न्ह्यब्वःम्ह ः पशुपतिमान पःमां

श्री गणेद्यःयात ज्वजलपे, श्री सरस्वतीयत ज्वजलपे, श्री स्वस्थानी परमेश्वरीयात ज्वजलपे ।।

थनलिं सतीदेवी दक्ष प्रजापतिया यज्ञ याःथाय्  थ्यंकः बिज्यानाः बौ दक्ष प्रजापति व मां विरनीया पालि भ्वपुयाः अनया लकस छकः स्वयाः मिखा ह्याउँक कनाः ताहायेक सासः ल्हानाः सकलें केहेँपिं, पाहाँपिं स्वयाः नुगः मछिंकाः थः मांबौया ख्वाः स्वयाः धयाः बिज्यात, “थन थपाय्धंगु अश्वमेघ यज्ञ यानाः नं जिमित छाय् ब्वनाः मदियागु ? जि जक छलपोलया म्ह्याय् मचा मखु ला ? थुगु यज्ञया कर्ता श्रीश्रीश्री महाद्यःयात मब्वसें यज्ञया फल गथे दइगु ? थज्याःगु शुद्ध मजूगु यज्ञ गथे यानाः बिज्यानागु ? यज्ञ भिंके तातुना दुसा थथें हे श्री महाद्यःयात ब्वनाः बिज्याहुँ ।”

सतीदेवीया थज्याःगु खँ न्यनाः दक्ष प्रजापतिं धाल, “छं भाःत महाद्यः थ्व थपाय्धंगु यज्ञय् ब्वये हे मल्वः, छाय्धाःसा थन स्वीस्वंगू कोटि द्यःपिं ब्रम्हा, विष्णु, इन्द्र, ऋषिमुनि, यक्ष, गन्धर्व, अप्सरा, दैत्य, दानव, छं सकले केहेँपिं सकल ब्वनामि मिसा मिजंत मुनाच्वंगु थपाय्च्वंकं शोभा दुगु थुगु पवित्र थासय् समसानया खरानी म्हय् बुयाः म्ह भुइकाः भाङ, गजि त्वनाः मनू छ्यंया क्वँय्माः क्वखानाः जतासँ लहिना भूतप्रेत पिशाच डंकिनी संकिनी, जोग जोगिनी, ताल, बेताल, ख्याः कवं न्ह्यःन्ह्यः ल्यूल्यू तयाः ल्हाःतय् कान्तादबदब, त्रिशुल ज्वना नकुलिं पुयाः दिगम्बर जुया जुइम्ह, स्वये घिनाहाल घच्यापुसे च्वंम्ह बांमलाःम्ह ब्वय् हे मल्वःम्ह अघोरी महाद्यःयात थन ब्वनाः लज्जा मजुइ ला ? अथे जूगुलिं मब्वनागु”

थथे थः भाःत श्री महाद्यःयात व धाः थ्व धाः मदयेक सकसियां न्ह्यःने हेला याःगु न्यनाः सह यानाः सह यायेमफयाः नुगः मछिंकाः मिखां ख्वविधाः हायेकाः नागनीनं सासः ल्हाःथें सासः ल्हानाः झसुकाः तयाः वा कटटटट...न्ह्ययाः तुति बँय् बस्वानाः ल्हाः ब्वब्वस्यानाः यज्ञय् तुंक स्वयाः थःगु नुगलय् थःम्हं दायाः व याये थ्व याये मसिया हथाय् चायाः यज्ञ स्वचाहुला शिव ! शिव ! शिव ! धकाः महाद्यःयात लुमंकाः मिखा तिसिनाः यज्ञय् दुब्वाना थः थःम्हं प्राण त्वःता बिज्यात ।

सतीदेवी यज्ञय् दुब्वानाः थःगु प्राण त्वःतूगु स्वयाः अन च्वनाच्वंपिं सकलें आः धाःसा धाथें मखु थें अनर्थ जुल आः छु जक जुइथें धकाः हाला जुल । अन छुं म्वायेक सर्गतय् धू ब्वयाः ग्वःफय्, धाकूफय्, वल, आकाझाकां सुपाँचं सर्गतय् भुनाः नँ न्यात । न्हिनय् हे चान्हय्थें खिउँया उत्पात जुल । थथे अनर्थ जूगुलिं सकलें ग्यानाः ख्वयाः हाला जुल । थथ उत्पाद जूगु खनाः दक्ष प्रजापति आः छु याये आः छु याये ! धकाः विशब्दं ख्वयाः हालाः जुल ।

थज्याःगु दुर्घटना जूगु खनाः नारद हथाय्पथासं श्रीमहाद्यःथाय् थ्यंकः वनाः दक्ष प्रजापतिं हेला यानाः म्हुतु वाःगु व मां सतीदेवी यज्ञय् दुब्वानाः प्राण त्वःतूगु सकतां खँ ख्वख्वं कनाबिल । श्रीमहाद्यवं खँ गथे खः धकाः मिखा तिसिनाः ध्यान दृष्टिं स्वयाः दक्व खँ सिइकाः तसकं तं चायाः स्वंगः मिखां मि पिकयाः वा कटटटट न्ह्ययाः थःगु छ्यंया जता छपु चफुनाः बँय् बस्वायेकथं ग्यानापुम्ह श्री महाकाली नांया देवी छम्ह उत्पत्ति जुल । उम्ह महाकाली तसकं ग्यानापु ख्वाः मिखां मिप्वाः पिहां वयेकाः, धवां ताहकः पर्वःथें च्वंगु प्वाः राक्षसतय् छ्यंमाः क्वखानाः जँय् धुँ छ्यंगुलि हिनाः सँ फँफँ तयाः जव ल्हाती खड्ग पाछानाः हटटटट न्हिलाः महाद्यःया न्ह्यःने “उजं छु ?” धकाः ल्हाः निपा ज्वजलपा बिन्ती यानाच्वन । महाद्यवं हाकनं मेगु जता छपु चफुनाः बँय् बस्वायेकथं महावीरभद्र नांया भैलःद्यः छम्ह उत्पत्ति जुल । उम्ह भैलःद्यवं काल समान त्रिशुल पाछायाः धुँ छ्यंगुलिं जँय् हिनाः मिखा स्वगलं मि पिकयाः अति गम्भीर मूर्तिम्ह जुयाः जिं छु यायेमाल धकाः मेँ चुलुचुलु पिकयाः ल्हाः निपा ज्वजलपा बिन्ती यानाच्वन । श्री महाद्यवं महाकली व महावीरभद्रयात “छिपिं थथें वनाः स्वीस्वकोटि द्यःपिं चाकःछिं तयाः यज्ञ याकाच्वंम्ह दक्ष प्रजापतिया यज्ञ विध्वंश यानाः वयेमाल ।”

थथे महाद्यःया उजं फयाकथं वसपोलया तुति भागि यानाः त्रिशुल, खड्ग पाछाया नन्दी, भृन्दी विषमज्वर जोगिनी गणं लितका नँन्याः थें सः थ्वयेकाः पल्पसा त्वयेकाः यज्ञ यानाच्वंथाय् दुब्वावन ।

पृथ्वी तच्वकं भुखाय् ब्वःथें दिगिदिगि खात, न्हय्गू समुन्द्र छथाय् ल्वाक ज्यानाः बाःवःथें बाः वल, सकभनं प्रलय जुल । सकलें प्राणीत त्राही त्राही जुयाः ग्यानाच्वन । व थासय् प्रलयबलय् नँ न्याःथें बिशब्दं सः पिकया श्री महाकली व महावीरभद्र दक्ष प्रजापतिया यज्ञय् दुब्वावन । उमिसं अन स्वीस्वकोटि द्यः, दानव, राक्षस, यक्ष, गन्धर्वपिं दुथाय् बिशब्दं हाला नँ न्याःथें न्यानाः अघोरं ल्वापु यात ।

द्यःपिं, ऋषिपिं, दक्ष प्रजापति, वया म्ह्याय्पिं व दक्व पाहाँपिं ग्यानाः ग्वाहालि ग्वाहालि धकाः बिस्युं वन । ब्रम्हा, विष्णु द्यःपिं यक्ष, गन्धर्व, किन्नर, नाग, दैत्य, दानवपिं सकलें दक्ष प्रजापतिया पक्षय् थःथःगु ल्वाभः ज्वनाः महाकली व महावीरभद्रयात ब्रम्हास्त्र, इन्द्रास्त्र, देव्यास्त्र, वारुणास्त्र,अग्न्यास्त्र, शक्ति तोमर, पास, षत्वाङ्ग, केतक, त्रिडण्डी, धनु, वाण, खड्गः, गदा, मुसल, मुगर, नागपास थज्याःगु आपालं कथंया ल्वाभः अस्त्र शस्त्र छ्यलाः ल्वानाच्वन । थथे थःपिन्त स्वयाः सकसिनं क्वत्यलेत कुतः याःगु स्वयाः महाकाली व महावीरभद्रं काल समान खङ्ग त्रिशुल पाछानाः मिखा ह्याउँक कनाः द्यः दानवत स्वयाः दुब्वावना लाकलाकथें ज्वना हि त्वनाः छ्यं चनंका, चफुना, ल्हाःतुति चफुनाः आपालं आपालं न्हंकाः नाश यानाः कल्लोलं युद्ध यानाच्वन । थ्व संग्रामय् समुद्र न्ह्याःथें हिबाः न्ह्यात, सीपिनि द्वं पर्वःथें च्वन ।

आकासय् इमा, गिद्ध मन्दः कयाः जुल । महिताः द्यः दानव राक्षसपिन्सं कयेकाःहःगु ल्वाभः, अस्त्र शस्त्र महाकाली व महावीरभद्रयात लाये मलाकं हे भष्म जुयावन । थुकथं महितात चुर्णभूर्ण याना गुलिं गुलियात यज्ञय् हे दुया छ्वल । थथे दक्ष प्रजापतिया पँ लिनाः ल्वाःवःपिं दक्व स्यानाः नाश यानाः ब्यूगु स्वयाः बैकुण्ठ नारायणं (विष्णुं) न्हापाया दुगंछि बल व तेज पिकयाः तसकं तं पिकयाः जव ल्हाःतिं कौमद गदा पाछानाः खव  ल्हाःतिं पञ्चजन्य शंख पुयाः थः ल्हाःतय् च्वंगु गदा हित्तुहिइकाः न्ह्यज्याना ल्वाः वन । मेपिं ल्यंदनिपिं द्यःत नं फयां फतले बल पिकयाः ल्वाः वन ।

थथे द्यःपिं हाकनं ल्वाः वःगु खनाः महाकालीं तं पिकयाः काल समान खङ्ग पाछानाः वा कट...ट...ट...ट न्ह्ययाः ल्वायेत न्ह्यज्यात । श्री महाकाली व महावीरभद्रलिसे द्यः, दानव सुं हे ल्वानां ल्वाये सामथ्र्य मदयेकाः थःथः ज्यान ल्यंके आसं फयां फतले बिस्युं वन । थथे थः सेना दक्व फुक्क चुर्णभूर्ण थंगु स्वयाः विष्णुं मिखा ह्याउँक कनाः किसि गर्जलपुथें हाला थःगु सुदर्शन चक्र हित्तुहिइकाः महावीरभद्रया ख्वाः स्वयाः धाल, “हे पापीष्ट, महावीरभद्र ! थौं छ जिगु ल्हाःतं प्राण कायेत्यनाः, आः छं सु सु लुमंकेमाः लुमंकि, थ्व जिगु ल्हाःतय् च्वंगु सुदर्शन चक्र गुकिं शस्    त्र अस्त्रया हि त्वनातःगु अतिकं पराक्रमगु गुगु प्रयोग यानांलि गुल्सं सितिं मवनीगु थ्व जिगु चक्रं आः छंगु प्राण काये” धकाः धाःगु न्यनाः महावीरभद्रं धाल, “हे विष्णु ! छु आपाः हालाच्वनागु ? छ वीर खः धयागु खःसा छं चक्रं कयेकाः स्व, गुलित शक्ति दु धयागु  जिं नं छकः स्वये” धका? हक्का च्वन ।

महावीरभद्रं हक्कूगु न्यनाः विष्णु तंचायाः मन्त्र ब्वनाः सुदर्शन चक्र हित्तुहिकाः महावीरभद्रयात कयेकाः छ्वत । खिउँगु सर्गतय् पल्पसा त्वःथें द्वःछि सूद्र्यःया जः ह्वःथें मिमलः वःथें महावेगं चक्र थःथाय् स्वयावःगु खनाः महावीरभद्र हथाय् चाया त्रिशुल पाछानाः हट...ट...ट...ट न्हिलाः बँय् पुलिं चुयाः थःगु म्हुतु वाःखानाः सुदर्शन चक्र म्हुतुइ फयाच्वन । थथे म्हुतु वांखानाः चक्र फयाः नुनाः छ्वयेत्यंगु खनाः विष्णुं थःगु शक्ति भाःपियातःगु चक्र अथें फुके मदु, थ्व चक्र नुना धकाःसा छ्वइन धकाः हथासं ब्वाय् वयाः महावीरभद्रया म्हुतुइ च्वंगु सुदर्शन चक्र काचाक्क झ्वामिक लाकाः अनं तुं सर्गःपाखे बिस्युं वन ।

थथे विष्णुया सामथ्र्य मदयाः बिस्युं वंगु स्वयाः मेमेपिं ल्यंदनिपिं दक्व फुक्क थःथःगु ज्यान ल्यंके भाःपाः फयां फतले बिस्युं वन । गुलि बिस्युं वनां वने मफया अथें ग्यानाः ख्वयाः हालाच्वन । गुलिसित फसं पुइके यंकल । थथे यज्ञया नायः जुयाच्वंम्ह श्री महाद्यःयात क्वह्यंकाः दक्ष प्रजापतिं धाये मधायेगु धयाः हेला याःगु हुनिं सह यानां याये मफयाः सतीदेवीं यज्ञय् दुब्वानाः प्राण त्वःतूगु सीम्ह स्वयाः महावीरभद्र मिखा ह्याउँक कनाः तं पिकया तिंतिं न्हुयाः वा कट...ट...ट...ट न्ह्याः ब्वाँय् वनाः दक्ष प्रजापतियात ज्वनाः तुतिं न्हुयाः छ्यं चफुनाः वहे ह्वाना ह्वाना च्यानाच्वंगु यज्ञय् कुर्का बिल ।

श्री महाकाली आदि चौसथी योगिनी गन नन्दी,भृन्दी प्रथमगण, विष्मज्वर, भूतप्रेत, पिशाचपिं दक्वसिनं पृथ्वी हे थ्वयेक धन्य धन्य श्री महावीरभद्र धकाः जय जय यानाः स्तुति यात । थथे श्री महावीरं दक्ष प्रजापतियात स्यानाः ब्यूगु खनाः वीरनीनं तसकं ख्वयाः बिलाप यानाः नुगः मछिंकाः कलिलमा फसं कयाः ग्वग्वतु थें ग्वग्वतुला चेत मदयेकाः च्वन । भचा लिपा वीरनीया चेत दयाः वयांलि आपालं बिलाप यानाः ख्वयाः श्री महावीरभद्र थाय् वनाः पालि भ्वपुयाः ल्हाः ज्वजलपा बिन्ती यानाः कन्नाचायापुक्क बिलाप यात, “हे प्रभु ! श्री महावीरभद्र जि अनाथ छुं हे मस्यूम्ह मिसा खनाः दया यानाः बिज्याहुँ, दक्ष प्रजापति जि भाःत धयाम्ह अज्ञानी, अहंकारी जूगुया कारणं थज्याःगु कुबुद्धि जुयाः अपराध जूवन, थज्याःम्ह मूर्खयात स्यानाः छलपोलयात छु दइ ? हे प्रभु ! जितः विधवा यानाः बिज्यायेमते हे परमेश्वर, दक्ष प्रजापतियात म्वाकाः बिज्याहुँ । हे प्रभु ! श्रृष्टि याइम्ह नं छलपोल पालन याइम्ह नं छलपोल, संहार याइम्ह नं छलपोल हे  रुद्र ! हे महेश्वर धयाम्ह नं छलपोल, जीवया जीवनं छलपोल, आदिपुरुष धयाम्ह नं छलपोल, आत्माया आत्मा धयाम्ह नं छलपोल हे निरञ्जन निराकार जि आशा भलसा सकतां छलपोल हे प्रभु ! जितः रक्षा यानाः बिज्याहुँ” धकाः अनेक स्तुति यानाः ख्वया दया फ्वनाः च्वन । अन च्वनाच्वंपिं द्यःपिं ऋषिपिं सकलें नं अन वया पुलिं चुयाः बिन्ती यानाः श्री महावीरभद्रयाके क्षमा फ्वनाच्वन ।

थथे सकसिया विन्ती न्यनाः श्री महावीरभद्रं उजं दयेका धयाः बिज्यात, “हे वीरनी ! छंगु अवस्था खनाः जिमित माया वन, आः छं भाःत दक्ष प्रजापतियात म्वाकाः बियेगु जुल । दक्ष प्रजापतिया छ्यं जक यज्ञय् दुयाः छ्वयेधुन, अथे जूगुलिं थ्व यज्ञय् भोग बिइत तयातःम्ह दुगुचिया छ्यं छुकाः म्वाकाः बिइ” धकाः भोग बिइत तयातःम्ह दुगुया छ्यं दक्ष प्रजापतिया गःपतय् ख्वाः ल्यूने स्वकाः जीवदान बियाः म्वाकाः बिल । वीरनी, दक्ष प्रजापति व सकल द्यःपिं, ऋषि, यक्ष, गन्धर्व, अष्टवसु, दैत्य, दानव, राक्षसपिं सकलें मुनाः श्री महावीरभद्र व महाकालीया पालि भ्वपुयाः अपराध जूवंगुलिं क्षमा फ्वनाः वसपोलपिन्त विन्ती यानाः स्तुति यानाच्वन ।

श्री महावीरभद्र व महाकाली अश्वमेघ यज्ञ विध्वंस यानाः थः सैन्य फुक्क अन्तर ध्यान जुयाः कैलाश पर्वतय् थ्यंकः बिज्यात । कैलाशय् श्रीश्रीश्री महाद्यःयाथाय् महावीरभद्र व महाकालीं “यज्ञ विध्वंश यानाः पापिष्ट दक्ष प्रजापतियात स्यानाः वया छ्यं यज्ञय् भष्म याकाः हाकनं यज्ञ भोग बियेत तयातःम्ह दुगुया छ्यं लिकथं स्वकाः छुकाः प्राणदान बियाः दक्वः चूर्णभूर्ण थनाः वयेधुन” धकाः ब्याक्कं खँ इनाप यात । थथे दक्व खँ न्यनाः “श्रीश्रीश्री महाद्यवं छिपिं धन्य खः, उघ्रिमय् वनाः फुक्क नाश यानाः यज्ञ विध्वंश यानावल, जि तसकं लय्तायेधुन, आः छिपिं निम्हं जिके दुबिनाः च्वं वा” धकाः उजं दयेकाः बिज्यात । थथे श्रीश्रीश्री महाद्यःया उजं न्यनाः श्री महावीरभद्र व महाकाली निम्हस्यां वसपोलयात स्वचाकः उलाः ल्हाः ज्वजलपा विन्ती यानाः पालि भ्वपुयाः श्रीश्रीश्री महाद्यःयाके दुबिनाः वन ।

।।श्री स्कन्द कुमारं अगस्त्य मुनियात कनाः बिज्याःगु श्रीश्रीश्री स्वस्थानी परमेश्वरीया दक्ष प्रजापतिया अश्वमेघ यज्ञ विध्वंश यानाः महावीरभद्र व महाकाली श्री महाद्यःयाके दुबिनाः लिन जुयाः वन धयागु च्यागूगु अध्याय् थुलिं क्वचाल ।।८।। कथहं...