1142 nhoo dan adv

श्रीश्रीश्री स्वस्थानी बाखं–४

न्ह्यब्वःम्ह ः पशुपतिमान पःमां

श्री गणेद्यःयात ज्वजलपे, श्री सरस्वतीयत ज्वजलपे, श्री स्वस्थानी परमेश्वरीयात ज्वजलपे ।।

थनंलिं छन्हु ब्रम्हा, विष्णु व महाद्यः स्वम्ह छथाय् चवनाः “थ्व विश्व ब्रम्हाण्ड धयागु झीगु हे खः । थ्व सकतां झीगु इच्छाकथं चलय् जुइगु खः । झी हे थनया हर्ताकर्ता, झीसं तातुनाकथं जक सकतां जुइगु खः । झीसिबें तःधंपिं झीसं हनाबना तयेमाःपिं सुं मदु” धकाः थवं थवय् हाकनं गुमान यानाच्वन ।

छन्हु वसपोलपिं स्वम्ह यता(उत्तर) पाखे चाह्यूवन । उपिं स्वम्ह चाहुहुं वंबलय् व्रज्रपुर धयागु नां दुगु छगू देय्या पिने छमा तःमागु वंगलसिमाया क्वय् थ्यनाः न्ह्यइपुसे सिचुसे च्वंगुलिं भचा झासु लनाः च्वंबलय् गुजुहुं न्ह्यः वयेकल । थथे थवं थवय् अभिमान यानाः थःगु कर्तव्य त्वःता जूगु खनाः परमेश्वरीं उपिं स्वम्हेसित उमिसं छुं हे मचायेक तसकं अगम थाय् द्वःछिदँ तक्क चाह्यूसां च्व व प्वः मथ्यनीगु अगम्य अजू चायापुगु छगू थासय् तयेयंकाः बिज्यात । छुं ई लिपा उमिसं न्ह्यलं चायेकाः स्वःबलय् थःपिं न्हापायागु थाय् मखुसे मेथाय् गन गय् लात धकाः अजू चायाः उखे थुखे चाःहुला स्वयाः जुल । थज्याःबलय् लाक्क अन ककु ताःहाकःपिं जन्हुफातय् द्वम्ब्वचा दुपिं पर्वःथें म्ह जूपिं झिंनिगू कोटि उँथतय्त निगः निगः सन्दू कुबियेकाः तसकं गंसिम्ह छम्ह बुह्रिम्ह उँथतय्त ख्याख्यां उगु हे लँपु जुयाः वयाच्वन । थथे उपिं च्वनाच्वंगु थासं वःगु खनाः काचाकाचा छखे चिलाः उम्ह बुह्रियात थःपिंथाय् सःता “थुमित छु कुबिका हयागु ? गन वनेत्यनागु” धकाः न्यन ।

थथे उमिगु खँ न्यनाः बुह्रिम्ह मनुखं धाल, “हे भाजुपिं ! जि छम्ह बंजाः खः, बनेज्या यायेत वनेत्यनागु” धकाः लिसः बिल । थथे बुह्रिया खँ न्यनाः स्वम्हसिनं छसलं “स्वयेसा छु मिइत यंकेतयनागु जिमित ज्या ख्यलय् दुगु खःसा न्याना काये, ज्या ख्यलय् मदुगु सा अथे दुःख बिइमखु म्हं द्वःछि द्वःछि लुँया दां(असर्फी) बियेगु जुल” धकाः धाल । थथे व स्वम्हेसियागु खँ न्यनाः व बुह्रि बंजालं धाल, “का स्वयादिसँ” धकाः छम्ह उँथया म्हं निगः सन्दू लिकयाः तालं चायेकाः उला क्यंबलय् छगः छगःसन्दुलय् प्यम्ह ब्रम्हा, प्यम्ह विष्णु व प्यम्ह हे महाद्यः दुगु खनाः उपिं स्वम्हं अजू चाया न्यन, “छु आमु दक्वं सन्दुलय् थज्याःपिं हे जक ला ?” धकाः न्यंगुलिं बुह्रि बंजालं “खः, दक्व सन्दुलय् थज्याःपिं हे जक दु, थुमित गुगु गुगु ब्रम्हाण्डय् ब्रम्हा, विष्णु व महाद्यः मदु अन मिइत यंकेत्यनागु खः, छिकपिन्त माःसा न्यानाः कयादिसँ । मखुसा छिकपिन्सं कबुल याःगु कथं द्वःछि द्वःछि लुँया पाँय्म्वह बियादिसँ” धाल । ब्रम्हा, विष्णु व महाद्यः स्वम्हं ग्यानाः थःपिं थज्याःपिं आपालं अल्याख ब्रम्हाण्डय् मियेत यंकेत्यंगु खनाः अजूचायाः थःपिनिगु बचंकथं द्वःछिद्वःछि लुँम्वह बिइत स्वःबलय् बिइमफूगु छुं शक्ति मदुगु वाःचायाः मछालाः छ्यं क्वछुकाच्वन ।

उपिं स्वम्हसिनं थःथःगु बचं पूवंके मफुगुलिं उम्ह बंजाः बुह्रिं उमित छ्यंगूया खिपतं स्वतिक चिनातल । थथे थःपिन्त चिनातल नं छुं हे यायेगु बर्कत शक्ति मदयावंगु वाःचायेकाः तसकं पस्ताय् चायाः थवं थःगु कपालय् दायाः श्रीश्रीश्री परमेश्वरी लुमंकाः बिलाप यानाः निपा ल्हाः ज्वजलपा बिन्ती यानाः उम्ह बंजाः बुह्रिया पालिइ भ्वपुनाः “मां परमेश्वरी जिपिं अज्ञानी कथं गुमान(अभिमान) यानागुलिं थुलित दुःख सिल, जिमित क्षमा यानाः रक्षा यानाः बिज्याहुँ, द्वंके लात प्रभु” धकाः ख्वया बिन्ती यानाच्वन ।

थथे उमिगु बिन्ती न्यनाः उमह बंजालं छिमिसं थःथःगु रुप क्यंसा अले जक छिमित त्वःताबिइ धकाः धाल । थज्याःगु खँ न्यनाः स्वम्हसिनं थःथःगु रुप कयाः द्वंबिद्वं क्षमा यानाः बिज्याहुँ धकाः बुह्रियात बिन्ती यानाच्वन । थथे स्वम्हसिया थःथःगु रुप क्यनाः भक्ति यानाच्वंगु खनाः उम्ह बंजाः बुह्रिं थःगु रुप क्यनाः, “छिपिं थथे लँपु द्वंकाः बिलँय् छाय् जुयागु ? छिमिसं थथे अभिमान यानाः थःगु कर्तव्य त्वःता जुइ मत्यः, अभिमानं सुं नं ल्यनिमखु, न्हनावनी, होश या” धकाः उमित अनहे त्वःता न्हापायागु बंजाः रुप कयाः उँथतय्त ख्याख्यां यता(दक्षिण)पाखे स्वया वन ।
थथे परमेश्वरी रुपी बुह्रि वंगु स्वयाः बिन्ती यानाः खनेदतले स्वयाच्वन । वंम्ह खने मदयालिं उपिं थवं थवय् खँ ल्हात, थ्व विश्व ब्रमाण्ड झीगु शक्तिं चलय् जूगु मखुगु जुयाच्वन, झी ला वसपोल श्रीश्रीश्री परमेश्वरीया निमित धकाः सा जुयाच्वन, म्वायेक म्वायेकं हे गर्ज गुमान यायेलात, झीसं द्वंकेलात धकाः ध्वाथुइकाः थवं थः पस्ताय् चायाः मछालाः थःथःगु धामय् लिहाँ वयाः श्रीश्रीश्री परमेश्वरीया जप ध्यान यानाः थःथःगु कर्तव्य ज्या सुथां लाक्क यानाच्वन ।

उकिं घमण्ड गर्ज गुमान सुनानं यायेमज्यू । गर्ज गुमानं थःगु धर्म हे न्हंकाः थःगु धयागु हे छुं मदयेकाः च्वनेमाली धयागु खँ सकल प्राणीतय्सं थुइकाः लोभ, मोह, अहंकार छुं हे मयासे थःथःगु कर्म यानाः वनेमाःगु जुल ।

।।श्री स्कन्द कुमारं अगस्त्य मुनियात कनाः बिज्याःगु श्रीश्रीश्री स्वस्थानी परमेश्वरीया गर्ज गुमानी सुनानं यायेमज्यू धयागु प्यंगूगु अध्याय थुलिं क्वचाल ।।४।। कथहं...