zero media family planning adv

विन्डोज सेभेन (windows 7) अन्त्य जुइन

नेवा: अनलाइन न्युज | २०७६ पौष २८, सोमबार १३:५३:०३

अमेरिकी कम्पनी माइक्रोसफ्टं थःगु विन्डोज सेभेन (windows 7) अपरेटिङ सिस्टमयात विधिवत् रुपं अन्त्य यायेगु तयारी याःगु दु । थुकिया नितिं माइक्रोसफ्टं विन्डोन सेभेन (windows 7)या नितिं उपलब्ध याकाः वयाच्वंगु सकतां सपोर्ट बन्द याइगु जूगु दु । थुकियात माइक्रोसफ्टया जीवनया अन्त्य अर्थात end of lifeÚ धाःगु दु ।

प्रविधिया भाषां इण्ड अफ लाइफ end of lifeÚ अर्थात् EOL धैगु भाइरस अर्थात् बग फिक्स यायेगु सेवा, सेक्योरिटी अपडेट व न्हूगु फिचरत उपलब्ध जुइगु त्वःतेगु खः । थुकिं प्रयोगकर्तापिं मालवेयर आक्रमणया उच्च जोखिमय् लाइ ।

लुमंकेबहःजू, सन् २०१५ या जनवरीनिसें हे माइक्रोसफ्टं विन्डोज सेभेन (windows 7)य् मेनस्ट्रिम सपोर्ट बन्द याःगु खः । वइगु जनवरी १४ निसें धाःसा विन्डोज सेभनय् ल्यःदूगु सेवात नं माइक्रोसफ्टं बन्द याइगु जूगु दु । आः ला छगू दशक पुलांगु विन्डोज सेभेनया प्रयोगकर्तापिन्सं थःगु अपरेटिङ सिस्टमयात विन्डोज १० (windows 10) य् अपडेट यायेमालीगु जूगु दु ।

थःगु कम्प्युटरयात भाइरस व मेमेगु साइबर जोखिमपाखें सुरक्षित यायेगु नितिं अपरेटिङ सिस्टमयात विन्डोज १० (windows 10) य् अपग्रेड यायेगु नितिं माइक्रोसफ्टं फुक्क प्रयोगकर्तापिन्त आग्रह याःगु दु ।

छगू मेगु बुखँ कथं माइक्रोसफ्टं विन्डोज सेभेन (windows 7) यात पूर्णरुपं बन्द धाःसा याइमखु । आः नं हलिंन्यंकं लखौं व्यक्तिगत व कर्पोरेट प्रयोगकर्तापिन्सं थःगु कम्प्युटरय् विन्डोज सेभेन छ्यलाबुला यानाच्वंगु दु । उज्वःपिं प्रयोगकर्तापिं गुम्ह विन्डोज सेभेन हे छ्यलाबुला याये चोहजू इमिसं विन्डोजया सेक्योरिटी सपोर्ट प्राप्त यायेगु नितिं थिकेगु शुल्क पुलेमाली । क्यास्पर्स्कीया छगू रिपोर्ट कथं आः नं हलिंया ४० प्रतिशत चीधंगु कम्पनी व ४८ प्रतिशत मध्यम व तःधंगु कम्पनीतसें थःगु ज्याकुथिइ विन्डोज सेभेन(windwos 7) छ्यलाबुला यानाच्वंगु दु ।

मेखे विन्डोज सेभेन चले हे जुइमखु धैगु नं मखु । यदि छिं थःगु कम्प्युटरय् दूगु विन्डोज सेभेन हे चलेयाये चाहे जूगु खःसा चलेयाये फइ । तर छिगु कम्प्युटरय् थीथी फिचरत चले मजुइगु जक मखु कि भाइरसया आक्रमणया जोखिम नं उच्च जुइ ।

लुमंकेबहःजू, सन् २०१७ स विन्डोज सेभेनय् वान्नाक्राइ भाइरसं आक्रमण याःगु खः ।

Categorized in बजाः