coved ad

विराटनगर जेलय् निगू समूह दथुइ ल्वापु

नेवा: अनलाइन न्युज – ललेन्द्र शाक्य | २०७८ कार्तिक २३, मंगलबार १५:३६:४९

कैदीबन्दीया निगू समूह दथुइ ल्वापु जुयाः विराटनगर जेल तनावग्रस्त जूगु दु । चौकीदार किरण गुरुङविरुद्ध मेगु समूह आक्रमणय् क्वाहाँ वयेधुंकाः ल्वापु जूगु खः । ल्वापुइ लानाः न्याम्ह घाःपाः जूगु दु ।

मंगलवाः सुथय् हे गुरुङ समूहयात न्हूगु दयेकूगु समूह नं कोथाय् कुनाब्यूगु खः । वधुंकाः ल्वापु जूगु खः । निगू पक्षदथुइ ल्वापुया झ्वलय् नाइके किरण गुरुङ, शेखर राई, निर्मल ढकाल, विशाल मोक्तान, डिल्ली देवान व सूर्यदीप गुप्ता घाःपाः जूगु खः । इमित वासः यायेगु नितिं कोशी अस्पताल यंकूगु दु ।

गुरुङ समूहविरुद्ध विद्रोह यायेगु झ्वलय् १४ म्ह नाइके व भाई नाइकेपिन्त कैदीबन्दीं कोथाय् कुनाब्यूगु खः । वहे झ्वलय् दोहोरो ल्वापु जूगु खः ।

गुरुङ समूहया १४ म्हेसित जेलं पितहयाः मेगु जेलय् यंकेगु तयारी जूगु सीदूगु दु । इमित दुने यंकेबलय् जेल दुने ल्वापुया खतरा अप्वयेधुंकाः सारेयायेत्यंगु खः ।

विराटनगरय् च्वंगु जेलय् किरण गुरुङ नेतृत्वया समूह हाबी जुयाच्वंगु खः । उगु समूह नं अभिषेक गिरीयात डिल्लीबजारं यंकूबलय् विरोध याःगु खः । वधुंकाः गिरीयात सप्तरी जेलय् यंकूगु खः ।

जेलय् चौकीदार व नाइके जुयाः समूह दयेकेगु परिपाटीं ल्वापुया घटनात जुइगु जुयाच्वंगु दु । थीथी समूह दयेकाः ल्वापुया घटनात जुइगु जुयाच्वंगु दु ।

विगतय् केन्द्रीय कारागार नख्खु, डिल्लीबजार, वीरगञ्ज लिसेंया ततःधंगु जेलय् ल्वापुया घटनात जूगु दु । गुलिखे घटनाय् ज्यान तकं वंगु दु ।

Categorized in दुर्घटना-अपराध