prabhu baink new

श्री दिगुख्यः गुथिपाखें ज्याथः जिथीपिन्त हना

नेवा: अनलाइन न्युज | २०७७ श्रावण ६, मंगलबार २२:०७:१४

श्री दिगुख्यः गुथिपाखें थःगु गुथिया दँ मुँज्याया झ्वलय् हनाः वयाच्वंगु ज्याथः जिथी हना ज्याझ्वः कोरोना भाइरस कोविद १९ या लिच्वलं यानाः दँ मुँज्या यायेमखंगु अवस्थां ज्याथः जिथीपिन्त छेँय् छेँय् हे वनाः असार ३० गते, असार ३१ गते व श्रावण १ गते हनेज्या याःगु दु ।

२०७७ साल असार ३० गते मंगलवाःया दिनय् असंभलुया ९४ दँया तुल्सिमाया तुलाधर, असंभलुया हे ९० दँया पूर्णमान तुलाधर, हितिमंगःया ७७ दँया प्रेमरत्न तुलाधर, हितिमंगःया हे ७७ दँया अमृतलक्ष्मी तुलाधर, ननिबहाःया ७७ दँया तिर्थशोभा तुलाधर, ननिबहाःया हे ७७ दँया रत्न तुलाधर, बाकुननिया ७७ दँया ताराशोभा तुलाधरपिन्त हंगु खः ।

थुकथं हे २०७७ साल असार ३१ गते बुधवाःकुन्हु बफः कवःया ७७ दँया तारामान तुलाधर, बफः कवःया हे ७७ दँया लक्ष्मीहेरा तुलाधर, चलाछेँया ७७ दँया पद्मरत्न तुलाधर, धालासिक्वया ७७ दँया प्रज्ञारत्न तुलाधर, थुगःननि कवःया ९० दँया हिरामानसिं तुलाधरयात हनेगु ज्या याःगु खः ।

ज्याथः जीथि हनेगु झ्वलय् १ श्रावण बिहिवाः २०७७ या न्हिनय् चम्पादेवी तुलाधर, ७७ दँ, ननिबहाः चम्पादेवी तुलाधर, ७७ दँ, हितिमंगः पुण्यरत्न तुलाधर, ७७ दँ, दगुबहाः भाग्यलक्ष्मी तुलाधर, ७७ दँ, न्हायकंत्वाःया ज्याथः जिथीपिन्त हनेगु ज्याझ्वः याःगु खः । नेपालय् मदुगुलिं हने बाकी धालासिक्व कवःया ७७ दँया मोनालिसा तुलाधरयात अनुकूल स्वया हनीगु जूगु दु । 

थुगु हना ज्याझ्वःया झ्वलय् गुथिया नायो रमेश तुलाधरं दोसल्लां न्ययेकाः हनादीगु खःसा गुथिया ल्यूछ्याञ्जे जुजुरत्न तुलाधर श्री दिगुख्यः गुथिया प्रतिमा देछायादीगु खः ।

अथेहे गुथिया ल्यू दांभरिं दिपकदास तुलाधरं दां प्वः लःल्हानादीगु खःसा लक्ष्मीरत्न तुलाधर व भाइकाजी तुलाधरपिन्सं फलफुल लःल्हानादीगु खः । 

ज्याथः जिथीपिन्त हनावना तयाः वनाच्वनेमा धकाः थुकथंया ज्याझ्वः श्री दिगुख्यः गुथिं न्ह्याकाच्वंगु खः ।

सुगतरत्न सिन्दुराकार

Categorized in नेवाः