संसदया विशेष अधिवेशन माग यानाः ओलीविरुद्ध अविश्वासया प्रस्तावया रणनीति
नेवा: अनलाइन न्युज – ललेन्द्र शाक्य | २०७७ आषाढ २४, बुधबार १३:३६:५४
प्रधानमन्त्री केपी शर्मा ओलीं राजीनामा बिइ मानेमजुइधुंकाः ओलीयात चिइकेत संसदीय लँपु अबलम्बन यायेगु रणनीति तकं तयार जूगु दु । विकल्पय् अविश्वासया प्रस्ताव तकं तयाः गृहकार्य जुयाच्वंगु सीदूगु दु ।
प्रधानमन्त्री ओलीं क्याबिनेट सःताः संसदया बजेट अधिवेशन अन्त याःगुलिं सत्तापक्ष व प्रतिपक्ष निगुलिं असन्तुष्ट जुयाच्वंगु दु । वं छन्हुं हे अधिवेशन अन्तया निर्णय याकाः वहे दिं सिफारिस राष्ट्रपाति विद्यादेवी भण्डारीपाखें अनुमोदन याकेबिल । थुकिं नेपाली कांग्रेस व जनता समाजवादी पार्टी असन्तुष्ट जूगु दु ।
कांग्रेस व जसपां विशेष अधिवेशन सःतेत आग्रह यायेगु तयारी तकं जूगु दु । इपिं नेकपा विवादयात प्यू व स्व...या स्थितिइ दु । नेकपा विवाद गुगु चरणय् थ्यनी स्वयाः विशेष अधिवेशनय् न्ह्याःवनेगु तयारी दूगु विश्वस्त स्रोतं धाःगु दु ।
विशेष अधिवेशन सःताः ओलीविरुद्ध अविश्वासया प्रस्ताव हयेगु नितिं नेकपा दुनेया विरोधी पुचःया ग्रीन सिग्नल धाःसा वयेत जरुरी जूगु धासें पियाच्वंगु सीदूगु दु ।
संसदय् अविश्वासया प्रस्ताव वःसा नेकपाया विरोधी पक्षया साथ विना ओलीयात चिइकेत असम्भव जू । उगु इलय् संसदीय दलं काइगु निर्णय महत्वपूर्ण जुइफु ।
Categorized in राजनीति