zero media family planning adv

वीरगञ्जया मेयरयात कोरोना संक्रमण

नेवा: अनलाइन न्युज – ललेन्द्र शाक्य | २०७७ श्रावण १६, शुक्रबार १२:१२:१८

वीरगञ्ज महानगरपालिकाया मेयर विजयकुमार सरावगीयात कोरोना भाइरस कोभिड १९ संक्रमण पुष्टि जूगु दु ।

स्वास्थ्य परीक्षणया नितिं येँय् थ्यंकूम्ह मेयर सरावगीया अन स्वाब संकलन यानाः परीक्षण याःगु खः । परीक्षण रिपोर्ट पोजेटिभ वःगु जानकारी मेयर सरावगीं ब्यूगु दु ।

मेयर सरावगीं धाःगु दु, छिकपिनिगु सेवाय् अनवरत रुपं जुजुं जि स्वयं कोरोनाया संक्रमणया चपेटाय् लाःगु दु । येँया छगू अस्पतालय् वासः जुयाच्वंगु दु ।

कोरोना संक्रमणयात त्याकाः हाकनं नगरबासीया सेवाय् लिहाँ वयेगु तकं मेयर सरावगीं धाःगु दु ।

वीरगञ्जय् कोरोना समुदाय स्तरय् ब्वलनाः वयाच्वंगु कथं कयातःगु दु । मेरि सरावगी भारतपाखें वःपिं च्वनाच्वंगु क्वारेन्टाइन, संक्रमितपिनिगु आइसोलेसनय् खटेजुयाः वयाच्वंगु खः ।

मेयर सरावगीं चन्दा मुंकाः पीसीआर मेसिन न्यायेगु ज्या याःगुलिसें क्वारेन्टाइन, आइसोलेसन व कोभिड अस्पतालय् दुपिं संक्रमितलिसें अस्पतालय् ज्या यानाच्वंपिं डाक्टर, स्वास्थ्यकःमि व सचुपिचु याइपिनिगु नयेगु व च्वनेगु व्यवस्था मिलेयाःगु खः ।

Categorized in स्थानिय-समाज