zero media family planning adv

संसदय् हे बाबुरामं प्रम ओलीया राजीनामा माग यात

नेवा: अनलाइन न्युज – ललेन्द्र शाक्य | २०७७ बैशाख २६, शुक्रबार १८:०७:४३

पूर्वप्रधानमन्त्री डा. बाबुराम भट्टराई नं संसदय् हे प्रधानमन्त्री केपी शर्मा ओलीया राजीनामा तप्यंक हे माग याःगु दु ।

थौं शुक्रवाः बजेट अधिवेशनया न्हापांगु बैठकयात सम्बोधन यायेगु झ्वलय् डा. भट्टराई नं प्रधानमन्त्री ओलीया राजीनामा माग याःगु खः ।

बैठकय् सम्बोधन यासें डा. भट्टराई नं जीर्ण शरीर आराम यायेत प्रधानमन्त्री ओलीयात आग्रह याःगु खः ।

व भिडियो स्वयेबलय् ख्वबि महाः ला ? –डा भट्टराई

अथेहे, डा. बाबुराम भट्टराई नं कोरोना भाइरस कोभिड १९ संक्रमणय् सरकारं लकडाउन बाहेक मेगु छुं बांलाःगु ज्या यायेमफूगु नं धाःगु दु ।

थौं शुक्रवाःनिसें न्ह्याःगु प्रतिनिधिसभा बजेट अधिवेशनया न्हापांगु बैठकयात सम्बोधन यासें समाजवादी पार्टीया नेता डा. भट्टराई नं मेपिन्संथें नेपालं नं लकडाउन यायेगु बाध्यता जूगु धाःगु दु । सरकारं विदेशय् दुपिं नेपाःमिपिन्त वयेमते धाःगु दु तर इपिं अन समस्याय् लानाच्वंगु खँ कंगु दु ।

भारतया गोवाय् भारतीय सरकारं नेपाःमिपिन्त ‘छेँय् लिहाँ हुँ’ धयाच्वंगु खँ कंसें डा. भट्टराई नं धाःगु दु, “झीगु सरकारं ठोस निर्णय यायेफयाच्वंगु मदु । नेपाःमिपिं अलपत्रय् लानाच्वंगु दु । आः छगू भिडियो भाइरल जूगु दु, उकिं नं झीगु आत्मा मख्वल । मिखां ख्वबि पिहाँ मवल धाःसा झीसं थःत हे न्यनेमाः, झीपिं मानव खः कि मखु ?”

डा. भट्टराई नं न्ह्यथंगु भिडियो भारतया क्वारेन्टाइनय् तयातःपिं नेपाःमिपिन्त जूगु हप्कीदप्कीया खः । उगु भिडियोय् भारतीय अधिकारीपिन्सं नेपाःमिपिन्त जिमिसं सःताः वयागु खःला ? छिपिं थःपिं हे वःगु खः । छिमितः जिमिसं गथे पालेयाये फइ ? गन वनेमाः हुँ धकाः धाःगु दु । तर नेपाःमिपिन्सं ल्हाः बिन्ती यानाः जिपिं गन वने ? बास ब्यू जिमितः धयाच्वंगु दु ।

डा. भट्टराई नं धाःगु दु, “नेपाःमिपिनिगु उज्वःगु अवस्थाय् फुक्क ठीकठाक जू धकाः सुम्क च्वने पायछि जू ला ?”

Categorized in राजनीति