2565 buddha Jayanti ADV

संगीतया सर्गतय् थिना च्वनिगु नगु प्रेमध्वज प्रधान (च्वसु )

नेवा: अनलाइन न्युज – ललेन्द्र शाक्य | २०७८ बैशाख २५, शनिबार १७:२१:४१

विजयरत्न असंबरे

प्रेमध्वज प्रधानयात नेपाःया गोल्डेन भ्वाइस धका धयातःगु दु । संगीतया ख्यलय् प्रेमध्व ज्वम्ह मेम्ह कलाकार मदु अले दइ नं मखु धका धायेमा । नेपालभाषाया दकले न्हापांगु पप म्ये धका धयातःगु “बाला बाला चिंगु मिखा” थेंज्यागु ज्वमदुगु म्येहालादीम्ह प्र्रेमध्वज नेपाःया संगीत ख्यःया छम्ह अज्याम्ह प्रतिभा खः , गुम्ह प्रतिभाया वर्णन द्वबद्वः आखलं क्वचाइ । 

नेपालभाषाया संगीत ख्यलय् प्रेमध्वजं गुलि नं म्ये हाला दिल , व म्ये दक्वं तसकं लोकंह्वात । आः वया व म्येयात अमर जुल धका धायेमा । “बाला बाला चिंगु मिखा” म्ये ला नेपालभाषाया दकले न्हापांगु म्येया दर्जाय् लात धाःसा “उपहार थ्व मतिनाया ” म्ये नेपालभाषाया दकले न्हापांगु बुदिंया लसता हना म्ये खः । अथेहेतु वयकलं गुलिखे लोकलसय् आधारित म्येयात थःगु गोल्डेन भ्वाइसं जीवन बिया दीगु दु । उकि मध्ये छपू म्ये “राजमति कुमति जिके वःसा पिरति” खः । खय्तला थ्व म्ये न्हापा मेपिन्सं नं हालातःगु दु धका धाइ तर प्रेमध्वजया सलय् पिदने धुंका थ्व म्येया न्हाय् अझ नं थहाँ वल । नेवाः संगीतख्यलय् तसकं जाःगु म्येया रुपय् न्ह्यःने लाःवल । प्रेमध्वजया छपुति म्ये उति हे लोकंह्वाः । “ व छु गल्ली थ्व छु गल्ली”, “वय् जि छन्थाय् छाय् मवय्”, “छंगु मिखा”, “जीवन छु खः निन्हूया नखः” “पिलीपिलि पिलिक्क” , व “वाउँगु लप्ते” म्ये प्रेमध्वजं हालातःगु नेवाः म्ये खः । थाय्मदुइ थःगु बाल्यकाल बितेयानादीम्ह संगीतह्यःमि प्रेमध्वजया किलागलय् च्वंम्ह संगीतह्उःमि नारायण गोपाल गुरुवाचार्य पासा जुल । प्रेमध्वजं दबुलिइ म्ये हालिबले गुलिखे म्येया निंतिं नारायण गोपालं वयक यात बाजं थाना ग्वाहालि नं यात । 

थायमदुइ मचाः ई बिते याना दीम्ह प्रेमध्वज प्रधान सिन्धुपाल्चोक चौतारा याम्ह खः । प्रेमध्वजया मां प्राणदेबी प्रधान नं संगीतय् नुगः क्वसाम्ह कलाकार खः । वयक झिदँ दुबले हे राजा त्रिभुवनया दरबायर वना शाश्त्रिय संगीत न्ह्यब्वया वया च्वंम्ह खःसा प्रेमध्वजया बाज्या उत्तरध्वज प्रधानयात संगीतय् उलि मन मदुसां थः छय् गणेशध्वज या निंतिं उस्ताद गणेशलाल श्रेष्ठया पाखें संगीत स्यनिगु व्यवस्था यानाबिउम्ह खः । वहे गणेशध्वज लिपा वना प्रेमध्वजया नांम्ह नांजाम्ह गायक जुया पिहाँ वल । गणेशध्वजयात प्रेमध्वज धका नां छुना बिउम्ह विश्वनिकेतनया हेड मास्टर प्रेमलाल श्रेष्ठ खः ।

वि.सं.२००१ सालय् तिनि चौतारां स्वनिगः पाखे स्वया वःम्ह प्रेमध्वजया जन्म चौताराय् सन् १९३८ जून ६ तारीख खून्हू जूगु खः । कलाया ख्यलय् प्रेमध्वजया दकले न्हापा न्ह्याःगु पलाः धइगु अभिनयया पलाः खः । उगु इलय् त्वात्वालय् क्यनिगु छगू दबू प्याखं “सत्तलसिंह महाराज”य् मिसा जुया म्हितिम्ह कलाकार मवयाबिउबले प्रेमध्वजयात मिसाया वसःपुंका उगु रोल म्हितकुगु खः । रंगरुप बाँलाम्ह प्रेमध्वजयात मिसाया रुप तसकं ल्वःगु नं खःसा आपासिनं मिसा हे धका च्वंगु खः ।

प्रेमध्वज प्रधानं पद्मोदय् हाईस्कूलं वि सं २०१० सालय् एस एल सी बिल तर संस्कृत विषयलय् फेल जुल । फेल जुबले वयागु दच्छि सितिं वन । थ्वहे ईलय् भारतय् चाह्य् वन । दिल्ली , बम्बई थ्यन । अन वना तिनि वं शिक्षाया महत्व थुल ।  भारत चाहिला च्वंगु ईलय् प्रेमध्वजं रडियो सिलोन व विविध भारती नांयागु  भारतीय रेडियो कार्यक्रम यक्व हे न्यने खन ।  संगीतय् क्वसाःगु नुगः झन क्वसात ।

भारतं लिहाँ वये धुंका छक्वः प्रेमध्वज रेडियो नेपालय् भ्वाइस टेष्ट बिइत नापं वंबले अनया लकस खना अझं प्रभावित जुल । वयागु नुगलय् गायक जुइगु ईच्छा अझं अप्वया वल । वयकलं नं भ्वाइस टेस्ट बिइगु मति तल । 

उगु ईलय् म्ये रेकडिंग यायेगु चलन मवनि । वयकया दकले न्हापां थ्वःगु म्ये धइगु याद आइरहन्छ कसैको जिन्दगी खः । थथे संगीतय् लगे जुया कमाइ मजुइगु खना प्रेमध्वजं ट्यशन ब्वंकेगु शुरु यातसा वयकया मां नं कतामरी दयेका मिइगु जया याइगु खः । ट्युशन ब्वंका प्रेमध्वजं कमेयागु दकले न्हापांगु दां धइगु स्वीखुतका खः । लिपा वना वयकलं अमेरिकन लाइब्रेरी जागिर नं नल । वहे ईलय् अमेरिकन एम्बेसीं बिउगु रेकडिंग मेशिनय् तारादेबीलिसे यो नेपाली शिर उचाली म्ये रेकर्ड याकल ।

थुकथं सांगितिक यात्रा न्ह्याकुम्ह प्रेमध्वज प्रधानं भारतया फिल्मख्यः बम्बई यात्रा नं यक्व याःगु दु । गुबले संगीतया अध्ययनया नितिं गुबले म्येया रेकर्डिंगया निंतिं थथे यात्रा याःगु झ्वलय् अनया दकले तधंगु फिल्म अवार्ड फिल्मफेयर अवार्ड ज्याझ्वलय् तकं म्ये हाला न्यंकेगु ह्वता चूलाकल । वयकयात अन हे च्वनेगु इनाप नं यक्व वल । तर वयकया मां म्हं मफुत धका सुचं वःबले नेपाः लिहाँ वये माल । 

प्रेमध्वज प्रधानं “माइतिघर” फिल्मय् उषा मंगेशकरलिसे “नमान लाज यसरी” व “मायालु” फिल्मय् आशा भोसलेलिसे “टाढा भई” म्येहालादीगु दुसाः “माइतिघर” फिल्मय् वयकयात नं हिरो जूयत प्रस्ताव वःगु खः तर वयकलं व इनाप नाला मदिल । वयकया “जीवन रेखा” फिल्मया “पल पल चूमेर” व “तिम्रो नाम अझै छ” नं तसकं लोकंह्वाःगु म्ये खःसा प्रेमध्वज प्रधानया पिदंगु एल्बमय् हिमालयन बोक्वेट अफ स्विंगिंग काठमाण्डौं सन् १९६३ , प्रेमध्वज प्रधानका सुमधुर गीत संगालो ,बाला बाला चिंगु मिखा (नेपालभाषा गीत संग्रह २०५० साल)

घाइते जवानी २०४९ साल, किचः (नेपालभाषा गीत संग्रह, २०४९),बाला बाला चिंगु मिखा भाग २ (नेपालभाषा गीत संग्रह, २०५३ साल ),माया नमार (२०५४ साल ),कतै यो शहरमा (२०५६ साल) ,ख्वबि (नेपालभाषा गीत संग्रह, २०६५ साल) खःसा वयकया लोकंह्वाःगु म्येया धलखय्  गोरेटो त्यो गाउँको ,. तिमी आए मेरो दिलमा , घुम्तीमा नआउ है , माया नमार मायालु , तारा मात्र होइन तिमीलाई , पर लैजाऊ फूलहरु, हाँस्ने रहरहरु, टाढा भइगयो तिमी , यो नानीको शिरैमा , नमान लाज यस्तरी  व  तिमीलाई अचेल कहाँ भेटौं थेंज्यागु आपालं म्ये दुथ्याना च्वंगु दु । थुकथं नेपाःया संगीतख्यलय् छगू ज्वमदुगु छाप त्वता वंम्ह अमर संगीतया सर्गतय् प्रेमध्वज प्रधान सदां लुमना च्वनिम्ह नगु खः ।

 

Categorized in बिचा: