dudha jayanti 2568

विजयरत्नया स्वास्थ्य स्थीर, आःया नितिं गंगालालय् तयाः वासः याइगु

नेवा: अनलाइन न्युज – ललेन्द्र शाक्य | ने.सं. ११४४ चिल्लागा अस्तमि (२०८० चैत्र २० गते) मंगलवाः

सिने पत्रकार, झीगु सः टेलिभिजन ज्याझ्वःया निर्देशक, नेवाः अनलाइनन्यूजया संरक्षक लिसें नेपालभाषा ख्यःया सक्रिय व्यक्ति विजयरत्न असंबरेया स्वास्थ्य स्थीर जूगु दु ।

वय्कःयात येँया गंगालाल अस्पतालय् इमर्जेन्सी वार्डय् तयाः चिकित्सकपिन्सं स्वास्थ्य निगरानी यानाच्वंगु दु ।

म्हिगः सोमवाः बहनी आकाझाकां म्हं मफयाः पाटन अस्पतालय् यंकूगु खःसा अनं लिपा गंगालाल अस्पतालय् यंकूगु खः ।

थौं मंगलवाः सुथय् चिकित्सकपिन्सं महाराजगंजया मनमोहन कार्डियोलोजी अस्पतालय् वासः यायेगु नितिं रिफर यायेत्यंगु खःसा बरिष्ठ चिकित्सकपिन्सं छुं दिंया नितिं गंगालालय् तयाः स्वास्थ्य निगरानी यायेगु बांलाइगु सुझाब ब्यूगुलिं भाजु असंबरेयात गंगालालय् तयाः छुं दिं वासः याइगु जूगु दु ।

वय्कःया छेँजःपिन्सं ब्यूगु जानकारी कथं भाजु असंबरेयात म्हिगः सोमवाः बहनी ११ ता इलय् चःबि वनेत्यंबलय् आकाझाकां म्हय् सुगर मगानाः अशक्त जुयादीगु खः ।

चिकित्सकपिन्सं धाःकथं वय्कःया नुगःचुया नशा बन्द जूगु व क्रिटेनिया अप्वः जूगुलिं वासः जुयाच्वंगु जानकारी ब्यूगु दु ।

क्रिटेनिया वासः पाखें म्हो जुइवं हे नुगःचुया नशा चायेकेगु नितिं इन्डोप्लाष्ट यायेमालीगु खँ धाःगु दु ।

भाजु असंबरे आकाझाकां म्हं मफूगु खँ सामाजिक संजालय् वयेवं नेपालभाषा ख्यःया ब्यक्तिपिन्सं च्यूताः प्वंकाहःगु दु ।

Categorized in नेवाः