zero media family planning adv

संक्रमणया जानकारी सुचुकूगु धासें टेकु अस्पतालया डाक्टरं राजीनामा बिइगु ख्याच्वः

नेवा: अनलाइन न्युज – ललेन्द्र शाक्य | २०७६ चैत्र १३, बिहिबार ०९:२२:५५

येँया टेकुइ च्वंगु शुक्रराज ट्रपिकल व सरुवा रोग अस्पतालय् ज्या यानाच्वंम्ह चिकित्साकःमिं म्हिगः बुधवाः लुइकूगु कोरोना संक्रमितया विषयस थःपिन्त २४ घौतक जानकारी मब्यूगु धासें आपत्ति प्वंकूगु दु ।

चिकित्सकपिन्सं अस्पतालया निर्देशक डा. सागरकुमार राजभण्डारीयात नापलानाः ल्वगिया अवस्थाबारे जानकारी सुचुकेगु ज्या जूसा उपचार प्रक्रिया हे त्वतेगु व माःसा जागिरं राजीनामा हे बिइगु ख्याच्वः तकं ब्यूगु दु ।

राष्ट्रिय जनस्वास्थ्य प्रयोगशालां सुं मनूया कोभिड १९ रिपोर्ट पोजेटिभ वयेखतं इपिडिमियोलजी व रोग नियन्त्रण महाशाखायात जानकारी बिइमाःगु जूसां नं तप्यंक स्वास्थ्य मन्त्रालयस छ्वयेगु ज्या याःबालय् थःपिं संक्रमितलिसे २४ घौ नापं च्वंसां नं जानकारी मब्यूगु गम्भीर त्रुटि जूगु चिकित्सकपिन्सं धाःगु दु ।

चिकित्सकपिन्सं संक्रमित मनूया बारे मन्त्तालयं १४ घौसिबें अप्वः सुचं सुचुकूगु धासें आपत्ति जक प्वंकूगु मखुसे उपचारय् दुथ्याःपिं चिकित्सकपिन्सं म्हिगः बुधवाः सनिलय् जक व नं संचारमाध्यमपाखें जानकारी कयागु धाःगु दु ।

चिकित्सकपिनिगु न्ह्यसःया लिसलय् अस्पतालया निर्देशक डा. सागरकुमार राजभण्डारीं थःपिन्त नं संक्रमित ल्वगिया बारे जानकारी मदूगु चिकित्साकःमिपिन्त धाःगु दु ।

Categorized in राष्ट्रिय