zero media family planning adv

श्रीशान्तिघट विहार संरक्षण समितिइ हाकनं शुभकाजी

नेवा: अनलाइन न्युज – ललेन्द्र शाक्य | २०७७ फाल्गुण ९, आइतबार ११:२२:५३

श्रीघःबहाःया श्रीशान्तिघट बज्रधातु चैत्य महाविहार संरक्षण समितिया शनिवाः जूगु तःमुँज्यां हाकनं छक्वः शुभकाजी शाक्ययात सर्वसम्मतं नायः कथं ल्यःगु दु । सर्वसम्मतया आधारय् ल्यज्याः जूगु न्हूगु ज्यासना पुचलय् न्वकू कमलरत्न शाक्य, छ्याञ्जे पुरण शाक्य, दाँभरी सर्वज्ञरत्न शाक्य, लिउ दाँभरी रबिन्द्र शाक्य व लिउ छ्याञ्जे गुलाफरत्न शाक्ययात ल्यःगु दु ।

अथेहे, उगु न्हूगु ज्यासना पुचलय् मूदुजः कथं अष्टरत्न शाक्य, रिता शाक्य, दिनेशबहादुर शाक्य, सुरेशकाजी शाक्य, सुरेश शाक्य व आमन्त्रित दुजः कथं दिलहेरा शाक्य व रसना शाक्ययात सर्वसम्मतं ल्यःगु दु ।

उगु तःमुँज्यां ल्यायम्ह पुस्तायात नं धार्मिक, संस्कृति व परम्परागत ज्याय् सकृय याना यंकेगु तातुना संरक्षण समितिया ल्यायम्ह कवः नं नीस्वंगु दु । उगु ल्यायम्ह कवलय् उपेन्द्र शाक्य, अतुल शाक्य, सुमन शाक्य, प्रवीणमान शाक्य, कल्याणरत्न शाक्य व राजन शाक्ययात ल्यःगु दुसा संरक्षण समितिया संचार कजि कथं बरिष्ठ सिनेपत्रकार विजयरत्न असंबरेयात ल्यःगु दु ।

म्हिगः शनिवाः जूगु प्यक्वःगु साधारण सभा व तःमुँज्याय् उगु विहार सर्वसंघया थुगुसिइ एसइइ पास जूपिं अभ्युदय शाक्य व प्रणय शाक्ययात भिन्तुना देछासें हनेगु ज्या नं याःगु खः ।

अथेहे तुं उगु साधारण सभाय् ज्यासना पुचःया दुजः सुरेशकाजी शाक्यं लसकुस यासें ज्याझ्वः न्ह्याकुगु खःसा छ्याञ्जे पुरण शाक्यं वंगु दँया प्रतिवेदन व वइगु दँया कार्य योजना न्ह्यब्वःगु खः ।

थ्वहे झ्वलय् दाँभरी कमलरत्न शाक्यं आर्थिक प्रतिवेदन न्ह्यब्वःगु खः ।

Categorized in स्थानिय-समाज