1142 nhoo dan adv

श्रीश्रीश्री स्वस्थानी बाखं–१८

न्ह्यब्वःम्ह ः पशुपतिमान पःमां

श्री गणेद्यःयात ज्वजलपे, श्री सरस्वतीयात ज्वजलपे, श्री स्वस्थानी परमेश्वरीयात ज्वजलपे ।।

थनंलि आः पातालया खँ ल्हाये – पातालय् रसातल धयागु मंगालय् नागतय्गु थाय् जुयाच्वन । उगु थाय् गथे चवं धाःसा मणि माणिक्यं दयेकातःगु लुँया छेँय् अनन्त नाग, बासुकी नाग, तक्षक नाग, कर्कोटक नाग, महापद्म नाग, शंखपाल नाग, कुलिक नाग, वरुण नाग, शेष नागपिं व उमि नागिनिपिं बास जूगु जुयाच्वन । थन नागनीपिं गथे च्वनाच्वनी धाःसा कथं कथंया चित्र विचित्रया मणि मणिकाय् थुनातःगु तिसां तियाः बांबांलाःगु वसः पुनाः बांलाक्क समाः यानाः च्वनाच्वनीगु । थज्याःगु न्ह्यइपुगु बांलाःगु थासय् नं तसकं दुःखी, दरिद्र जुयाच्वंपिं प्यम्ह नागत दयाच्वन । थ्व प्यम्ह नागतय् नां शंकचुड धयाम्ह नाग हेरावती धयाम्ह नागिनी, रत्नचुड धयाम्ह नाग रत्नावली धयाम्ह नागिनी, कृपादत्त धयाम्ह नाग पदमावती धयाम्ह नागिनी, धृतराष्ट्र धयाम्ह नाग मृगावती धयाम्ह नागिनी दयाच्वन । थ्व दरिद्र दुःखी नागपिं जूसां थुमिके लोभ, मोह, पाप, इष्र्या छुं मदुपिं तसकं सत्यवादी जुयाच्वन । थुमिसं नयेत्वने नापं मखनाः हाहाकार जुयाः अन च्वनां च्वन मफयाः शंकचुड, रत्नचुड, कृपादत्त, धृतराष्ट्र धयापिं नागत तापालय् (परदेशय्) वन । नागिनीत प्यम्ह आः गथे याये धकाः धन्दा पीर कयाः अन च्वनां च्वने मफयाःउपिं प्यम्हस्यां सल्हा साहुति ब्याकाः सुनानं खने मदयेक स्थावरगु सिमा झाल दुथाय् दुने वनाः ताकाल तःदुःख सियाः काल हनाच्वन ।

अस्वस्थामा ऋषि रसातलय् नागतय्गु थासय् थ्यंक बिज्यानाः अनया नागतय् थाय् वनाः “थन सु सु दुःखी, दरिद्र जुयाः कष्ट नयाच्वंपिं दु ला ? जिं उमित उद्धार याये” धकाः वयागु धाःगु न्यनाः धाल – “हे अस्वस्थामा ऋषि ! थ्व थासय् सकलें सुखी धनी, हुकनं स्थावर गुँइ च्वंपिं नागिनीपिं प्यह धाःसा तसकं दुःख कष्ट जुयाः नयेत्वने सुद्धां मदयेक च्वनाच्वन” धकाः कनाछ्वत । अस्वस्थामा ऋषि दुःखी नागिनीपिं दु धाःथाय् वनाः मालाः सःताच्वन । थःपिन्त सुनां छाय् सःतूगु ल्याः धकाः पिहांवया स्वःबलय् अस्वस्थामा ऋषियात खनाः “हे ऋषिश्वर थन छाय् बिज्याना उजं दयेकाः बिज्याहुँ धकाः धाल । नागिनीतय् खँ न्यनाः उमिगु दुःख अवस्था खनाः कन्नाचायाः धाल – “हे नागिनीपिं जि थन दुःखी दरिद्रतय्त उद्धार यायेत वयागु” धकाः धाःगु न्यनाः उमिसं ल्हाः ज्वजलपा बिन्ती यानाः “धन्य धन्य छलपोल दुःखी दरिद्र खनाः दया तया बिज्याःम्ह” धकाः लसकुस यानाः थःपिं सुला च्वनाथाय् ब्वना यंकाः भ्वाथः भिथःगु लासा लानाः फेतुकल । ऋषिश्वरं धया बिज्यात – “हे नागिनीपिं छिमिसं शुद्ध चित्त यानाः न्यँ” धकाः श्रीश्रीश्री स्वस्थानीया धर्मव्रतयागु विधि विधान सकतां कनाः “थुगु व्रत च्वं थुकिया प्रभावं छिमिगु थ्व दुःख दरिद्र कष्ट सकतां नाश जुयाः थःथः भाःतपिं लिसे ह्वनाः आनन्दं च्वनेदइ” धकाः विधि स्यनाः बिज्यात । “थुगु धर्म व्रत दनेत छुं वस्तु मदुसा थःगु मन शुद्ध यानाः खुसिया फि व लः कयाः सकतां वस्तु दयेकागु भाव यानाः परमेश्वरीयात थ्व छानाः, थ्व छुइका धकाः मनं मनं पूजा जक याःसां गाः ।

थुकिं जय कल्याण जुइ” धकाः कना बिज्यात । थज्याःगु पुण्य खँ न्यनाः “थ्व धर्मव्रत छलपोलं हे दंकाः बिज्याहुँ” धकाः बिन्ती याःगुलिं उमि दुःख संकस्त स्वयां स्वये हे मफयाः करुणा तयाः पोहेलाथ्व मिलापुन्ही कुन्हु थःहे वयाः माक्व तालाका थःहे पुरोहित जुयाः नागिनीतय्त धर्मव्रत दनका बिज्यात । लच्छितक न्हिं छपू छपू बाखं कनाः सिल्लाथ्व सिपुन्ही कुन्हु विधिकथं पूजा याकाः अर्घ बियेकल । अर्घ बियेधुंकाः स्तुतीपाठ याकल – “हे परमेश्वरी जिपिं पापिनीतय् पूजा भावं लय्ताया बिज्यायेमाल, जिमि भाःतपिं तःदँ दत बायाच्वनागु, याकनं नापं च्वने दयेकाः बिज्याहुँ, जिमि दुःख संकष्ट नाश यानाः प्रशन्न जुयाः बिज्यायेमाल” धकाः स्तुति यानाच्वंबलय् श्री सुद्र्यः नारायण पर्वतं लुकुंबिल ।

थुगु इलय् हे वंता (पूर्व)या कुलामं सुद्र्यः लुयावःथें जः ह्वलाः श्रीश्रीश्री स्वस्थानी परमेश्वरीं अनाथ नागिनीतय्त दर्शन बियाः बिज्यात । नागिनीत हर्ष विभोर जुयाः हर्षं ख्वबि हायेकाः सः खाखा तुइकाः, “हे प्रभू जिमित दर्शन बियाः उद्धार यानाः बिज्यात, छलपोलयात कोटीकोटी ज्वजलपे, हे प्रभू ! जिमि भाःतपिं लिथ्यंकाः जिमि दुःख संकट न्हंकाः उद्धार यानाः बिज्याहुँ” धकाः फ्वंबलय् परमेश्वरीं “तथास्तु छिमि उद्धार जुयेमा’ धकाः आशिर्वाद बियाः अन्तरध्यान जुयाः बिज्यात । थुगु हे इलय् प्रसाद कायेत लाक्क नागिनीतय् भाःतपिं नागत थ्यंकः वल । विधिकथं पूजा पूवंकाः स्वां क्वकयाः च्यापा अक्षत मधि, ग्वाः, सिसाबुसा, स्वां, सिन्हः तयाः प्यम्ह नागिनीपिन्सं थःथः भाःतपिन्त प्रसाद लःल्हानाः भागि यानाः भोजन याकल । श्री अस्वस्थामा ऋषियात पूजा मान्य यानाः फुथें दक्षिणा अर्पण यानाः भोजन याकाः “छलपोलया कृपां थापय्धंगु व्रत च्वनेखन ।

थ्वहे धर्म व्रतया प्रभावं परमेश्वरीया दर्शन यायेदत, जिमि भाःतपिं लिहां वयाः नां ह्वनेदत । धन्य प्रभू” धकाः विन्ती यानाच्वन । “थ्व धर्मव्रत, परमेश्वरीया ध्यान न्ह्याबलें छिमिसं यानाच्वं, गुबलेसं दुःख संकट ल्वय् छुं नं जुइमखु । छिमि भाव भक्तिं जि लय्तायेधुन । आः जि वने” धकाः बिदा कयाः अस्वस्थामा ऋषि लिहां बिज्यात । नागिनी प्यम्हसिनं थःथःगु सच्छिअक्षता मधि पालं यानाः परमेश्वरी लुमंकाः थःथःगु आश्रमय् आनन्दं सुखं जीवन हनाच्वं वन ।

।। श्री स्कन्द कुमारं अगस्त्य मुनियात कनाः बिज्याःगु श्रीश्रीश्री स्वस्थानी परमेश्वरीया पातालय् नागत उद्धार जूगु झिंच्यागू अध्याय थुलिं क्वचाल ।।१८।। कथहं...