1142 nhoo dan adv

शंखधर साख्वाः सामाजिक कल्याणया प्रतीक – मल्ल के. सुन्दर

नेवा: अनलाइन न्युज – नेवाः अनलाइन न्युज | २०७८ कार्तिक २९, सोमबार ०७:५४:३२

न्हूबाखंमुना ‘धुक्‌धुक् धुक्‌धुक्’ पितब्वज्या

येँ, २९ कार्तिक २०७८ – शंखधर साख्वाःयात सामाजिक कल्याणया प्रतीककथं कयाः हे राष्ट्रिय विभूति घोषणा जूगु सकल अभियन्तातय्‌सं ध्वाःथुइमाःगु खँ नेवाः न्ह्यलुवाः मल्ल के. सुन्दरं कनादीगु दु ।

शंखधर दिवस हनेगु झ्वलय् येँया शंखधर पार्कय् आइतवाः जूगु छगू ज्याझ्वलय् विशेष पाहांकथं थःगु मन्तव्य तयादीसें मल्ल के. सुन्दरं उगु खँ कनादीगु खः । “गथे भगवान् बुद्धयात विश्व शान्तिया दूतकथं कयाः नेपालं राष्ट्रिय विभूति घोषणा यात, अथे हे शंखधर साख्वाःयात नं संयुक्त राष्ट्र संघं सामाजिक कल्याणया प्रतीककथं काःगु जुयाः नेपालं राष्ट्रिय विभूति घोषणा याःगु खः । थ्व खँ सकल नेपाल संवत्यात आन्दोलनकथं न्ह्याकाच्वंपिंसं ध्वाथुइकेमाःगु दु,” मल्ल के. सुन्दरं धयादीगु दु ।

नेपाल संवत्‌या प्रवर्तक शंखधर साख्वाःयात राष्ट्रिय विभूति घोषणा याःगु दिं कछलाथ्व १० यात शंखधर दिवसकथं हनावयाच्वंगु दु ।

नेपाल संवत् न्हूदँ राष्ट्रिय समारोह समिति ११४२ या इनापय् येँ महानगरपालिका २५ व २८ वडाया स्थानीय खलः, पुचःतय् ग्वसालय् जूगु उगु ज्याझ्वलय् बाखंच्वमि भाजु राकेश महर्जनया ‘धुक्‌धुक् धुक्‌धुक्’ सफूया नं पितब्वज्या जुल ।

न्हूदँ समारोह समितिया नायः निरञ्जनरत्न शाक्यया सभापतित्वय् जूगु ज्याझ्वलय् शाक्यलिसें नेवाः न्ह्यलुवाः मल्ल के. सुन्दर, नागार्जुन पब्लिकेशनया नायः डा. सर्वोत्तम श्रेष्ठ व साहित्यकार नारद वज्राचार्यं मंकाःकथं सफू पितब्वयादिल । ज्याझ्वलय् येँमनपा २७ वडाया नायः चिनियाकाजी वज्राचार्यया नं उपस्थिति दुगु खः ।

नागार्जुन पब्लिकेशनया लुखां पिदंगु उगु सफू पिदंगु खः ।

पितब्वःगु सफूया विषय न्ववानादिसें साहित्यकार वज्राचार्यं नेपालभाषाया बाखं साहित्यय् न्हूगु प्रयोग ज्वनाः सफू पिदंगु दु धयादिल । नेपालभाषा बाखं साहित्यय् थौंकन्हय् मनोविश्लेषणात्मक बाखं च्वयेगु म्हो जुयावंगु इलय् थ्व ह्याकिं पूवंकेत भाजु महर्जन झाःगु व मनोविश्लेषणात्मक बाखं ख्यलय् छगू ग्यसुग्यंगु बाखंसफूकथं थुकियात कायेज्यूगु खँ साहित्यकार वज्राचार्यं तयादीगु दु ।

ज्याझ्वलय् शंखधर साख्वाःया किपा अंकित कपि नं पितब्वज्या जूगु खः ।

ज्याझ्वलय् जगतसुन्दर ब्वनेकुथि मा.वि.या प्रिन्सिपल सुनिता मानन्धरलिसें ब्वनेकुथिया ९ व १० तगिंया विद्यार्थीपिनि नं ब्वति दुगु खः । उपस्थित पाहांपिंसं विद्यार्थीतय्‌त अन पितब्वज्या जूगु कपि नं लःल्हाःगु खः ।

ज्याझ्वलय् २५ वडाया समाजसेवी रोशनकाजी तुलाधरं लसकुस न्वचु बियादीगु खःसा २५ वडाया वडासचिव परिवेश वज्राचार्यं सुभाय् बियादीगु खः । ज्याझ्वःयात दिपक तुलाधरं न्ह्याकादीगु खः ।

शंखधर साख्वाःया तस्बिर दुगु बेलुन ब्वयेकाः न्हूकथं उलेज्या जूगु उगु ज्याझ्वः क्वचायेकाः पार्कय् पाल्चा च्याकाः दीपावली नं याःगु खः ।

Categorized in नेवाः