Header Nepal rastra bank Adv

श्रीलंकाय् राजापाक्षेया छेँय् मिँ तल, सांसदया हत्या

नेवा: अनलाइन न्युज – ललेन्द्र शाक्य | २०७९ बैशाख २७, मंगलबार १२:०१:२०

श्रीलंकाय् सरकार विरोधी प्रदर्शन हिंसात्मक जुयावःगु दु । चरम आर्थिक संकटया हुनिं विरोध अप्वयेधुंकाः प्रधानमन्त्री महिन्दा राजापाक्षें राजीनामा ब्यूसां नं स्थिति नियन्त्रण पिने वंगु दु । अन हिंसा अप्वयाः वःबलय् छम्ह सांसद सीगु दु ।

सत्तारुढ दलया सांसद अमराकेर्ती अथुकोरालाया हत्या जूगु दु । वलिसें निम्ह मनू ल्वापुया झ्वलय् हत्या जूगु अन्तर्राष्ट्रिय समाचार संस्थां जानकारी ब्यूगु दु ।

पदं राजीनामा ब्यूम्ह राजापाक्षेया पुख्र्यौली छेँय् प्रदर्शनकारीपिन्सं मिँ तःगु दु । मेडामुलाना धैगु थासय् राजापाक्षेया छेँय् मिँ तयेधुंकाः सेना परिचान जूगु खः ।

सोमवाः ७६ दँया राजापाक्षें राष्ट्रपति तकं जुयाच्वंम्ह थः किजा गोटावाया राजापाक्षे न्ह्यःने राजीनामा लःल्हाःगु खः । वं सर्वदलीय सरकारया निर्माणया आग्रह तकं याःगु दु ।

श्रीलंका इतिहासय् हे चरम आर्थिक संकटय् लायेधुंकाः विरोध ब्वलंगु खः । वैदेशिक मुद्रा सचिती अतिकं म्हो दु । इन्धनया संकट थाहाँ वंगु दु । खाद्य संकटं श्रीलंका समस्याय् लाःगु दु ।

पूर्वाधार विकासया नितिं चीनलिसे वं अरबौं डलरया ऋण काःगु खः । थुकिं नं वयात संकटय् घ्वानाछ्वल । श्रीलंकां भारतयाके अरबौं डलर ग्वाहालि कायेधुंकूगु दु ।

Categorized in अन्तर्राष्ट्रिय