prabhu baink new

शुक्र ग्रहय् ३७ ज्वालामुखी, लुयावल सलंसः कोरोना

२०७७ श्रावण ९, शुक्रबार १५:४५:०८

अन्तरिक्षय् प्रायः थुज्वःगु घटनात जुइगु याः, गुकिया बारे सिइकेबलय् सकल मनूत जक मखु, वैज्ञानिकपिं तकं हैरान जुइ ।

अथेला आपालं शोधतय्के थुज्वःगु दाबी याःगु दु कि ज्वालामुखी विस्फोटन केवल पृथ्वीइ जक मजुसे सौर्यमण्डलया मेमेगु ग्रहतय्के नं जुयाच्वनी । अय्सां सौर्यमण्डलया गुलिखे ग्रहतय्के दूगु  ज्वालामुखी करोडौं दँ न्ह्यःनिसें शान्त दुसा गुलिखे इलय् ब्यलय् सक्रिय जुइ । पृथ्वी बाहेक छगू मेगु ग्रह दु सौर्यमण्डलय् गन आः नं मद्दिक्क ज्वालामुखी विस्फोट जुयाच्वनी ।

वैज्ञानिकपिनिगु कथं बहनीया नगु धकाः म्हस्यूगुw शुक्र ग्रहय् छक्वलं ३७ गू भयानक ज्वालामुखी सक्रिय जुयाच्वंगु दु । उगु ज्वालामुखीत छिननिछनय् विस्फोट जुइगु जुयाच्वंगु दु ।

मेरिल्याण्ड विश्वविद्यालयया वैज्ञानिकपिन्सं शुक्र ग्रहया सक्रिय ज्वालामुखीत लुइकूगु खः । थ्वसिबें न्ह्यः शुक्र ग्रहया टेक्टोनिक प्लेट शान्त जूगु अनुमान यानाः वयाच्वंगुलि लिपांगु खोजं उकियात गलत सावित यासें ज्वालामुखी विस्फोटया हुनिं शुक्र ग्रहय् दूगु टेक्टोनिक प्लेटतय्के हलचल जुयाच्वंगु व भुखाय् नं ब्वइगु जुयाच्वंगु पुष्टि याःगु खः ।

नेचर जियोसाइन्सय् पिदंगु उगु अनुसन्धान रिपोर्ट कथं ज्वालामुखी विस्फोटया हुनिं शुक्र ग्रहया सतहय् तःधंगु ल्याखय् गोलाकार गाःत निर्माण जूगु दु । उगु गाःयात कोरोने अर्थात् कोरोना धायेगु याइ । शुक्रया दक्षिणी ध्रुवय् उज्वःगु गाःत आपालं दु । दकले तःधंगु कोरोनायात अर्टेमिस धाइ । उकिया व्यास २१ सय किलोमिटर दु ।

वैज्ञानिकपिनिगु कथं सन् १९९० निसें आःतक शुक्र ग्रहया सतहय् मुक्कं १३३ गू कोरोना अर्थात् ज्वालामुखीया खाडलतय्गु अनुसन्धान याःगुलिं ३७ गू सक्रिय ज्वालामुखी लुयावःगु दु । आः नं उगु थासं क्वाःगु ग्याँस पिहाँ वयाच्वंगु वैज्ञानिकपिनिगु धापू दु ।