नेवा: अनलाइन न्युज – ललेन्द्र शाक्य | २०८० माघ ७, आइतबार १२:२१:२२

वैदेशिक रोजगार विभागं चालु आर्थिक दँया न्हापांगु खुलाया ई दुने श्रम स्वीकृति कयाः वैदेशिक रोजगारीइ वंपिं नेपाःमिपिनिगु ल्याः स्वंगू लख सिबें अप्वः थ्यंगु दु ।

साउन महिनानिसें पुस महिनातकया दुने वैदेशिक रोजगारीइ वनेत श्रम स्वीकृति काःपिनिगु ल्याः स्वंगू लख ४३ हजार थ्यंगु विभागया सुचं अधिकारी व निर्देशक कविराज उप्रेतीं जानकारी ब्यूगु दु ।

उप्रेतीया कथं न्ह्यःया आर्थिक दँ २०७९/०८० या थ्वहे ई दुने वैदेशिक रोजगारीइ वनेगु नितिं विभागपाखें प्यंगू लख १४ हजारं श्रम स्वीकृति काःगु खः ।

न्ह्यःया दँया तुलनाय् थुगु दँ श्रम स्वीकृति काःपिनिगु ल्याः ७१ हजारं म्हो खनेदूगु उप्रेतीं धाःगु दु ।

उप्रेतीं धाःगु दु, “पुस महिनाय् ६५ हजार ८ सय १३ म्ह नेपाःमिं वैदेशिक रोजगारीइ वनेत विभागपाखें श्रम स्वीकृति काःगु दु, थ्व ल्याः न्हूगु श्रम स्वीकृति काःपिं व नवीकरण याःपिं निगुलिंया खः ।”

चालु आर्थिक दँया न्हापांगु खुलाया ई दुने वैदेशिक रोजगारीइ वंपिनिगु ल्याः क्वहाँ वःगु खनेदुसां नं साउन व भाद्र महिनासिबें मंसीर व पुस महिनाय् ल्याः अप्वःगु वैदेशिक रोजगार विभागया तथ्यांकय् न्ह्यथनातःगु दु ।

पुस महिनाय् श्रम स्वीकृति कयाः वैदेशिक रोजगारीइ वंपिनिगु पुचलय् दकले अप्वः युएइ वंपिं दूगु विभागं जानकारी ब्यूगु दु ।

विभागया तथ्यांक कथं युएइया नितिं १६ हजारं श्रम स्वीकृति काःगु दुसा साउदी अरब व कतार वंपिं १४ हजार, मलेसिया वंपिं ८ हजार, कुवेत वंपिं ३ हजार व कोरिया वंपिं १ हजार दु ।

Categorized in लजगाः