kmc bidya

विराटनगरय् वासः व्यापारी दुलाल सिनाच्वंगु अवस्थाय्, घटना शंकास्पद !

नेवा: अनलाइन न्युज – ललेन्द्र शाक्य | २०७७ जेठ ४, आइतबार १४:२९:४४

विराटनगरया छम्ह वासः व्यवसायी सिनाच्वंगु अवस्थाय् लुयावःगु दु ।

विराटनगर महानगरपालिका १० मधुमारा च्वनाः वयाच्वंम्ह सुनसरीया ३३ दँया देवीप्रसाद दुलाल सिनाच्वंगु अवस्थाय् लुयावःगु खः । 

आइतवाः सुथय् सिनाच्वंगु अवस्थाय् लुयावःम्ह दुलालया म्हगलय् वच्चूगु दाग खनेदूगु खः । घटना शंकास्पद खनेदयेधुंकाः प्रहरीं अनुसन्धान न्ह्याकूगु दु ।

सीम्हेसिगु म्हगलय् वच्चूगु दाग लुयावःगु जिल्ला प्रहरी ज्याकुथि मोरङया प्रहरी नायव उपरीक्षक मानबहादुर राई नं जानकारी ब्यूगु दु ।

सीम्ह पोष्टमार्टमया नितिं कोशी अस्पताल छ्वःगु प्रनाउ राइ नं धाःगु दु । राई नं धाःगु दु, ‘म्हगलय् वच्चूगु दाग खनेदूगुंिलं अनुसन्धान न्ह्याकागु खः । घटना शंकास्पद तिनि । पोष्टमार्टम लिपा छु खः सीदइ ।’

दुलाल शनिवाः बहनी लिबाक्क विराटनगरया निम्ह पासापिं लिसें च्वनाच्वंगु खः । बहनी लिबाक्क डेराय् वयाः द्यंवःमह सुथयु अचेत अवस्थाय् लुयावःगु खः ।

देवी मां पाथीभरा फर्मा न्ह्याकाः वयाच्वंम्ह दुलाल बहनी देनाच्वंगु थासय् हे अचेत अवस्थाय् लुयावयेधुंकाः कलाःम्हं आइतवाः सुथय् थ्यंमथ्यं ३ ता इलय् कोशी अस्पताल यंकूगु खः ।

सीम्ह दुलालया न्हाय्, ल्हाः, ककु व मिखाप्वालय् घाः जुयाच्वंगु खनेदयेधुंकाः प्रहरीं न्यनेकनेया नितिं कलाःम्ह व शनिवाः बहनी नापं च्वंपिं निम्हेसित नियन्त्रणय् काःगु दु ।

मदुम्ह दुलाललाय कलाः व ८ दँया काय् छम्ह दु ।

Categorized in दुर्घटना-अपराध