नेवा: अनलाइन न्युज – विजयरत्न | ने.सं. ११४४ चिल्लागा चौथी (२०८० चैत्र १६ गते) शुक्रवाः

काठमाडौं सुनचाँदी व्यवसायी संघया नकतिनि क्वचाःगु चुनावय् निर्विरोध निर्वाचित जुयादीम्ह नायः रोहिनादेवी शाक्य लिसेलिसें थीथी व्यक्तिपिन्त येँदेया शाक्य कुलया झिगू बहाःया मंकाः संगठन शाक्य महाविहार संघया ग्वसालय् छगू भिन्तुना देछायेगु ज्याझ्वः जूगु दु ।

शाक्य महाविहार संघया नायः शुभकाजी शाक्यया सभानायःसुइ जूगु उगु ज्याझ्वलय् व्यवसायी संघया नायः रोहिनादेवी शाक्य, न्वकू उपेनकाजी शाक्य व छ्याञ्जे लेखरत्न शाक्ययात नेवाः तजिलजि कथं ख्यें सगं बिया भिन्तुना देछाःगु खः ।

शाक्य महाविहार संघया मूछ्याञ्जे संघरत्न शाक्यं लसकुस यानाः न्ह्याकादीगु उगु ज्याझ्वलय् काठमाडौं सुनचाँदी व्यवसायी संघया न्हूम्ह नायः रोहिनादेवी शाक्यं लुँ वहःया ज्याया परम्परायात म्वाकातःपिं व न्ह्याकावःपिं शाक्य कुलयापिं हे खः धकाः धयादिसे थौंकन्हे थ्व ख्यलय् शाक्यत व नेवाःत म्हो जुयावःगुलिं चिन्ता प्वंकादिल ।

अथेहेतुं ज्याझ्वलय् काठमाडौं सुनचाँदी व्यवसायी संघया न्हूम्ह छ्याञ्जे लेखरत्न शाक्यं लुँवहःया तिसा दयेके मंदुपिं शाक्य छेँजःया ल्यायम्ह पुस्तायात माःकथं ग्वाहालि यायेगु व प्रशिक्षण बिइगु खँ न्ह्यथना दिलसा  न्हूम्ह न्वकू उपेनकाजी शाक्यं नं लुँवहःया व्यवसाययात व्यवस्थित यानायंकेगुपाखे व्यवसायी संघया पलाः अझ क्वातुकाः यंकेगु खँ कनादिल ।

Categorized in बजाः