prabhu baink new

संघर्षं हे ३० दलया माग पूवनी ला ?

– निश्चल

निक्वःगु संविधानसभाया चुनाव ल्यू हे पहिचान पक्षधरतय्गु ल्याः म्हो जुसेंलि आः संघर्ष बाहेक मेगु विकल्प मदुगु खँ पहिचानपक्षधरतसें धयाजूगु खः । तर थीथी परिस्थितिया हुनिं संघर्ष न्ह्याके मफयाच्वंगु खः । थथे जूगु मू हुनि धइगु नेपालय् आपालं संघर्ष जुइधुंकूगु तर जनतायात ठोस उपलब्धि मदुगुलिं मनूत संघर्षपाखें आजित जूगु हे खनेदु । 

ज्ञानेन्द्रं शासनसत्ता न्ह्याकाच्वंगु इलय् जूगु संघर्षय् न्यागू दल व न्हय्गू दलं रत्नपार्क व जःखःयागु संघर्षय् खास मनूत कुहां मवः । वःपिसं नं न्ह्यसः थनीगु – वहे प्रजातत्रया निंतिं नेपाःमि जनतां ग्वःक्वः संघर्ष यायेगु ? उबले गिरिजानिसेंया नेतातसें धाःगु खः – आःया संघर्ष लिपा हानं संघर्ष याये माली मखु । 

तर १२ गू बुँदाया सम्झौता जुयाः जनयुद्ध न्ह्याका वयाच्वंपिं माओवादीत नं दुथ्याये धुंकाः जनतायाके छगू उत्साह दनावल । १९ न्हु तक अनिश्चितकालीन बन्द, कफ्र्यूया दथुइ हे आन्दोलन तच्वल । 

आः वयाः आमरुपं हानं बन्द, हडताल, जुलुस धइगु खं मनूत दिक्क चायेगु मानसिकता हाबी जुयावःगु खनेदु । उकिसनं उबलय् शाही कालय् कांग्रेस व एमालेयात गुकथं विकृति व विसंगतिया संवाहक धकाः प्रचार यात, उकथंहेया प्रचार आः एमाओवादीविरुद्ध जुयाच्वंगु दु । उकिसनं खास जनाधिकार मदुनि राजतन्त्रवादीसिकं आः जनाधार दुपिं कांग्रेस व एमालें याइगु प्रचार ला तीव्र जुइगु हे जुल । 

थथे हे जुयाः स्वयम् एमाओवादी नेतातसें नं बन्दपाखें आन्दोलनकारीतय्त फाइदा दयेगु पलेसा अःखतं सत्तापक्षं लबः काःगु निष्कर्ष नं पिथंगु खः । बन्दया ज्याझ्वः एमाओवादीया निंतिं आत्मघाती जूगु निष्कर्ष पिथनीपिं विश्लेषकत नं खनेदया हे च्वंगु दु । 

थुकथं यानाः पहिचानपक्षधरतय्गु निंतिं संघर्ष मयासें नं मज्यूगु, तर संघर्ष यानाः नं मज्यूगु अवस्था आः लानाच्वंगु दु । 

देय्या राजनीतिइ सहमतिबाहेकं संविधा वये मफइगु परिस्थिति तयार जूगु जूसां सहमति गुकथं धइगु न्ह्यसः धाःसा अनिश्चित जुयाच्वंगु दु । थुकथंया परिस्थिति ब्वलंगुलिं एमाओवादी नेतातसें सहमतिया निंतिं दवाव बीत हे आमहडतालया ज्याझ्वः यायेमाःगु खँ धयाच्वंगु दु । 

वास्तवय् आःया निर्णायक खँ धइगु राजनीतिक शक्ति सन्तुलनय् हे लानाच्वंगु दु । राजनीतिक शक्ति सन्तुलनय् मुक्कं प्यंगू दल सरोकारवाला जुयाच्वंगु दु । कांग्रेस, एमाले, एमाओवादी व मधेसवादी । थुकी कांग्रेस, एमाले छखे व एमाओवादी व मधेसवादी छखे जुयाच्वंगु दु । संघीयताया मुद्दा थ्वहे स्थितिया छगू मुद्दा जुयाच्वंगु दु । आम पहिचानवादीत नेपाःया राजनीतिइ गुगुंकथंया हैसियतय् लानाच्वंगु मदु । 

थ्व इलय् पहिचानवादीतसें थुकथंया राजनीतिक शक्ति सन्तुलन व जोडघटाउपाखें परिस्थिति थःगु पक्षय् हयेगु जक स्वयेगु मखु, ताःहाकः हे संघर्ष न्ह्याकेगु मानसिकता नं दयेकाच्वंगु दु । आः पहिचानया  संघर्ष ‘ट्याक्टिकल’ मखुसें ‘स्ट्रेटेजिक’ जुल धकाः धइगु विश्लेषण नं जुयाच्वंगु दु । तर आःयात धाःसा थ्व शक्ति सन्तुलनया ‘ट्याक्टिकल’ खँ हे जुयाच्वंगु दु । रणनीतिक व दीर्घकालीन रुप धाःसा थ्व ‘ट्याक्टिकल’ ज्यापाखें असफल जुल धाःसा हे जक न्ह्याइगु खनेदु ।