nepal investment baink

विश्वास बज्राचार्यया न्हूगु होलि म्ये पिदनीगु

नेवा: अनलाइन न्युज – विजयरत्न | ने.सं. ११४४ चिल्लाथ्व द्वादसी (२०८० चैत्र ८ गते) बिहिवाः

होलि न्ह्यःने वःलिसे होलि म्येया चर्चा जुयावइ । होलि म्ये पिदना वइ । म्युजिक भिडियो पिदना वइ ।

रङ्गया उत्सव कथं हनाः वयाच्वंगु होलि न्ह्योने वःलिसे थुकिया लिच्वः गीतसङ्गीतय् नं लानावःगु दु । थ्वहे झ्वलय् थौंकन्हे थीथी होलि म्येया शुटिंग जुयाच्वंगु खँ पिहाँ वयाच्वंगु दुसा अज्याःगु हे छपु होलि म्येय् “बसन्तया बेला छिगु मन गन ला ?” बोलया म्येया शुटिंग ख्वपय् क्वचाःगु दु ।

थ्व म्ये च्वःम्ह विश्वास बज्राचार्य खः। विश्वास बज्राचार्ययात आपासिनं छम्ह दुग्यंम्ह म्युजिक भिडियो निर्देशक कथं म्हसीका वयाच्वंगु दु । थ्व म्युजिक भिडियोया निर्देशन नं विश्वास बज्राचार्यं हे याःगु खः । थ्व सिबें न्ह्यः भाजु बज्राचार्यं अंग्रेजी, खस नेपाली, मैथलि लगायत थीथी भाय् दुथ्याकाः मल्टिकाष्ट होलि म्येया म्युजिक भिडियो पिकानादीगु खःसा थुगुसिइ नं बिस्कं सवाःया भिडियो जुउगु विश्वास यानातःगु दु ।

नेवाःख्यःया आपालं कलाकारपिनिगु ब्वति दूगु थ्व होलि म्येय् पुलांपिं कलाकार श्यामसुन्दर शिल्पकार व अर्णेश्वरी शिल्पकारया नापनापं रोजिना सुवाल व किरण जोशीं मू भूमिका म्हितातःगु दुसा थुके सुजना बज्राचार्य, सिताराम माक, शान्ति राजबाहक, चिरीबाबु महर्जन लगायतया आपालं कलाकारपिन्सं म्हिता तःगु दु । थुकिया हुला प्याखँ उपासना शाक्यं स्यनादीगु खः ।

थ्व भिडियोया प्रोजेक्ट डाइरेक्टर उजय शाही खः । श्वेता शाक्यं समाः यानादीगु खःसा वसः तिसा संयोजन महेशप्रकाश हाडा, छायांकन व सम्पादन आकृष्ट शाक्य, भिजुअल इफेक्ट बिजनराज बज्राचार्यं यानादीगु खः ।

थ्व म्ये सुरेन्द्र श्रेष्ठं लसय् हनादीगु खः। थ्व म्ये हालादीपिं सुरेन्द्र श्रेष्ठ व दिपा महर्जन खःसा थुके रत्नशोभा महर्जनं साथ बियादीगु खः ।

Categorized in कला