prabhu baink new

संक्रमणया चक्र त्वाःथलेनु नाराया लिसें छिगु मास्क ग्व ? अभियान न्ह्यात

नेवा: अनलाइन न्युज – ललेन्द्र शाक्य | २०७७ आश्विन ३, शनिबार १२:३६:४३

‘संक्रमणया चक्र त्वाःथलेनु’ धैगु मूू नारा ज्वनाः लायन्स क्लब अफ काठमाडौं किपू, लियो क्लब अफ काठमाडौं किपू व कीर्तिपुर स्वास्थ्य ज्याकःमिपिनिगु मंकाः संयोजनय् ‘छिगु मास्क ग्व ?’ अभियान न्ह्याःगु दु ।

थौं  असोज ३ गते शनिवाः किपूया १ वडा बाघभैरवलिसें पांगाया ध्वाकासी, लाछि, अथेहे, किपूया हे अमृतनगर सौगात मन्टेश्वरी स्कूललिसें न्हूबजाः पांगा वनेगु दुपातयय् थुगु ‘छिगु मास्क ग्व ?’ अभियान न्ह्याःगु खः ।

मुक्कं ४१ गू संघसंस्थाया मंकाः सहभागिताय् नेवाः अनलाइनन्यूजलिसें कीर्ति अनलाइन, स्वर्णिम सन्देश, नेवाः एफएम, कीर्तिपुर सन्देश, कीर्तिपुर दर्पण, ज्वजलपा वाःपौ, शहीद साप्ताहिक मिडिया पार्टनरया रुपं दुथ्याःगु दु ।

लायन्स क्लब अफ काठमाडौं किपूया नायःलिसें मानवअधिकारकःमि नन्दकुमारी महर्जन नानी मिसं थुगु छिगु मास्क ग्व ? अभियान थौं छन्हु जक मखुसे निरन्तर रुपं थासं थासय् न्ह्याकाः वनेगु जानकारी बियादीगु दु । नानी मिसं थौंकन्हय् जुयाच्वंगु कोरोना महामारीयात बेवास्ता यानाः मास्क मतःसे जुइपिं आःतकं आपालं मनूत दूगु व इमिगु नितिं मास्क तयेमाः धैगु चेतना ब्वलंकेगु नितिं  थुज्वःगु कथंया ज्याझ्वःया ग्वसाः ग्वयागु जानकारी बियादीगु दु ।

संक्रमणया घेरा त्वाःथलेनु अन्तर्गत छिगु मास्क ग्व ? अभियानया मू आज्जु धैगु थौंकन्हय् जुयाच्वंगु कोरोना महामारीपाखें तापाक्क च्वनेत मास्क अनिवार्य रुपं तयेमाःगुलिसें मास्कया छ्यलाबुला गुकथं यायेगु लिसेलिसें कोरोना संक्रमणपाखें तापाक्क च्वनेत यायेमाःगु सावधानी सर्वसाधारणयात चेतना बिइगु खः धकाः लायन्स क्लब  किपूया पुलांम्ह नायःलिसेंं केन्द्रीय लायन्स समाजसेवी रविन्द्र बहादुर प्रधानं जानकारी बियादीगु दु ।

थौं जूगु छिगु मास्क ग्व ? अभियानय् किपूया १ वडाया वडाध्यक्ष हर्ष महर्जन, १० वडाया वडाध्यक्ष अमन महर्जन, ८ वडाया वडाध्यक्ष विनोद महर्जनलिसें थीथी शैक्षिक संस्थाया प्रिन्सिपल, कीर्तिपुर बजार व्यवस्थान समितिया पदाधिकारीपिं लिसें थीथी संघसंस्थाया प्रतिनिधिपिन्सं ब्वति काःगु खः ।

Categorized in राष्ट्रिय