Arin Enterprises

संचारकःमि राजेन्द्र डंगोेलया हाकनं न्हूगु म्ये पिदनीगु

नेवा: अनलाइन न्युज – ललेन्द्र शाक्य | २०७९ मङ्सिर ८, बिहिबार १२:५३:२३

थाहा संचारया संचारकःमिलिसें क्यामेरा पर्सन व सम्पादक राजेन्द्र डंगोलया हाकनं नेपालभाषाया न्हूगु म्ये पिदनीगु जूगु दु ।

लोकंह्वाःम्ह संगीतकःमि जुगल डंगोलया स्टुडियो आर्टोम्यूज स्टुडियोस रिकर्ड जुयाच्वंगु “अय्लाः छ धात्थें...” बोलया थुगु म्ये रिकर्ड जुयाच्वंगु खः । थुगु म्येया म्येच्वमि नातिकाजी महर्जनं च्वयादीगु खःसा लय् चिनामि व सः राजेन्द्र डंगोल खःसा संगीत संयोजन शिव शाही खः ।

अथेहे, भाजु डंगोलया मेगु नेपालभाषाया न्हूगु म्येया नं रिकर्डिङ ज्याझ्वः क्वचायेधुंकूगु स्वयं राजेन्द्र डंगोलं नेवाः अनलाइनन्यूजयात जानकारी बियादीगु दु ।

‘चकना अय् चकना...’ बोलया थुगु म्येच्वमि नं नातिकाजी महर्जन खःसा लय् चिनामि संगीतकःमि जुगल डंगोल खःसा राजेन्द्र डंगोलं हे थुगु म्येय् सः बियादीगु दु । अथेहे, थुगु म्येया संगीत संयोजन जुगल डंगोलं हे यानादीगु दु ।

म्येहालामि राजेन्द्र डंगोलया कथं ‘चकना अय् चकना...’ बोलया म्ये नेपालभाषा संगीत ख्यलय् छगू बिस्कं पहःया म्ये कथं निर्माण जूगु खँ कनादीगु दु ।

संचारकःमि राजेन्द्र डंगोलया आः पिदनीगु नेपालभाषाया न्हूगु निपू नेपालभाषाया म्ये याकनं हे म्यूजिक भिडियोया रुपं पिदनेत्यंगु दु ।

भाजु डंगोलं थ्वयां न्ह्यः नेपालभाषाया बुद्ध भजन म्ये ‘नेपाल मांया सपूत झीपिं, गौतमबुद्धया शरणय् वया...’ सम्पादन व क्यामेरा पर्सन जुयाः पिथनादीगु दु । थुगु बुद्ध भजनया म्येहालामि सुनकुमार मानन्धर खःसा स्वयं म्येहालामि सुनकुमार मानन्धरं हे लसय् हनादीगु बुद्ध भजन म्ये खः ।

अथेहे, थुगु बुद्ध भजन म्यूजिक भिडियोया निर्देशन सुरेन्द्र मानन्धर खःसा म्येच्वमि भिक्षु सुबोधानन्द खः ।

संचारकःमि राजेन्द्र डंगोल नेपालभाषा संचार ख्यःनिसें मनोरञ्जनात्मक संगीत ख्यलय् निरन्तर रुपं भेलेपुयाः वयाच्वनादीम्ह छम्ह सक्रिय संचारकःमि व संगीतकःमि खः । भाजु डंगोलं आपालं नेपालभाषालिसें खस नेपाली ख्यःया म्येत निर्देशन लिसें क्यामेरा पर्सन व सम्पादन यानाः पिथनादीगु दुसा वय्कःया नेपालभाषाया संकिपा ‘ख्वबिया पुसा’ नं थःगु हे सम्पादन व छायांकनय् पिदनेत्यंगु दु ।

नेपालभाषाया संकिपा ‘ख्वबिया पुसा’ संकिपा ख्यलय् थःगु म्हसीकाया रुपं पिलु वइगु भलसा नं भाजु डंगोलं कयादीगु दु । थुगु संकिपाया निर्देशन सुरेन्द्र महर्जन खःसा कलाकारपिं नांजाःम्ह कलाकार कृष्णभक्त महर्जन, दिपक डंगोल, रविन्द्र महर्जन, शैलेश ज्यापु, मैंया महर्जन, शान्ता प्रजापतिलिसें स्वयं राजेन्द्र डंगोलं कलाकार जुया म्हितादीगु दु ।

Categorized in कला