nepal investment baink

विश्वकप फुटबल : थौं निगू कासा, स्पेन व जापान, जर्मनी व कोस्टारिकादथुइ भिडन्त

नेवा: अनलाइन न्युज – ललेन्द्र शाक्य | २०७९ मङ्सिर १५, बिहिबार १४:३५:०५

जर्मनीयात त्याके हे माःगु दबाब, जापान मेगुु अप्रत्यासित लिच्वःया झ्वलय्

कतारय् जुयाच्वंगु फिफा विश्वकप फुटबल २०२२ य् समूह ई या स्पेन व जापान अले जर्मनी व कोस्टारिकादथुइ निगू कासा थौं बिहिवाः छगू हे इलय् चान्हय् १२ंः४५ ता इलय् जुइगु जूगु दु । कतारय् जुयाच्वंगु विश्वकप फुटबलया थ्व हे छगू उज्वःगु समूह खः गुकी निगू देश पूर्व विजेता खः ।

विश्वकप न्ह्यः २०१० या च्याम्पियन स्पेन व २०१४ या च्याम्पियन जर्मनीयात थुगु समूहपाखें नकआउट चरण थ्यंकीगु टिमया रुपं कयातःगु दु । तर समूह चरणय् फुक्क  टिमं निगू निगू कासा म्हितेधुंकाः थुगु समूहया कासा रोमाञ्चक जूगु दु ।

थ्व समूहया न्हापांगु कासाय् हे जर्मनी जापानलिसे बूगु खः, स्पेनं कोस्टारिकाया पोष्टय् न्हयगू गोल यातसा मेगु कासाय् कोस्टारिकां जापानयात बुकल ।

थौं बिहिवाः लिपांगु कासा म्हितेत्यंगु थुगु समूहया प्यंगुलिं टिमया लिपांगु १६ य् थ्यनीगु सम्भावना धाःसा कायम हे दु ।

थौं बिहिवाः चान्हय् स्पेन व जापान अले जर्मनी व  कोस्टारिकादथुइ जुइगु कासा धुंकाः न्ह्यःने वनीगु व पिहाँ वनीगु टिमया निर्णय जुइ । थुगु समूह दुने छगू जित व छगू बराबरीपाखें ४ अंकलिसें स्पेन शीर्ष स्थानय् दु ।

जापान व कोस्टारिकाया समान ३ अंक दु व छसिंकथं निगूगु थासय् व स्वंगूगु थासय् दु । निगुलिं टिमं छगू कासा म्हितूबलय् छगू कासा बूगु खः । अथेहे छगू कासा बराबरीपाखें १ अंक मुंकूगु जर्मनी दकले ल्यूने लानाच्वंगु दु ।

थुगु समूहपाखें स्पेन सहज अवस्थाय् खनेदुसा जर्मनीयात आपालं दबाब दु । जापान व कोस्टारिका धाःसा थःपिनिगु अनुकुल लिच्वः पियाच्वंगु दु ।

सुयात छु लिच्वः माः ?

स्पेनया नितिं जापानलिसे जित वा बराबरीं लिपांगु १६ य् थाय् दयेकी । जापानयात बुकूसा स्पेन समूह विजेता हे जुइ । जापानलिसे बूसां नं स्पेन लिपांगु १६ य् थ्यनीगु सम्भावना दु । उकिया नितिं जर्मनी व कोस्टारिकां बराबरी म्हितेमाः कि जर्मनीं हार तारेयायेमाः । जापानलिसे बूसा व कोस्टारिकां जर्मनीयात बुकूगु स्थितिइ स्पेन आउट जुइ ।

जापानया नितिं धाःसा लिपांगु १६ य् थ्यनेत स्पेनयात बुके हे माः । स्पेनलिसे बुत धाःसा जापान समूह चरणं पिहाँ वनी । स्पेनलिसे बराबरी जूसा जापानं मेगु कासाया लिच्वलय् भर परेजुइमालीगु जूगु दु ।

न्हापांगु कासाय् कोस्टारिकायात ७–० गोल अन्तरं बुकूगु स्पेन निगूगु कासाय् जर्मनीलिसे १–१ या बराबरीइ द्यूगु खः । न्हापांगु कासाय् जर्मनीयात २–० गोल अन्तरं स्तब्ध याःम्ह जापान निगूगु कासाय् धाःसा कोस्टारिकालिसे स्तब्ध जूगु खः । जापान हाकनं जर्मनीलिसेया कासाया थें मेगु अप्रत्यासित लिच्वः पियाच्वंगु दु ।

मेगु कासाय् कोस्टारिका व जर्मनी म्हितीबलय् निगुलिं टिमया आज्जु त्याकेगु हे जुइ । जर्मनीयात बुकूसा कोस्टारिका लिपांगु १६ य् थ्यनी । अथेहे, जर्मनीलिसे बराबरीं नं कोस्टारिका न्ह्यःने वनेफु तर उकिया नितिं स्पेनं जापानयात बुके हे मालीगु जुइ । निगुलिं कासा बराबरी जूसा व जर्मनीलिसे बूसा कोस्टारिका पिहाँ वनी ।

जर्मनीया नितिं नकआउट चरणय् थाय् दयेकेगु खःसा कोस्टारिकाविरुद्धया कासा न्ह्यात्थें जूसां नं त्याके हे माःगु स्थितिइ थ्यंगु दु । मेगु कासाय् स्पेनं जापानयात बुकूसा जर्मनी थःगु कासा त्याकुसें लिपांगु १६ य् थ्यनी ।

यदि जापानं स्पेनयात बुकल धाःसा जर्मनी व स्पेनया समान ४ अंक जुइ, थुकी गोल अन्तर निर्णायक जुइ । जर्मनीया नितिं दकले बांलाःगु समीकरण धयागु थःगु कासा त्याकेगु अले स्पनें नं जापानयात बुकेमालीगु जूगु दु । बराबरी वा हारं धाःसा जर्मनी समूह चरणं पिहाँ वनी ।

Categorized in कासा