Newa Ekata Diwas Gosthi Adv

विराटनगरय् एम्बुलेन्स दुर्घटना, छम्ह विरामी सित

नेवा: अनलाइन न्युज – ललेन्द्र शाक्य | २०७७ मङ्सिर १५, सोमबार ११:५१:१८

विराटनगरय् एम्बुलेन्स दुर्घटना जुयाः छम्ह विरामी सीगु दु । दुर्घटनाय् स्वम्ह घाःपाः जूगु दु ।

विराटनगर महानगरपालिका ४ कञ्चनबारीइ च्वंगु कोशी राजमार्गय् दिकातःगु भारतीय लहरीइ वंगु चान्हय् थ्यंमथ्यं १ ता इलय् एम्बुलेन्स ठक्कर नयाः सप्तरीया तिलाठी कोइलाडी २ या ६५ दँया नुनुलाल मण्डलया ज्यान वंगु खः ।

एम्बुलेन्स ठक्कर नयाः तच्वकं घाःपाः जूम्ह मण्डलया वासः यायेगु झ्वलय् नोबेल शिक्षण अस्पतालय् ज्यान वंगु मोरंग प्रहरी प्रमुख एसपी सन्तोष खड्कां जानकारी ब्यूगु दु ।

सप्तरीपाखें विरामी ज्वनाः विराटनगरपाखे वनाच्वंगु स१च ११२२ ल्याःया एम्बुलेन्स सकतय् दिकातःगु एनएल०१एल ०३३६ ल्याःया भारतीय लहरीइ ल्यूनेपाखें ठक्कर नःगु खः ।

ऋाकाझाकां दमं च्यापेजुइधुंकाः मण्डलयात बीपी विचार समाज राजविराजया एम्बुलेन्सय् तयाः वासः यायेगु नितिं विराटनगरया गोल्डेन अस्पतालपाखे यंकाच्वंगु खः । सीम्ह मण्डल दमया पुलांम्ह ल्वगि जूगु सीदूगु दु ।

दुर्घटनाय् एम्बुलेन्सय् च्वनावंपिं तिलाठी कोइलाडीया हे ३० दँया जितेन्द्र मण्डल, ५० दँया रामसुन्दर मण्डल व ४५ दँया भोलिदेवी मण्डल घाःपाः जूगु दु । स्वम्हेसिगु नं नोबेल शिक्षण अस्पतालय् वासः जुयाच्वंगु दु ।

एम्बुलेन्स चालक हरिनारायण यादव बिस्युं वंगु दु । लहरीया चालक नं फरार जुयाच्वंगु हुनिं मालेगु ज्या जुयाच्वंगु प्रहरीं जानकारी ब्यूगु दु ।

Categorized in दुर्घटना-अपराध