री जूगु टिप्पणी यासें विश्वास याये बहः मजूम्ह तकं कोइरालां धाःगु दु ।

कोइरालां धाःगु दु, ओलीयात जिं विश्वास यायेफइ मखु । मेपिन्सं नं विश्वास यायेगु त्वःतेधुंकूगु दु ।

ओलीया बोलीइ अल्मले मजुइत फुक्कसित आग्रह यासें कोइरालां ओलीयाके साःगु भाषण यायेगु व गलत ज्या यायेगु कार्यशैली दूगु धाःगु दु । वं धाःगु दु, हिटलर नं साःगु भाषण याइम्ह खः, वया भाषण न्यनाः मिसापिं ख्वइगु खः तर वं रक्तपात मच्चेयात ।

कम्युनिष्टपिनिगु ल्वापुं देय् धरापय् लाःगु कोइरालां धाःगु दु । देसयात संकटपाखें बचेयायेगुलि लिपा लाकेमज्यूगु कोइरालां धाःगु दु । ओलीया क्रियाकलापविरुद्ध फुक्क राजनीतिक दल व शक्ति छथासं दनेमाःगुलि कोइरालां बः ब्यूगु दु । संसद पुनःस्थापनाय् फुक्क छप्पं छधी जुइगुया विकल्प मजूगुलि नं वं बः ब्यूगु दु । विगतय् गिरिजाप्रसाद कोइरालं अडान कयाः संसद पुनःस्थाना यानाः संविधान व देसयात सही ट्रयाकय् हःगु खँ कोइरालां लुमंकूगु दु ।

Categorized in राजनीति