zero media family planning adv

विदेशं वइपिं अनिवार्य १० न्हु क्वारेन्टिनय् च्वने हे मालीगु

नेवा: अनलाइन न्युज – ललेन्द्र शाक्य | २०७७ चैत्र १२, बिहिबार ११:११:१४

म्याग्दी जिल्लाय् छिमेकी देय् व मेमेगु देसं वइपिन्त अनिवार्य १० न्हु क्वारेन्टिन एकान्तबासय् तइगु जूगु दु । जिल्ला प्रशासन ज्याकुथिइ बुधवाः च्वंगु सर्वपक्षीय बैठकं कोरोना भाइरसया संक्रमण ब्वलंके मबियत पूर्वतयारी, सतर्कता व व्यवस्थापनया नितिं १छ बुँदे निर्णय व मापदण्ड तयार याःगु खः ।

बैठकं विदेशं जिल्ला दुहाँ वइपिन्त अनिवार्य  १० न्हु क्वारेन्टिनय् च्वने हे माःगु व्यवस्था याःगु दु । प्रमुख जिल्ला अधिकारी गणेशबहादुर अधिकारीं भारतय् कोरोनाया निक्वःगु लहर सुरु जूगुलिं थुकिया लिच्वः नेपालय् नं लाइगु जूगु हुनिं विदेशं जिल्लाय् दुहाँ वइपिन्त अनिवार्य क्वारेन्टिनय् तयेगु निर्णय जूगु जानकारी ब्यूगु दु ।

अन्नपूर्ण गाउँपालिका ४ नारच्यांगय् निर्माणाधीन नीलगिरिखोला जलविद्युत आयोजनाय् ज्या यायेत भारतं वःपिं प्यम्ह मजदुर व जिल्ला कारागारया छम्ह कैदीयाके मंगलवाः कोरोना भाइरसया संक्रमण पुष्टि जूगु खः । भारतं वःपिं मजदुरपिंके कोरोना पुष्टि जुइधुंकाः विदेशं वइपिं छेँ बिदाय् वइपिन्त १० न्हु अनिवार्य क्वारेन्टिनय् तयाः जक छेँय् छ्वयेगु निर्णय जूगु स्वास्थ्य ज्याकुथि म्याग्दीया निमित्त प्रमुख एकनारायण लम्सालं जानकारी ब्यूगु दु ।

लम्सालया कथं बैठकं स्वास्थ्य मापदण्डयात पूर्ण रुपं कार्यान्वयन यायेगु, मासकया अनिवार्य छ्यलाबुला, स्थानीय तहलय् क्वारेन्टिन, आइसोलेसन कक्षयात हाकनं संचालनय् हयेगु व पीसीआर परीक्षणया दायरा तब्या यायेगु निर्णय याःगु दु ।

(नेपाल समाचार पत्र न्हिपौपाखें)

Categorized in पत्रपत्रिका