zero media family planning adv

शनिवाः बसन्तपुर दबुली प्यक्वःगु हलिं नेवाः दिं तःजिक न्यायेकीगु

नेवा: अनलाइन न्युज – ललेन्द्र शाक्य | २०७७ चैत्र ११, बुधबार १२:२१:४५

दँय् दसं मार्च महिनाया दकले लिपांगु दिं हलिंन्यंकं हलिं नेवाः दिं न्यायेकाः वयाच्वंगु दु । थ्वहे ल्याखं थुगुसीया प्यक्वःगु हलिं नेवाः दिं (विश्व नेवाः दिवस) थ्वहे वइगु ने.सं. ११४१ चिल्लाथ्व चतुर्दशी (चैत्र १४ गते) शनिवाः लाःगु दु ।

थ्वहे प्यक्वःगु हलिं नेवाः दिंया प्रचारात्मक ज्याझ्वः कथं मंगलवाः येँया बसन्तपुरय् च्वंगु भ्वय् छेँ रेष्टुरेन्टय् पत्रकार सम्मेलन ज्याझ्वः याःगु दु ।

उगु पत्रकार सम्मेलन ज्याझ्वः प्यक्वःगु हलिं नेवाः दिवस नेपाः ११४१ ग्वसाः खलःया मू कजि सुरेन्द्रभक्त श्रेष्ठं न्ह्याकादीगु खःसा प्यक्वःगु हलिं नेवाः दिवस, नेपाः ११४१ प्रचार प्रसार कजि नविन जोशीं प्रे विज्ञप्ति ब्वनाः न्यंकादीगु खः ।

हलिंन्यंकं न्यनाः वनाच्वंपिं नेवाः समुदाय छप्पं छधी यायेगु आज्जुं हलिं नेवाः दबू नेपाः देय् मू कवःया ग्वसालय् वइगु शनिवाः मार्च २७ तारिखया दिं जुइगु हलिं नेवाः दिं (विश्व नेवाः दिवस)य् येँ महानगरपालिकाया मेयर विद्यासुन्दर शाक्य मूपाहाँ कथं उपस्थित जुइगु जानकारी उगु पत्रकार सम्मेलनय् ब्यूगु दु ।

पत्रकार सम्मेलनय् सार्वजनिक याःगु प्रेस विज्ञप्तिइ धयातःगु दु, हलिं नेवाः दबूया थीथी गतिविधि कःघानाः विशेषांक विमोचन जुइगु व नेवाः समाज व नेपालभाषा ख्यः थपू यायेगु नितिं योगदान बियादीपिं च्याम्ह विशिष्ट व्यक्तित्वपिन्त हनेगु ज्याझ्वः दु ।

अथेहे उगु हलिं नेवाः दिंकुन्हु जुइगु विशेष ज्याझ्वलय् लोकंह्वाःम्ह संगीतकःमि मदुम्ह रमेश ताम्राकारया लुमन्तिइ स्वंगू सिरपाः न्हापांगुखुसि नगदलिसें लःल्हाइगु ज्याझ्वः दूगु जानकारी नं पत्रकार सम्मेलनय् ब्यूगु दु ।

सार्वजनिक जूगु विज्ञप्तिइ न्ह्यथनातःगु दु, नेपाःया नेवाः म्ह्याय् मचालिसें संचार ख्यलय् सक्रिय जुयाः न्ह्यज्यानाः च्वनादीम्ह पत्रकार मय्जु कल्पना महर्जनं नेवाः व चीन निगुलिं मोहडां सगरमाथा गयाः गिनि बुक अफ वर्ल्ड रेकर्डसय् नां तयेत ताःलाःगुलिं वय्कःयात नं नगदलिसें हनेज्या यायेत्यनागु दु ।

नेवाःत वर्तमान अवस्थाय् गुकथं न्ह्यज्यां वनेमाः धैगु विषयस ...हलिं नेवाः चुनौती व अवसर... विषयस बहस ज्याझ्वलय् नेवाः न्ह्यलुवाःपिं मल्ल के. सुन्दर, परराष्ट्रविद् हिरण्यलाल श्रेष्ठ व नेवाः न्ह्यलुवाः डा. महेशमान श्रेष्ठपिन्सं मू न्वचू बिइगु जानकारी नं सार्वजनिक जूगु प्रेस विज्ञप्तिइ न्ह्यथनातःगु दु ।

थुकिया लिसें नेपालभाषा साहित्य ख्यलय् विशेष योगदान बियादीपिं नेवाः पूर्खापिनि किपाः ब्वज्या, नेवाः नसात्वँसाया स्टल, थीथी नांजाःपिं कलाकार व संघसंस्थापाखें सांस्कृतिक ज्याझ्वः न्ह्यब्वया नं चैत्र १४ गते शनिवाःया हलिं नेवाः दिं ज्याझ्वलय् दुथ्याइगु जानकारी ब्यूगु दु ।

सार्वजनिक जूगु विज्ञप्तिइ धयातःगु दु, नेवाःतय्गु गौरवयात हलिंन्यंकं न्यंकेगु नितिं न्हापांगु हलिं नेवाः सम्मेलनया झ्वलय् हलिंन्यंकं मार्च महिनाया दकले लिपांगु शनिवाः हलिं नेवाः दिंकथं हनेगु घोषणा जूगु खः । सन् २०१८ निसें न्ह्याःगु हलिं नेवाः दिं हनेगु झ्वलय् थगुने २०२० स कोभिड १९ या हुनिं जूम एपपाखें यायेमाःगु खः । थुगुसी प्यक्वःगु हलिं नेवाः दिवस तःजिक येँया बसन्तपुरया दबुली तःजिक न्यायेकाः हनेज्या जुइत्यंगु दु ।

मंगलवाः जूगु पत्रकार सम्मेलनय् हलिं नेवाः दबू नेपाः देय् कवःया नायः शाक्य सुरेन, लोककवि राजभाई जकःमिलिसें थीथी व्यक्तित्वपिनिगु सहभागिता दूगु खः ।

Categorized in नेवाः