prabhu baink new

श्रीपंचमि तःजिक ससुमाःजुया पूजा

सिल्लाथ्व पंचमि बिहिवाःया न्हि.श्रीपंचमि । श्रीपंचमियात बसन्त पंचमि धकाः नं धाइ । थौंया दिं ससुमाःजु अर्थात सरस्वतीया पूजा याइगु दिं खः । थौं ससुद्यःया पूजा देय् न्यंकं तःजिक याइ । थौंया दिं चिचाधिकःपिं मचातय्त आखः म्हसीकेगु निसें कयाः छुं नं न्हूगु ज्याया थालनीया नितिं तकं बांलाःगु साइत कथं कयातःगु दु । थौंया श्रीपंचमिया दिं ब्याहा, कय्तापूजा, इही, बारा, जंक्व इत्यादी भिं ज्याया नितिं साइत स्वयेम्वाःगु दिं कथं काइगु दिं खः ।

पंचाङ्गया कथं श्रीपंचमि माघ महिनाया पंचमि तिथिइ न्यायेकीगु खः । हिन्दू मान्यताया कथं थौंया हे दिं ससुमाःजु अर्थात् सरस्वतीया जन्म जूगु दिं खः ।

सृष्टिया रचना याःबलय् जब ब्रम्हां जीवजन्तुपिं व मनूया योनीया रचना याःगु खः, फुक्क थाय् सुनसान जुयाच्वंगु ई खः । ब्रम्हायात मति वन कि छुं खँ पूमवंगु दु । वधुंकाः ब्रम्हां थःगु कमण्डलुपाखें जल हाः यात, गुकिं प्यपा ल्हाः दुम्ह छम्ह बांलाःम्ह मिसा प्रकट जुल ।

व मिसाया छपा ल्हातय् वीणा व मेगु ल्हातय् वर मुद्राय् दु । ल्यंदूगु निपा ल्हातय् सफू व माला दु । ब्रम्हां उम्ह मिसायात वीणा थायेत इनाप यात । ब्रम्हाया इनाप कथं उम्ह द्यः नं वीणा थायेगु सुरु यात, संसारया सकल जीवजन्तपिंके सः तयेगु ज्या यात ।वधुंकाः ब्रम्हां उम्ह मिसायात ‘वाणीया देवी सरस्वती’ नामाकारण यात । ब्रम्हां सरस्वतीया उत्पत्ति श्रीपंचमिया हे दिं याःगु खः । उकिं दँय् दसं श्रीपंचमिया दिं सरस्वती अर्थात् ससुमाःजुया जन्म दिं कथं न्यायेकाः वयाच्वंगु खः ।

श्रीपंचमिया दिं म्हासुगु रंगया विशेष महत्व जुइ । म्हासुगुयात बसन्तया प्रतिक कथं कयातःगु दु । बसन्त ऋतुयात फुक्क मौसममध्ये तःधंगु कथं कयातःगु दु । थुगु मौसमय् न तांन्वइ न चिकुइ, न वा हे वइ । सिमा स्वांम्हाय् ताजा फल व स्वां ह्वइ । प्यख्येरं स्वय्बलय् प्रकृति भम्चा थें हे समाः यानातःगुथें खनेदइ ।

कामदेवया पूजा

स्वास्थ्यया दृष्टिकोणं नं थुगु ऋतु अतिकं अनुकुल जूगु कथं कयातःगु दु । मनूया लिसेलिसें पशुपंक्षीतय्के नं न्हूगु चेतनाया संचार जुइ । बसन्तयात मतिनाया द्यः कामदेवया पासा कथं कयातःगु दु । थुगु ऋतुयात काम बाणया नितिं अनुकुल कथं कयातःगु दु । थुगु दिं पवित्र खुसिइ म्वःल्हुइगुया विशेष महत्व दु । बसन्त पंचमि अर्थात् श्रीपंचमिया दिं गुलिस्यां कामदेवया नं पूजा यायेगु याइ । न्हापा न्हापा जुजु किसि म्ह गयाः नगरया भ्रमण यासें द्यःद्यः पतिं देगलय् वनाः कामदेवया पूजा याइगु खः धाइ । पौराणिक मान्यता कथं बसन्त कामदेवया पासा खः । उकिं कामदेवया धनुष स्वांपाखें दयेकातःगु जुइ ।

जब कामदेवं तीर त्वःती, थुकी छुं सः पिज्वइ मखु । उकिं थौं श्रीपंचमिया दिंयात स्वां व मतिनालिसें प्रकृतिनाप स्वानाः नं स्वयेगु याइ । थुगु दिं रतिया नं पूजा याइ ।