zero media family planning adv

वायु प्रदूषण हाकनं अप्वल : छेँस पिहाँ मवयेत सुझाब

नेवा: अनलाइन न्युज – ललेन्द्र शाक्य | २०७७ चैत्र २४, मंगलबार १०:२८:४८

स्वनिगःलिसें देय् न्यंकं हे वायु प्रदूषण हाकनं अप्वःगुलिं अत्यावश्यक ज्या बाहेक छेँ पिने पिहाँ मवनेत जनस्वास्थ्य विज्ञं सुझाब ब्यूगु दु । 

वायु प्रदूषणं स्वासप्रश्वासय् समस्या हइगु लिसलिसें थीथी स्वास्थ्य समस्या वयेफइगुलिं अत्यावश्यक ज्या बाहेक छेँ पिने पिहाँ मवनेत व पिहाँ हे वयेमाःगु अवस्था जूसा मास्कया छ्यलाबुला यायेत इनाप याःगु दु ।

नेपाल स्वास्थ्य अनुसन्धान परिषदया वरिष्ठ अनुसन्धान अधिकृत डा. मेघनाथ धिमालं वनजंगल मिँ च्याःगुलिं वायु प्रदूषण जूगुलिं अत्यावश्यक ज्या बाहेक पिने पिहाँ मवनेत व पिहाँ हे वयेमाःसा एन ९५ मास्क छ्यलेत तकं इनाप याःगु दु ।

वं वायु प्रदूषणया हुनिं स्वँय् क्यान्सर, नुगःचु सम्बन्धी ल्वय्, मस्तिष्कघात, हृदयघातथें जाःगु समस्या खनेदइगु जूगुलिं पिने पिहाँ मवनेत इनाप याःगु दु ।

वायु प्रदूषणया हुनिं मिखा ह्वाउँसे च्वनीगु, ककुइ समस्या वइगु व छ्यं स्याइगुथें जाःगु समस्या वइ । नेपालय् दँय् दसं वायु प्रदूषणया हुनिं ब्वलनीगु ल्वयया हुनिं ३० निसें ३५ हजार मनूत सिनाच्वंगु दु । हलिंन्यंकं ७० लख मनूत सिनाच्वंगु दु ।

वं छुं दँ थुखे छेँ दुनेया वायु प्रदूषण म्हो व छेँ पिनेया वायु प्रदूषण अप्वः जुइगु धाःगु दु । वं अत्यावश्यक मजुइकं सवारीसाधन चलेमयायेत व सवारीसाधन वा पेशा व्यवसायया हुनिं जुइफूगु वायु प्रदूषणया हुनियात म्हो यायेत इनाप याःगु दु । मचात, प्वाथय् दुपिं मिसात, दीर्घल्वगि, ज्येष्ठ नागरिकया विशेष ख्याल यायेमाः धकाः धाःगु दु । वायु प्रदूषणया हुनिं छेँ पिनेया खुल्ला थासय् मच्वनेत, मम्हितेत व मर्निङ्ग वाकय् छेँ पिने वनाच्वनागु खःसां नं मवनेत वं इनाप याःगु दु ।

तांन्वःगु मौसम अप्वयेधुंकाः हे वनजंगलय् मिँ च्याःगु हुनिं सोमवाः सुथनिसें हे स्वनिगःलिसें देय् न्यंकंया वायु प्रदूषण अप्वःगु दु ।

थ्वसिबें न्ह्यः स्वनिगलय् थ्वहे चैत्रया १३ गतेनिसें नं थथे हे प्रदूषण जूगु खः । प्रदूषणया हुनिं सरकारं चैत्र १७ गतेनिसें २० गतेतक स्कूल बन्द याःगु खः ।

 

Categorized in राष्ट्रिय