zero media family planning adv

वायु प्रदूषण अप्वयेधुंकाः शुक्रवाःतक देय् न्यंकं शिक्षण संस्था बन्द

नेवा: अनलाइन न्युज – ललेन्द्र शाक्य | २०७७ चैत्र १६, सोमबार १७:५८:५०

शिक्षा विज्ञान व प्रविधि मन्त्रालयं वायु प्रदूषण अप्वयेधुंकाः देय् न्यंकंया शिक्षण संस्था प्यन्हुया नितिं बन्द यायेगु निर्णय याःगु दु ।

शिक्षामन्त्री कृष्णगोपाल श्रेष्ठया नायःसुइ मन्त्रालयस थौं सोमवाः च्वंगु आकस्मिक बैठकं देसया सकतां शिक्षण संस्था बन्द यायेगु निर्णय याःगु खः ।

बैठकं मंगलवाःनिसें शुक्रवाःतक फुक्क शिक्षण संस्था बन्द यायेगु निर्णय याःगु खः ।

बैठकय् न्वःवासें शिक्षामन्त्री श्रेष्ठं वायुमण्डलय् खनेदूगु मौसम प्रतिकूलताया हुनिं शिक्षण संस्था बन्द यायेमाःगु जानकारी ब्यूगु दु ।

बैठकय् शिक्षा सचिव रामप्रसाद थपलिया, विज्ञान सचिव डा. संजय शर्मा, मन्त्रालयया प्रवक्ता व सहसचिव दीपक शर्मा, सहसचिव डा. हरि लम्साल, शिक्षा व मानव स्रोत विकास केन्द्रया महानिर्देशक बैकुण्ठ अर्यालपिनिगु उपस्थिति दूगु खः ।

बैठक न्ह्यः मन्त्री कृष्णगोपाल श्रेष्ठं प्रधामन्त्री केपी शर्मा ओलीलिसे सल्लाह साहुति ब्याकूगु खःसा वधुंकाः मन्त्रालयस जूगु बैठकय् मन्त्री श्रेष्ठं लखौं विद्यार्थीपिन्त जुइफूगु स्वास्थ्य प्रतिकूलताया हुनिं फुक्क शिक्षण संस्था बन्द यायेमाःगु धाःगु खः ।

डढेलोया हुनि प्रदूषणया कण वायुमण्डलय् मुनाः वंगु छुं दिं न्ह्यःनिसें स्वनिगः लिसेलिसें देसया थीथी थासय् कुँ वःथें जाःगु तुवाँलो ब्वलनाच्वंगु दु । तुवाँलो चिइकेगु नितिं वायु अर्थात् फय् वयेमाःगु व लिसें वा वयेमाःगु जूगुलिं अझ नं छुं दिं थ्व कायम हे जुइगु मौसमविदपिनिगु अनुमान दु ।

Categorized in राष्ट्रिय