Header Nepal rastra bank Adv

वालय् निन्हु बिदा तत्काल लागु मजुइगु

नेवा: अनलाइन न्युज – ललेन्द्र शाक्य | २०७९ बैशाख ४, आइतबार ११:२२:१४

चैत्र २४ गते च्वंगु मन्त्रिपरिषदया बैठकय् वालय् निन्हु बिदा बिइगु व उकिया पलेसा वाःया न्यान्हु सुथय् ९ निसें ५ ता ईतक ज्याकुथि संचालन यायेगु विषयस सहलह जुल । थुकी सैद्धान्तिक सहमति नं जुल ।

मन्त्रिपरिषदय् सहलह जूगु विषय पिहाँ वयेधुंकाः बैशाख १ गतेनिसें वालय् निन्हु बिदा जुइगु अनुमान आपासिनं याःगु खः । तर उगु निर्णय कार्यान्वयनय् वःगु मदुनि । निजामति कर्मचारीपिं अझ नं वालय् निन्हु बिदा जुइगु या मजुइगु धैगु खँय् अन्यौलय् लानाच्वंगु दु ।

गुलिंसिनं बैशाख ४ गते आइतवाःनिसें सार्वजनिक बिदा जुइगु अनुमान नं याःगु दु । छम्ह मन्त्रीं धाःगु दु, ‘चैत्र २४ गते च्वंगु मन्त्रिपरिषदया बैठकय् थुकिया बारे सहलह जक जूगु खः । थ्व सहलहया विषय जक खः । थुकिया बारे निर्णय जूगु मदुनि ।’

वालय् निन्हु बिदा बिइगु सम्बन्धय् निर्णय मजूनिगु व थुकिया बारे छुं तयारी व गृहकार्य नं मजूगु संघीय मामिला व सामान्य प्रशासन मन्त्रालयया छ्याञ्जे (सचिव) सुरेश अधिकारीं धाःगु दु । अधिकारीं धाःगु दु, ‘मन्त्रिपरिषदय् सहलह जुल या मजुल, मसिल । तर थुकिया बारे छुं तयारी व गृहकार्य जूगु मदुनि । उकिं वालय् निन्हु बिदा बिइगु निर्णय तत्काल लागु जुइमखु ।’

गृहमन्त्रालयया प्रवक्ता फणिन्द्रमणि पोखरेलं नं वालय् निन्हु बिदा बिइगु विषयस पिने हल्ला जक जूगु धाःगु दु । पोखरेलं धाःगु दु, ‘थ्व फुक्क हल्ला जक खः , थुकिया बारे छुं तयारी व सहलह जूगु मदु ।’

विदा सम्बन्धय् मन्त्रिपरिषदय् प्रस्ताव यंकेगु भाला गृहया खः तर गृहया हे अधिकारीपिनिगु दथुइ थुकिया बारे सामान्य सहलह तकं मजूगु धाःगु दु ।

चैत्र २४ गतेया मन्त्रिपरिषदय् इन्धन व सार्वजनिक खर्च कटौती यायेत वालय् निन्हु विदा बिइगु विषयस सहलह जूगु खः ।

(नागरिक न्हिपौपाखें)

Categorized in पत्रपत्रिका