zero media family planning adv

शताब्दी पुरुष सत्यमोहन जोशीया डकुमेण्ट्री पिदन

नेवा: अनलाइन न्युज – विजयरत्न | २०७७ फाल्गुण ११, मंगलबार १४:२१:२०

वाङ्गमय  शताब्दी पुरुष  डा. सत्यमोहन जोशी वृत्तचित्र निर्माण पुचः व यल महानगरपालिकाया ग्वसालय् निर्माण जुउगु शताब्दी पुरुष सत्यमोहन जोशीया जीवनीया डकुमेण्ट्री “म्वानाच्वंगु इतिहास वाङ्गमय शताब्दी पुरुष सत्यमोहन जोशी”  वाङ्गमय  शताब्दी पुरुष सत्यमोहन जोशीं छगू ज्याझ्वःया दथुइ पितब्वज्या जुउगु दु ।  

उकिया नापनापं  वाङ्गमय शताब्दी पुरुष सत्यमोहन जोशी श्रव्यदृश्य आर्काइभ निर्माणया न्हापांगु क्यनेज्या न जुउगु दु ।

यल कुपन्डोलया सातोआकी स्मृति भवनय् जूगु थुगु ज्याझ्वः सत्यमोहन जोशी वृत्तचित्र निर्माण पुचःया नायः डा. पुष्पराज राजकर्णिकारया सभानायःसुइ जूगु खः ।

ज्याझ्वलय् विशेष पाहाँ कथं वाङ्गमय शताब्दी पुरुष सत्यमोहन जोशीया नं ब्वति दुगु खःसा मूपाहाँ कथं यल महानगरपालिकाया मेयर चिरीबाबु महर्जन झायादीगु  खः ।

ज्याझ्वलय् डकुमेण्ट्री दयेकेत आर्थिक ग्वाहालि यानादीपिं  मोतिलाल शिल्पकार, डा. सुमित्रा मानन्धर, यज्ञरत्न धाख्वाः, कैलाशभक्त प्रधानाङ्ग, लक्ष्मीदास मानन्धर, नेवाः देय दबू, नेपालभाषा एकेडेमीयात ग्वसाः खलःपाखें सुभाय् कथं सम्मान यागु खः ।

डकुमेण्ट्री निर्माण पुचःया दुजः शाक्य सुरेनं लसकुस यानादीगु ज्याझ्वलय् विशेष पाहाँ जोशी, मूपाहाँ महर्जन व सभानायः डा. पुष्पराज राजकर्णिकारपिन्सं डकुमेण्ट्रीयात कयाः थःथःगु नुगःखँ तयादीगु खःसा निर्माण पुचःया दुजः सुनिता राजभण्डारीं सुभाय् देछानादीगु खः ।

Categorized in नेवाः