nepal life 2076 3 18

शनिवाः किपुली निक्वःगु किपू मेयर कप खुल्ला ब्याडमिन्टन कासाया उलेज्या

नेवा: अनलाइन न्युज – ललेन्द्र शाक्य | २०७८ श्रावण २९, शुक्रबार ११:५१:००

कासाय् न्हाप लाःम्हेसित ५०,०००/– तका, ल्यू लाःम्हेसित ३०,०००/– तका व लियांल्यू लाःम्हेसित २०,०००/– तका सिरपाः

किपू नगरपालिका २ वडा द्यःध्वाखा त्वालय् च्वंगु खेलकूद विकासया नितिं सक्रिय क्लब ईन्द्रायणी परिवार क्लबया ग्वसालय्, किपू नगरपालिका २ वडा, देवढोका ब्याडमिन्टन ग्रुप, कीर्तिपुर ब्याडमिन्टन क्लबया विशेष ग्वाहालिइ व किपू नगरपालिकाया सहकार्यस ने.सं. ११४१ गुंलाथ्व खस्थि (श्रावण ३० गते) शनिवाः सुथय् ७ ता इलय् निक्वःगु किपू मेयर कप खुल्ला  ब्याडमिन्टन कासाया उलेज्या जुइगु जूगु दु ।

किपूया २ वडा द्यःध्वाखाय् च्वंगु खेल मैदानय् जुइगु उगु उलेज्या ज्याझ्वलय् मूपाहाँ किपू नगरपालिकाया मेयर रमेश महर्जनया ल्हाःतं उलेज्या जुइगु जानकारी ग्वसाः खलः ईन्द्रायणी परिवार क्लबं ब्यूगु दु ।

ज्याझ्वलय् किपू नगरपालिकाया उपमेयर लिसें नगरपालिकाया प्रवक्ता सरस्वती रिजाल खड्का विशेष पाहाँ कथं झाइगु व नेपाल ब्याडमिन्टन संघया नायः श्रीराम श्रेष्ठ व कीर्तिपुर ब्याडमिन्टन संघया नायः दयाराम डंगोल पाहाँ कथं उपस्थित जुइगु जानकारी नं ग्वसाः खलकं ब्यूगु दु ।

अथेहे, ज्याझ्वलय् किपू नगरपालिकाया सकल जनप्रतिनिधिपिनिगु नं विशेष उपस्थिति दइगु जानकारी ब्यूगु दु ।

ज्याझ्वलय् किपू नगरपालिका २ वडाया वडाध्यक्ष लिसें नगरपालिकाया संस्कृति सम्पदा पर्यटन विभागया कजि लिसें ग्वसाः खलः क्लबया सल्लाहकार रमेशमान डंगोलं लसकुस यासें न्ह्याइगु निक्वःगु किपू मेयर कप ब्याडमिन्टन कासाया उलेज्या ज्याझ्वलय् सकलसित उपस्थितिया नितिं ग्वसाः खलः इन्द्रायणी परिवार क्लबं इनाप याःगु दु ।

ग्वसाः खलः ईन्द्रायणी परिवार क्लबं कासाय् न्हाप लाःम्हेसित ५०,०००/– तका, ल्यू लाःम्हेसित ३०,०००/– तका व लियांल्यू लाःम्हेसित २०,०००/– तका सिरपाः बिइगु जानकारी ब्यूगु दु ।

निक्वःगु किपू मेयर कप खुल्ला ब्याडमिन्टन कासाय् ब्वति कायेगु नितिं साउन २८ बिहिवाःतकया ई ब्यूगु खः ।

Categorized in कासा