nepal life 2076 3 18

शुक्रराज शास्त्री जोशी–लोककबि राजभाई जकःमि कबिता

नेवाः–मांया मुलय् ब्वलंम्ह शहीद शुक्रराज शास्त्री
राष्ट्रिय क्रान्ति— नुगःया धुकधुक झी मांभाय्या महारथी ।

समाज भिंक्यगु नाय्खि च्वय्काः नुगलय् देय्या ध्वाँय् ब्वय्काः
लाय् हे माःगु ज्ञानं जाःगु गुलिख्ये सृजना स्वां ह्वय्काः
झीत सन्ह्यलं जुरुक्क थंम्ह मानववादी न्ह्यलुवाः झी
राष्ट्रिय क्रान्ति—नुगःया धुकधुक झी मांभाय्या महारथी ।

थ्वय्कल छन्हु वं मांदेय्या सः वंघः त्वाःया आमसभाय्
वैगु व सः उबलेया सत्ताय् जू वन दिनिदिनि मिंगु भुखाय्
सासः दतले मद्दिक न्ह्याः वन निडर जुयाः जनमुक्ति लँप्वी
राष्ट्रिय  क्रान्ति—नुगःया धुकधुक झी मांभाय्या महारथी ।

द्वपं बियाः ‘मूनायक’ वैत सन्तांंनब्बेया काण्डय्
मृत्यु सजाँय् हे बिल यःखानाः सब्बू चाया सुनसानय्
थुगु हे पापं क्वःलन उबले राणा शाषणया गद्दी
राष्ट्रिय क्रान्ति—नुगःया धुकधुक झी मांभाय्या महारथी ।

थःबय् गुलि देय् तःधं ताय्काः प्राणतकं लःल्हाःम्ह शहीद
क्रान्ति–अगिंमथलय् हेंग्वाः थें गुनुहुं गुनुहुं च्याःम्ह शहीद
सीमखु, सीमखु झी नुगलय् व सदांसदां सूद्र्यःथें ल्वी
राष्ट्रिय क्रान्ति—नुगःया धुकधुक झी मांभाय्या महारथी ।