2565 buddha Jayanti ADV

विप्लव वार्ताय् च्वनेत तयार

नेवा: अनलाइन न्युज – ललेन्द्र शाक्य | २०७७ फाल्गुण ९, आइतबार ११:०१:४९

नेत्रविक्रम चन्द विप्लव नेतृत्वया नेपाल कम्युनिष्ट पार्टी सरकारलिसे वार्ता यायेत तयार खनेदूगु दु । थ्वलिसें सरकार व उगु पार्टीदथुइ औपचारिक वार्ताया लुखा चालीगु खनेदूगु दु । विप्लव स्वयमं हे शनिवाः प्रेस विज्ञप्तिपाखें आमजनसमुदायस सहज गतिविधि व ज्याझ्वः यायेगु लकस जुइगु अवस्थाय् सरकारलिसे वार्ता यायेत सकारात्मक जूगु जानकारी ब्यूगु दु ।

विप्लवं अनौपचारिक संवादया झ्वलय् वार्ता यायेत प्रतिबन्ध फुकुवा यायेमाःगु, बन्दी नेता कार्यकर्तापिं त्वःतेमाःगु, औपचारिक पौ छ्वयाहयेमाःगु पूर्व सर्त तःगु खः । सरकारं पूर्व सर्तय् लचिलो जुइगु संकेत क्यनेधुंकाः औपचारिक वार्ताया लकस जुइत्यंगु खः ।

प्रतिबन्धित उगु पार्टीया महासचिव विप्लवं सार्वजनिक याःगु विज्ञप्तिइ धयातःगु दु, जिमिगु पार्टी क्रान्ति, राष्ट्र, समाज, अग्रगामी रुपान्तरण एवं जनसमुदायया हित व अधिकारया नितिं याःगु सचेत पहल खः । थुुकिया प्रक्रियाय् आमजनसमुदायया सहज गतिविधि व ज्याझ्वः यायेगु लकस दइगु अवस्थाय् जिमिगु पार्टी सरकारलिसे संवाद व वार्ताया नितिं सकारात्मक जूगु विषय फुक्कसित जानकारी बियाच्वना ।

(अन्नपूर्ण पोष्ट न्हिपौपाखें)

Categorized in पत्रपत्रिका